អន្តរជាតិ
នយោបាយអន្តរជាតិ
ដូណាល់ ត្រាំ ប្រកាសថា លោកនឹងជួប គីម ជុងអ៊ុន នៅសិង្ហបុរី ថ្ងៃ១២ខែមិថុនា រូបភាព AFP
× លោក ដូណាល់ ត្រាំ បានប្រកាសជាផ្លូវការនៅថ្ងៃព្រហស្បតិ៍ទី ១០ ខែឧសភានេះថា ជំនួបប្រវត្តិសាស្ត្ររវាងលោក និងមេដឹកនាំកំពូលកូរ៉េខាងជើងលោក គីម ជុងអ៊ុន ដែលគ្រប់គ្នាកំពុងទន្ទឹងរង់ចាំនោះនឹងធ្វើឡើងនៅសិង្ហបុរី នាថ្ងៃ ១២ខែមិថុនាខាងមុខ។ ការប្រកាសនេះធ្វើឡើងក្រោយពេលរដ្ឋមន្ត្រីការបរទេសអាមេរិកលោក ម៉ៃ ប៉ុមប៉េអូ (Mike Pompeo) ត្រឡប់មកពីកូរ៉េខាងជើងវិញដោយនាំមុខជនជាតិអាមេរិកបីនាក់ដែលកូរ៉េខាងជើងដោះលែងមកជាមួយផង។
«កិច្ចប្រជុំដែលគេទន្ទឹងរង់ចាំរវាងលោក គីម ជុងអ៊ុន និងខ្ញុំផ្ទាល់នោះនឹងធ្វើឡើងនៅសិង្ហបុរី ថ្ងៃ ១២ ខែមីថុនា។ យើងទាំងពីរនឹងប្រឹងប្រែងក្នុងវេទិកាដ៏ពិសេសនេះដើម្បីសន្តិភាពពិភពលោក»។ នេះជាសម្តីរបស់លោក ដូណាល់ ត្រាំ សរសេរក្នុងគណនី Twitter ផ្លូវការរបស់ខ្លួននៅថ្ងៃ ១០ ខែឧសភានេះ។
លោក ត្រាំ សម្រេចប្រកាសពីកាលបរិច្ឆេទ និងទីតាំងនៃជំនួប ជាផ្លូវការប៉ុន្មានម៉ោងប៉ុណ្ណោះក្រោយពេលដែលរដ្ឋមន្ត្រីការបរទេសអាមេរិក ប៉ុមប៉េអូ បានត្រឡប់មកដល់សហរដ្ឋអាមេរិកជាមួយជនជាតិអាមេរិកបីនាក់ ក្រោយពេលលោកជួបមេដឹកនាំកូរ៉េខាងជើងដើម្បីពិភាក្សាពីការរៀបចំកិច្ចប្រជុំប្រវត្តិសាស្ត្រនេះ។
មុនមានការប្រកាសជាផ្លវការនេះ កាលពីថ្ងៃទី៤ ខែឧសភា លោក ត្រាំ បង្ហើបនៅមុនធ្វើដំណើរទៅកាន់រដ្ឋតិចសាស់ថា ទីតាំងនិងពេលត្រូវបានកំណត់ហើយ ប៉ុន្តែកាលនោះលោកមិនព្រមបញ្ជាក់ប្រាប់ឲ្យច្បាស់លាស់ឡើយ ដោយគ្រាន់តែបន្ថែមថា ព័ត៌មានលម្អិតនឹងត្រូវប្រកាសនៅពេលខ្លីខាងមុខនេះប៉ុណ្ណោះ។ ប៉ុន្មានថ្ងៃក្រោយមក គេឃើញសារព័ត៌មានកូរ៉េខាងត្បូងចេញផ្សាយដោយស្រង់សម្តីប្រភពស្និទ្ធនឹងការរៀបចំកិច្ចប្រជុំថា ភាគីទាំងពីរជ្រើសរើសយកសិង្ហបុរី។
តាមពិតទៅ ដំណើរការជាវិជ្ជមាននៃជំនួបមេដឹកនាំកូរ៉េកាលពីថ្ងៃ ២៧ ខែមេសាកន្លងទៅ ទំនងជាបានត្រួសត្រាយផ្លូវដល់ជំនួបលោក ត្រាំ និងលោក គីម ដែលគេជឿថា អាចសម្រេចបានលទ្ធផលផ្លែផ្កាខ្លះមិនខាន។ ជំនួបពិសេសនៅសិង្ហបុរីនេះនឹងផ្តោតសំខាន់លើបញ្ហារំសាយអាវុធនុយក្លេអ៊ែរកូរ៉េ និង ការកសាងសន្តិភាពអចិន្ត្រៃយ៍នៅឧបទ្វីបកូរ៉េផង។ កូរ៉េខាងជើងបាន បញ្ជាក់ម្ដងហើយម្ដងទៀតថា ខ្លួនមានឆន្ទៈលុបបំបាត់នុយក្លេអ៊ែរ ដែលជាការចង់បានរបស់អាមេរិក៕
Tag:
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com