មាន៣បក្សហើយ ដែលត្រូវបានទទួលស្គាល់ឲ្យឈរឈ្មោះប្រកួត ខណៈ៤បក្ស ប្រកាសដកខ្លួន

ជាតិ

នយោបាយជាតិ

មាន៣បក្សហើយ ដែលត្រូវបានទទួលស្គាល់ឲ្យឈរឈ្មោះប្រកួត ខណៈ៤បក្ស ប្រកាសដកខ្លួន

11, May 2018 , 3:13 pm

រូបភាព

រូបថត ផ្តល់សិទ្ធិដោយ បងដង្ខៅ

ដោយ: ថ្មីៗ

មកដល់ពេលនេះ មានគណបក្ស៣ ដែលរួមមានគណបក្សប្រជាជនកម្ពុជា គណបក្សយុវជនកម្ពុជា និងគណបក្សសញ្ជាតិកម្ពុជា ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប.) សម្រេចទទួលស្គាល់ជាផ្លូវការ ដើម្បីឲ្យចូលរួមប្រកួតប្រជែងក្នុងការបោះឆ្នោត នៅថ្ងៃទី២៩ ខែកក្កដា ឆ្នាំ២០១៨។

បើតាមគ.ជ.ប. គណបក្សមួយចំនួនទៀត ដូចជា គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ និងគណបក្សសំបុកឃ្មុំសង្គមប្រជាធិបតេយ្យ ជាដើម កំពុងបំពេញបែបបទ និងត្រៀមយកទៅដាក់នៅគ.ជ.ប.។ ការចុះឈ្មោះគណបក្សនៅគ.ជ.ប. ដែលចាប់ផ្តើមពីថ្ងៃទី៣០ ខែមេសាមក នឹងត្រូវបិទបញ្ចប់ទៅវិញនៅថ្ងៃទី១៤ ខែឧសភា ឆ្នាំ២០១៨នេះ។

គណបក្ស៤ គឺគណបក្សសិទ្ធិមនុស្ស ដែលបង្កើតដោយលោក កឹម សុខា គណបក្សភ្លើងទៀន ដែលបង្កើតដោយលោក សម រង្ស៊ី គណបក្សអំណាចខ្មែរ ដែលមានលោក សួង សុភ័ណ្ឌជាប្រធាន និងគណបក្សមហាសាមគ្គីជាតិខ្មែររបស់លោក ញ៉ែម វណ្ណថន បានប្រកាសធ្វើពហិការមិនចូលរួមការបោះឆ្នោតនោះទេ ដោយពួកគេលើកហេតុផលប្រហាក់ប្រហែលគ្នាថា ស្ថានការណ៍នយោបាយ មិនសូវអំណោយផល។

បច្ចុប្បន្ន កម្ពុជា មានគណបក្សនយោបាយស្របច្បាប់ចំនួន៣៨។ នេះបើតាមបញ្ជីឈ្មោះគណបក្សនយោបាយ ដែលក្រសួងមហាផ្ទៃ បានបញ្ចេញ កាលពីប៉ុន្មានថ្ងៃមុន៕