លោក សម រង្ស៊ី៖ កម្ពុជា នឹងត្រូវផ្លាស់ប្តូរដូចនៅម៉ាឡេស៊ី

ជាតិ

នយោបាយជាតិ

លោក សម រង្ស៊ី៖ កម្ពុជា នឹងត្រូវផ្លាស់ប្តូរដូចនៅម៉ាឡេស៊ី

10, May 2018 , 5:24 pm

រូបភាព

ដោយ: ថ្មីៗ

លោក សម រង្ស៊ី អតីតប្រធានគណបក្សសង្គ្រោះជាតិ បានទាញព្រឹត្តិការណ៍នៃការផ្តាស់ប្តូររដ្ឋាភិបាលនៃប្រទេសមាឡេស៊ី តាមរយៈបោះឆ្នោតកាលពីម្សិលមិញ មកភ្ជាប់នឹងបរិបទប្រទេសកម្ពុជា។ លោក សម រង្ស៊ី សង្ឃឹមថា ការតស៊ូរបស់ក្រុមប្រឆាំងនៅកម្ពុជា នឹងអាចទទួលជោគជ័យដូចក្រុមប្រឆាំងនៅម៉ាឡេស៊ីដែរ។

ក្នុងពិធីជួបសំណេះសំណាលជាមួយពលរដ្ឋខ្មែរ ក្នុងរដ្ឋធានី វ៉ាស៊ីងតោននៃសហរដ្ឋអាមេរិក នៅថ្ងៃទី១០ ខែឧសភា ឆ្នាំ២០១៨នេះ អតីតមេបក្សប្រឆាំង បានលើកឡើងយ៉ាងដូច្នេះថា៖«ថ្ងៃស្អែក កម្ពុជា នឹងដូចម៉ាឡេស៊ីថ្ងៃនេះអ៊ីចឹង»។

ទោះជាពេលនេះ គណបក្សសង្គ្រោះជាតិ ត្រូវបានរំលាយបាត់ទៅហើយ ហើយថ្នាក់ដឹកនាំ១១៨នាក់នៃគណបក្សនេះ ត្រូវបានដកសិទ្ធិមិនឲ្យធ្វើនយោបាយ រួមទាំងលោក កឹម សុខា នៅតែបន្តជាប់ឃុំក្តី ប៉ុន្តែលោក សម រង្ស៊ី ដែលកំពុងនិរទេស នៅតែមានជំនឿថា កម្ពុជា នឹងមានការផ្លាស់ប្តូរជាមិនខាន ដោយគណបក្សសង្គ្រោះជាតិ នឹងជំនួសគណបក្សប្រជាជនកម្ពុជា ក្នុងការដឹកនាំប្រទេស។

លោក សម រង្ស៊ី បន្តថា បើគ្មានគណបក្សសង្គ្រោះជាតិ ការបោះឆ្នោតនៅឆ្នាំ២០១៨ គឺជាការបោះឆ្នោតក្លែងក្លាយ ហើយសហគមន៍អន្តរជាតិ នឹងមិនទទួលស្គាល់ឡើយ ឯរដ្ឋាភិបាលអាណត្តិថ្មី ក៏មិនមានភាពស្របច្បាប់ដែរ។ បន្ទាប់មកលោក ក៏បានអំពាវនាវម្តងទៀត កុំឲ្យប្រជាពលរដ្ឋទៅបោះឆ្នោត ទើបជាវិធីសាស្ត្រ ដែលអាចផ្លាស់ប្តូរបាន។ លោក និយាយដូច្នេះថា៖«កុំទៅបោះឆ្នោត។ នៅតែផ្ទះទៅ យើងឈ្នះហើយ»។

លោក សុខ ឥសាន អស់សំណើច នៅពេលឮលោក សម រង្ស៊ី លើកឡើងបែបនេះ។ លោក បកស្រាយថា វា ជារឿងសមទំនង ដែលលោកមហាធៀ មហាម៉ាត់ មេបក្សប្រឆាំងនៅម៉ាឡេស៊ី ឈ្នះឆ្នោត ព្រោះលោក ត្រូវបានគេចាត់ទុកជាវីរបុរស ដែលផ្ទុយពីលោក សម រង្ស៊ី និងក្រុមប្រឆាំង បាននាំគ្នាប្រព្រឹត្តបទល្មើស ដែលនាំឲ្យជាប់ទោសទណ្ឌ។

អ្នកនាំពាក្យបក្សកាន់អំណាច ប្រាប់សារព័ត៌មានថ្មីៗតាមទូរសព្ទ យ៉ាងដូច្នេះថា៖«កាលលោកស្រី អង់សាន ស៊ូជី ឈ្នះឆ្នោត ក៏លោក សម រង្ស៊ី យកមកភ្ជាប់ដែរ។ គាត់ តែងភ្ជាប់អ៊ីចឹង ដើម្បីកេងចំណេញនយោបាយ»។

លោក មហាធៀ មហាម៉ាត់ មេបក្សប្រឆាំងរបស់ម៉ាឡេស៊ី ដែលមានវ័យ ៩២ឆ្នាំទៅហើយនោះ បានឈ្នះបក្សកាន់អំណាច តាមរយៈការបោះឆ្នោតនីតិកាលទី១៤ កាលពីថ្ងៃទី៩ ខែឧសភា ឆ្នាំ២០១៨។ នេះលើកដំបូងដែលបក្សកាន់អំណាចនៅម៉ាឡេស៊ី ចាញ់ឆ្នោត បន្ទាប់ពីបានដឹកនាំប្រទេសជាង៦០ឆ្នាំកន្លងមក៕