អន្តរជាតិ
នយោបាយអន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
នៅថ្ងៃទី១២ ខែឧសភា កូរ៉េខាងជើងបានប្រកាសថា ខ្លួននឹងបិទទីតាំងសាកល្បងនុយក្លេអ៊ែរPunggye-ri នៅក្នុងខែនេះ ដោយមានអញ្ជើញអ្នកសារព័ត៌មានអន្តរជាតិធ្វើជាសាក្សីផង។ ការបិទទីតាំងសាកល្បងនេះ ធ្វើឡើងមុនជំនួបរវាងមេដឹកនាំកូរ៉េខាងជើង គីម ជុងអ៊ុន និងប្រធានាធិបតីអាមរិក ដូណាល់ ត្រាំ ក្នុងខែមិថុនា។ អាមេរិក និងកូរ៉េខាងត្បូងបានសាទរការប្រកាសរបស់កូរ៉េខាងជើង និងចាត់ទុកជាជំហានដ៏ល្អមួយ។
ទីតាំងសាកល្បងនុយក្លេអ៊ែរ Punggye-ri នឹងត្រូវបិទនៅថ្ងៃទី២៣ ទៅថ្ងៃទី២៥ ខែឧសភាខាងមុខ។ នេះបើតាមការប្រកាសរបស់ក្រសួងការបរទេសកូរ៉េខាងជើងទីភ្នាក់ងារព័ត៌មានរដ្ឋ KCNA ដោយថែមទាំងសន្យាថា នឹងកម្ទេចទីតាំងនេះនៅចំពោះមុខអ្នកសារព័ត៌មានអន្តរជាតិតែម្ដង។ ការប្រកាសនេះជាសញ្ញាវិជ្ជមានថ្មីមួយទៀតនៅមុនការមកដល់នៃជំនួបប្រវត្តិសាស្ត្ររវាងប្រធានាធិបតីអាមេរិក និងមេដឹកនាំកូរ៉េខាងជើង។
យោងតាមទីភ្នាក់ងារព័ត៌មាន AFP កូរ៉េខាងជើងនឹងកម្ទេចរូងក្រោមដីដែលប្រើសម្រាប់ការសាកល្បង បិទផ្លូវចូល ដកយកសម្ភារសង្កេតទាំងអស់ រុះរើអាគារស្រាវជ្រាវ និងកន្លែងការពារសន្តិសុខផងដែរ។ លើសពីនោះ តំបន់នៅជុំវិញទីតាំងនោះក៏ត្រូវបិទដូចគ្នា។ អ្នកសារព័ត៌មានមួយចំនួនតូចពីចិន អង់គ្លេស អាមេរិក កូរ៉េខាងត្បូង និងរុស្ស៊ី នឹងត្រូវអញ្ជើញឲ្យចូលរួមយកព័ត៌មានការបិទទីតាំងសាកល្បងនេះដើម្បីបង្ហាញពីតម្លាភាព។
ក្រោយការប្រកាសរបស់កូរ៉េខាងជើង អាមេរិក និងកូរ៉េខាងត្បូងក៏បានចេញមកស្វាគមន៍ភ្លាមដែរ។ តាមរយៈបណ្ដាញសង្គម Twitter របស់ខ្លួន លោក ដូណាល់ ត្រាំ បានអរគុណកូរ៉េខាងជើង និងចាត់ទុកការសម្រេចចិត្តរបស់កូរ៉េខាងជើងជាកាយវិការឆ្លាតវៃ និងគួរឲ្យរាក់ទាក់។ ឯកូរ៉េខាងត្បូងវិញបានសរសើរកូរ៉េខាងជើងថា ពិតជាបង្ហាញការប្ដេជ្ញាចិត្តរបស់ខ្លួនក្នុងការរំសាយនុយក្លេអ៊ែរ ដោយមិននិយាយតែមាត់ឡើយ តែបានធ្វើសកម្មភាពផង។
សូមរំឭកថា ក្រុងព្យុងយ៉ាងបានប្រកាសបិទទីតាំងសាកល្បងនុយក្លេអ៊ែរកាលពីខែមេសា ព្រមគ្នានឹងការប្រកាសឈប់សាកល្បងនុយក្លេអ៊ែរ និងមីស៊ីលទៀតផង។ ទីតាំង Punggye-ri ខាងលើនេះហើយដែលត្រូវបានក្រុងព្យុងយ៉ាងប្រើប្រាស់ក្នុងការសាកល្បងគ្រាប់នុយក្លេអ៊ែរទាំង៦ដងនាពេលកន្លងមក។ លោក គីម ជុងអ៊ុន បានប្រាប់មន្ត្រីរបស់ខ្លួនថា កូរ៉េខាងជើងបានអភិវឌ្ឍអាវុធរបស់ខ្លួនរួចស្រេចទៅហើយ ដូចនេះគ្មានការចាំបាច់អ្វីដែលកូរ៉េខាងជើងត្រូវសាកល្បងមីស៊ីល ឬនុយក្លេអ៊ែរទៀតឡើយ។
ជាការពិត ការកម្ទេចកន្លែងសាកល្បងនេះ ជាជំហានតូចមួយប៉ុណ្ណោះក្នុងដំណើរការដោះស្រាយបញ្ហានុយក្លេអ៊ែរនៅឧបទ្វីបកូរ៉េ ព្រោះវាមិនមែនជាបានន័យថា កូរ៉េខាងជើងនឹងបោះបង់នុយក្លេអ៊ែររបស់ខ្លួនទាំងស្រុងឡើយ។ យ៉ាងណាមិញ សកម្មភាពបែបនេះដែលកើតឡើងមុនពេលលោក ត្រាំ ជួបលោក គីម នៅសិង្ហបុរី ក៏ជាការត្រួសត្រាយផ្លូវសម្រាប់ជំនួបលើកទីមួយ ដែលគេគ្រប់គ្នារំពឹងចង់បានលទ្ធផលផ្លែផ្កាមិនខានឡើយ៕
Tag:
កូរ៉េខាងជើង
អាមេរិក
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com
