ជាតិ
លោក អៀវ បណ្ណាការ អ្នកជំនាញភាពយន្តដែលស្និទ្ធនឹងសម្តេចឪ ទទួលមរណភាពក្នុងអាយុ៨៧ឆ្នាំ លោកស្រី ភឿង សកុណា រដ្ឋមន្ត្រីក្រសួងវប្បធម៌ទៅសួរសុខទុក្ខលោក អៀវ បណ្ណាការនៅមន្ទីរពេទ្យ
× លោក អៀវ បណ្ណាការ អតីតសមាជិកព្រឹទ្ធសភា និងជាអ្នកជំនាញភាពយន្តដែលសិទ្ធិនឹងសម្តេចព្រះវររាជបិតា ព្រះបរមរតនកោដ្ឋ បានទទួលមរណភាពក្នុងអាយុ៨៧ឆ្នាំ កាលពីយប់ថ្ងៃទី១០ ខែឧសភា នៅមន្ទីរពេទ្យឯកជនមួយក្នុងរាជធានីភ្នំពេញ។
ព្រឹទ្ធាចារ្យ អៀវ បណ្ណាការ ដែលជាអតីតប្រធាននាយកដ្ឋានសិល្បៈភាពយន្តផងដែរនោះ ជាអតីតមន្ត្រីម្នាក់ បានចូលរួមជួយដល់សម្តេចឪ ព្រះករុណា ព្រះនរោត្តម សីហនុ ក្នុងការផលិតភាពយន្តជាច្រើន។ លោកជាសហស្ថាបនិកជាមួយលោក ប៉ាន់ រិទ្ធី ក្នុងការបង្កើតមជ្ឈមណ្ឌលធនធានសោតទស្សន៍បុប្ឆាណា ក្នុងគោលបំណងរក្សា និងបង្កើតការចងចាំមួយដល់កូនចៅជំនាន់ក្រោយលើបេតិកភណ្ឌសោតទស្សន៍។
លោក ជាកូនប្រុសរបស់លោក អៀវ កើស អតីតនាយករដ្ឋមន្ត្រី និងជាប្រធានសភាជាតិ។ ក្នុងសាររំលែកទុក្ខជូនទៅដល់លោក អៀវ បណ្ណាសិទ្ធ ដែលជាកូនប្រុសលោក អៀវ បណ្ណាការ សម្តេច សាយ ឈុំ ប្រធានព្រឹទ្ធសភា បានលើកឡើងថា ជាការបាត់បង់ឥស្សរជនដ៏ឆ្នើមមួយរូបដែលធ្លាប់បានដង្ហែព្រះបរមរតនកោដ្ឋ នាសម័យសង្គមរាស្ត្រនិយម៕
© រក្សាសិទ្ធិដោយ thmeythmey.com