អតីតបក្សប្រឆាំង ចោទរដ្ឋាភិបាលនិងគ.ជ.ប. ថាដកជម្រើសរបស់ពលរដ្ឋចេញពីការបោះឆ្នោត

ជាតិ

នយោបាយជាតិ

អតីតបក្សប្រឆាំង ចោទរដ្ឋាភិបាលនិងគ.ជ.ប. ថាដកជម្រើសរបស់ពលរដ្ឋចេញពីការបោះឆ្នោត

15, May 2018 , 11:35 am

រូបភាព

លោក កឹម សុខា អតីតប្រធានគណបក្សសង្គ្រោះជាតិ និងអ្នកគំា នាំគ្នាឃោសនារកសំឡេងឆ្នោត កាលពីពេលបោះឆ្នោតជ្រើសរើសក្រុមប្រឹក្សាឃុំ សង្កាត់ កន្លងមក។ រូបថតដោយ ថាន រស្មី

ដោយ: ថ្មីៗ

ដោយសារតែមិនមានឈ្មោះនៅគណៈកម្មាធិការជាតិរៀបចំការបោះឆ្នោត (គ.ជ.ប.) សម្រាប់ចូលរួមប្រកួតក្នុងការបោះឆ្នោត អតីតគណបក្សសង្គ្រោះជាតិ ក៏បានចេញសេចក្តីថ្លែងការណ៍មួយ ដើម្បីថ្កោលទោស គ.ជ.ប. រួមទាំងរដ្ឋាភិបាលកម្ពុជា។ អតីតគណបក្សប្រឆាំងធំជាងគេ បានចោទគ.ជ.ប. និងរដ្ឋាភិបាលថា ការផាត់ខ្លួនចេញពីការបោះឆ្នោតបែបនេះ គឺស្មើនឹងការដកជម្រើសរបស់ប្រជាពលរដ្ឋ។

សេចក្តីថ្លែងការណ៍របស់អតីតគណបក្សសង្គ្រោះជាតិ គឺធ្វើឡើងក្រោយពីគ.ជ.ប. ប្រកាសឈប់ទទួលពាក្យរបស់គណបក្សនយោបាយ ដែលយកទៅដាក់ដើម្បីចូលរួមប្រកួតប្រជែងការបោះឆ្នោត។ រយៈពេល១៥ថ្ងៃ គឺចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា ឆ្នាំ២០១៨ មានគណបក្សទាំងអស់ចំនួន២០ឯណោះ ដែលបានយកពាក្យទៅដាក់នៅគ.ជ.ប. តែគ្មានអតីតគណបក្សសង្គ្រោះជាតិ។

គណបក្សសង្គ្រោះជាតិ ដែលត្រូវបានរំលាយចោល ហើយលែងមានទីស្នាក់ការនៅប្រទេសកម្ពុជា បានលើកឡើងក្នុងសេចក្តីថ្លែងការណ៍យ៉ាងដូច្នេះថា៖«[ការមិនអនុញ្ញាតឲ្យគណបក្សសង្គ្រោះជាតិ ចូលរួម] គឺបង្ហាញថា ការបោះឆ្នោតនាពេលខាងមុខ គឺជាការបោះឆ្នោតក្លែងក្លាយ មិនឆ្លុះបញ្ចាំងពីឆន្ទៈរបស់ប្រជាពលរដ្ឋខ្មែរ ហើយជាការសម្លាប់ប្រជាធិបតេយ្យនៅកម្ពុជា»។

បន្ទាប់មក អតីតគណបក្សសង្គ្រោះជាតិ ក៏អំពាវនាវជាថ្មីកុំឲ្យប្រជាពលរដ្ឋ ទៅបោះឆ្នោត នៅថ្ងៃទី២៩ ខែកក្កដា ឆ្នាំ២០១៨។ លើសពីនេះ អតីតគណបក្សប្រឆាំង ក៏អំពាវនាវកុំសហគមន៍អន្តរជាតិទទួលស្គាល់ការបោះឆ្នោតនៅកម្ពុជាផងដែរ។ សារចុងក្រោយរបស់អតីតគណបក្សប្រឆាំង គឺស្នើឲ្យប្រទេសជប៉ុន បញ្ឈប់ការផ្តល់ជំនួយនិងការគាំទ្រដល់គ.ជ.ប.។

លោក ហង្ស ពុទ្ធា អ្នកនាំពាក្យរបស់គ.ជ.ប. មិនអាចទទួលយកបានឡើយ ចំពោះការចោទប្រកាន់របស់អតីតគណបក្សសង្គ្រោះជាតិ។ លោក បានរិះគន់ត្រឡប់ទៅវិញថា អតីតគណបក្សសង្គ្រោះជាតិ ចង់បង្ហាញពីភាពផ្តាច់មុខរបស់ខ្លួន ខាងនយោបាយ។ អ្នកនាំពាក្យគ.ជ.ប.រូបនេះ បញ្ជាក់ប្រាប់សារព័ត៌មានថ្មីៗតាមទូរសព្ទយ៉ាងដូច្នេះថា៖«ប្រជាពលរដ្ឋ មានជម្រើសផ្សេងទៀត។ មិនមានគណបក្សណាផ្តាច់មុខបានទេ»។

លោក សុខ ឥសាន អ្នកនាំពាក្យគណបក្សប្រជាជនកម្ពុជា ក៏ប្រតិកម្មនឹងអតីតគណបក្សសង្គ្រោះជាតិដែរ។ លោក និយាយមកកាន់សារព័ត៌មានថ្មីៗយ៉ាងដូច្នេះថា៖«អតីតគណបក្សសង្គ្រោះជាតិ ក្លាយទៅជាខ្មោចហើយ ដូច្នេះមិនមានសិទ្ធិមកចុះឈ្មោះបោះឆ្នោតទៀតទេ»។

អ្នកនាំពាក្យគណបក្សអំណាចរូបនេះ ក៏បានសរសេរសារទៅកាន់អ្នកកាសែតតាមបណ្តាញទំនាក់ទំនងតេឡេក្រាមផងដែរ ជុំវិញការបោះឆ្នោត។ លោក បានសរសេរយ៉ាងដូច្នេះថា៖«ការដែលគណបក្សជាច្រើន បានទៅដាក់ពាក្យនៅគ.ជ.ប. ដើម្បីចូលរួមប្រកួតប្រជែងការបោះឆ្នោត គឺឆ្លុះបញ្ចាំងឲ្យឃើញពីលទ្ធិប្រជាធិបតេយ្យ សេរីពហុបក្ស ដែលត្រូវបានអនុវត្តយ៉ាងត្រឹមត្រូវតាមរដ្ឋធម្មនុញ្ញ ហើយសិទ្ធិនយោបាយ និងសិទ្ធិពលរដ្ឋ ត្រូវបានបើកទូលាយ និងមានសក្តានុពល ទោះបីអតីតគណបក្សប្រឆាំង ត្រូវបានរំលាយចោលក្តី»៕

អត្ថបទទាក់ទង

បោះឆ្នោត៖ បក្ស២០ដាក់ពាក្យចូលប្រជែង តែគ្មានឡើយច្រកសម្រាប់ CNRP

សង្គ្រោះជាតិ នៅសល់ឱកាសត្រឹមថ្ងៃនេះ