រាជបណ្ឌិត្យសភា នឹងចងក្រងគោលនយោបាយបក្សនីមួយៗ ដើម្បីកុំឲ្យអ្នកនយោបាយ ក្បត់សម្តីក្រោយការបោះឆ្នោត

ជាតិ

បោះឆ្នោត

រាជបណ្ឌិត្យសភា នឹងចងក្រងគោលនយោបាយបក្សនីមួយៗ ដើម្បីកុំឲ្យអ្នកនយោបាយ ក្បត់សម្តីក្រោយការបោះឆ្នោត

28, May 2018 , 9:59 pm

រូបភាព

ដោយ:

ភ្នំពេញ៖ រាជបណ្ឌិត្យសភាកម្ពុជា បានរៀបចំកិច្ចពិភាក្សាតុមូល ស្ដីពី«គោលនយោបាយរបស់គណបក្សនយោបាយ» ដើម្បីឲ្យប្រជាពលរដ្ឋបានដឹង នឹងទទួលព័ត៌មានពីគោលនយោបាយរបស់បក្សនីមួយៗ ដែលបានឈរឈ្មោះបោះឆ្នោតនៅនីតិកាលទី៦ ខាងមុខ។ រាជបណ្ឌិត្យសភា នឹងចងក្រងឯកសារ ពីគោលនយោបាយគ្រប់គណបក្ស ដើម្បីឲ្យប្រជាពលរដ្ឋអាចតាមដាន និងកុំឲ្យអ្នកនយោបាយក្បត់ពាក្យសម្តីក្រោយការបោះឆ្នោត។

ប្រធានគណបក្ស និងអ្នកតំណាង ចំនួន១៨ ក្នុងចំណោម២០គណបក្ស ដែលឈរឈ្មោះបោះឆ្នោតខាងមុខ នឹងត្រូវជជែកដេញដោលគ្នា ដើម្បីការពារគោលនយោបាយបក្សរៀងៗខ្លួន នៅក្នុងកម្មវិធីពិភាក្សាតុមូល ដែលរៀបចំឡើងដោយរាជបណ្ឌិតសភា។ លោក សុខ ទូច ប្រធានរាជបណ្ឌិត្យសភា បាននិយាយថា មូលហេតុដែលស្ថាប័នលោក រៀបចំកម្មវិធីពិភាក្សាគ្នាឡើង ដើម្បីចងក្រងជាឯកសារ ស្តីពីគោលនយោបាយរបស់គណបក្ស ដែលចូលរួមប្រកួតប្រជែងក្នុងការបោះឆ្នោតនីតិកាលទី៦នេះ ក្នុងទិសដៅឲ្យពលរដ្ឋតាមដានរាល់សកម្មភាពអនុវត្តរបស់អ្នកនយោបាយ និងកុំពួកគេចេះតែនិយាយបោកប្រាស់ពលរដ្ឋ ឬក្បត់ពាក្យសម្តីក្រោយការបោះឆ្នោត។

ថ្លែងក្រោយរៀបចំកិច្ចពិភាក្សាតុមូល ដែលផ្ដល់ឱកាសឲ្យអ្នកនយោបាយមួយចំនួន បកស្រាយពីគោលនយោបាយខ្លួន នៅថ្ងៃទី២៨ ឧសភា ប្រធានរាជបណ្ឌិត្យសភារូបនេះ បាននិយាយដូច្នេះថា៖«កម្មវិធីនេះចង់ឲ្យម្ចាស់ឆ្នោត បានដឹងអំពីគោលនយោបាយរបស់គណបក្សនីមួយៗ ថាតើគាត់ធ្វើយ៉ាងដូចម្ដេច? ហើយមុននឹងគាត់ទម្លាក់សន្លឹកឆ្នោត គឺគាត់មានជំនឿថាសន្លឹកឆ្នោតដែលគាត់ទម្លាក់គឺឲ្យទៅគោលនយោបាយដែលអភិវឌ្ឍន៍ប្រទេសជាតិ ឬជួយប្រជាជនកម្ពុជា ដែលពលរដ្ឋចង់បាន»។

តែយ៉ាងណាការរៀបចំវេទិការពិភាក្សាតុមូលនេះ មិនមែនជួសមុខឲ្យគណៈកម្មាធិការជាតិរៀបចំការបោះឆ្នោត(គ.ជ.ប) ឡើយ ។ នេះជាការបញ្ជាក់របស់លោក សុខ ទូច ដែលបានបន្ថែមថា ប្រទេសដែលមានភាពរីកចម្រើនផ្នែកលទ្ធិប្រជាធិបតេយ្យ ទើបផ្ដល់ឱកាសឲ្យគ្រប់គណបក្សនយោបាយជជែកដេញដោលគ្នាទៅលើគោលនយោបាយបែបនេះ។

បើតាមលោក សុខ ទូច វេទិការនេះ គឺជាការទទួលខុសត្រូវរបស់បក្សនីមួយៗ។ រាជបណ្ឌិត្យសភាកម្ពុជា បានផ្ដល់ឱកាសដល់គ្រប់គណបក្សទាំងអស់ ដែលត្រូវបាន គ.ជ.ប ទទួលស្គាល់ទាំង២០បក្ស ក្នុងបញ្ជីឈរឈ្មោះបោះឆ្នោត នៅអាណត្តិទី៦ខាងមុខ។ ប៉ុន្តែវេទិការដេញដោលថ្ងៃដំបូងនេះ គេមិនឃើញមានវត្តមានតំណាងគណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រឡើយ។

រាជបណ្ឌិត្យសភាកម្ពុជា នឹងអញ្ជើញគណបក្សចំនួន២ មកជជែកដេញដោលគ្នាអំពីគោលនយោបាយពួកគេ ដើម្បីផ្សព្វផ្សាយឲ្យប្រជាពលរដ្ឋបានដឹង ជារៀងរាល់ថ្ងៃ រហូតដល់ថ្ងៃទី៤ មិថុនាខាងមុខ៕