ក្រុមហ៊ុនជប៉ុនចំណាស់មួយ បង្កើតជំនាញកែច្នៃគ្រឿងបន្លាស់រថយន្ត នៅកម្ពុជា

ជាតិ

រថយន្ត

សេដ្ឋកិច្ច

28, May 2018 , 7:19 pm

រូបភាព

ដោយ:

ភ្នំពេញ៖ ក្រុមហ៊ុនជប៉ុន Sanyo Parts បានចាប់ផ្ដើមសហការជាមួយសាលា បច្ចេកទេសមួយនៅកម្ពុជា ដើម្បីបណ្ដុះបណ្ដាលជំនាញកែច្នៃគ្រឿងបន្លាស់រថយន្ត នៅកម្ពុជា។ នេះបើតាមការផ្សព្វផ្សាយរបស់ក្រសួងការងារ និងបណ្ដុះបណ្ដាលវិជ្ជាជីវៈកាលពីពេលថ្មីៗកន្លងមក។

អនុស្សារណៈនៃការយោគយល់គ្នា (MOU) ត្រូវបានចុះហត្ថលេខារវាងក្រុមហ៊ុន Sanyo Parts និងសាលាមធ្យមសិក្សាបច្ចេកទេស JVC ក្រោមអធិបតីភាពលោក ពេជ សោភ័ន រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី២២ ខែឧសភា។

តាមរយៈអនុស្សារណៈនេះ ក្រុមហ៊ុនជប៉ុន Sanyo Parts និងសាលា JVC នឹងសហការបង្កើតជំនាញថ្មីមួយទៀតនៅកម្ពុជា។ វាគឺជាជំនាញកែច្នៃឡើងវិញនូវគ្រឿងបន្លាស់រថយន្តចាស់ៗ ឲ្យទៅជាថ្មី និងមានស្ដង់ដារច្បាស់លាស់។

ក្រៅពីសហការបណ្ដុះបណ្ដាល ក្រសួងការងារ មិនបានបញ្ជាក់ថា ក្រុមហ៊ុននឹងបោះទុនធ្វើអាជីវកម្មកែច្នៃគ្រឿងបន្លាស់រថយន្តនៅកម្ពុជា ឬយ៉ាងណានោះទេ?

តែលោក Keiji Sakai អគ្គនាយកក្រុមហ៊ុន Sanyo Parts បានឲ្យដឹងថា ក្រុមហ៊ុនលោកបានមកសិក្សាពីទីផ្សារនៅកម្ពុជា កាលពី៤ឆ្នាំមុន។ ការសិក្សាបានបង្ហាញថា កម្ពុជាបាននាំចូលរថយន្តជាច្រើនដែលផលិតនៅប្រទេសជប៉ុន ហើយកម្ពុជានិយមប្រើប្រាស់គ្រឿងបន្លាស់មួយទឹក ដែលគ្មានបន្ថែមស្ដង់ដារច្បាស់ដើម្បីធានាដល់សុវត្ថិភាពបើកបរនោះឡើយ។
Sanyo Parts ជាក្រុមហ៊ុនបោះដុំគ្រឿងបន្លាស់រថយន្តដ៏ធំមួយ ដែលត្រូវបានបង្កើតឡើងតាំងពីឆ្នាំ ១៩៦៨ មកម្លេះ។ នេះបើតាមអគ្គនាយកក្រុមហ៊ុនមួយនេះ។

លោក ពេជ សោភ័ន បានចាត់ទុកកិច្ចសហការនេះថាជាការផ្ដល់ឱកាសសម្រាប់យុវជនកម្ពុជា។ លោកឲ្យដឹងដូច្នេះថា៖«នេះជាឱកាសមួយសម្រាប់ពលរដ្ឋកម្ពុជា ដែលមានបំណងចង់ចាប់ជំនាញពាក់ព័ន្ធនឹងគ្រឿងបន្លាស់រថយន្ត ហើយបច្ចុប្បន្នទីផ្សារកម្ពុជាកំពុងត្រូវការអ្នកមានជំនាញច្បាស់លាស់លើការផលិត និងជួសជុលគ្រឿងយន្ត»៕