លោក សម រង្ស៊ី៖ បើពលរដ្ឋជាង៥០ភាគរយមិនទៅបោះឆ្នោត របបសព្វថ្ងៃ នឹងត្រូវផ្លាស់ប្តូរ

ជាតិ

បោះឆ្នោត

នយោបាយជាតិ

លោក សម រង្ស៊ី៖ បើពលរដ្ឋជាង៥០ភាគរយមិនទៅបោះឆ្នោត របបសព្វថ្ងៃ នឹងត្រូវផ្លាស់ប្តូរ

30, May 2018 , 4:36 pm

រូបភាព

ដោយ: ថ្មីៗ

ភ្នំពេញ៖ លោក សម រង្ស៊ី ប្រាប់ប្រជាពលរដ្ឋ កុំឲ្យទៅបោះឆ្នោត ទើបអាចធ្វើឲ្យកម្ពុជា មានការផ្លាស់ប្តូរ។ តែលោក សុខ ឥសាន ឆ្លើយតបយ៉ាងខ្លីថា ទៅមិនរួចទេ។

លោក សម រង្ស៊ី អតីតប្រធានគណបក្សសង្គ្រោះជាតិ ដូចជាមិនខ្លាចរអែងនឹងការព្រមានចាត់វិធានការពីសំណាក់រដ្ឋាភិបាលកម្ពុជាទៅលើរូបលោកនោះទេ ដែលអំពាវនាវមិនឲ្យប្រជាពលរដ្ឋទៅបោះឆ្នោត។ លោក នៅតែនិយាយថា កម្ពុជា នឹងមានការផ្លាស់ប្តូរដោយងាយស្រួលនៅឆ្នាំ២០១៨ បើប្រជាពលរដ្ឋ បោះបង់ការបោះឆ្នោត។

ក្នុងបទសម្ភាសជាមួយវិទ្យាអាស៊ីសេរី នៅថ្ងៃទី២៩ ខែឧសភា ឆ្នាំ២០១៨ អតីតប្រធានគណបក្សប្រឆាំង ដែលកំពុងនិរទេសរូបនេះ ហ៊ានអះអាងយ៉ាងដូច្នេះថា៖«បើប្រជាពលរដ្ឋជាង៥០ភាគរយ ជាងពាក់កណ្តាលនគរ មិនទៅបោះឆ្នោត ពេលនុ៎ង របបដឹកនាំសព្វថ្ងៃ នឹងទទួលបរាជ័យទាំងអស់គ្នា»។

លោក សម រង្ស៊ី លើកហេតុផលថា រដ្ឋាភិបាលកម្ពុជា ដែលកើតឡើងក្រោយការបោះឆ្នោតក្លែងក្លាយ នឹងមិនមានភាពស្របច្បាប់ឡើយ ហើយសហគមន៍អន្តរជាតិ នឹងមិនទទួលស្គាល់នោះទេ។ លោក សង្កត់ធ្ងន់ថា ដោយសារតែគ្មានការទទួលស្គាល់ពីសហគមន៍អន្តរជាតិ រដ្ឋាភិបាលកម្ពុជា នឹងជាប់គាំង ហើយមិនអាចដំណើរបាន។

លោក បញ្ជាក់ក្នុងបទសម្ភាសជាមួយវិទ្យុអាស៊ីសេរីយ៉ាងដូច្នេះទៀតថា៖«ចាំតែមើលទៅ ក្រោយថ្ងៃទី២៩ ខែកក្កដា លោក ហ៊ុន សែន នឹងបាត់បង់ភាពស្របច្បាប់។ របបដឹកនាំសព្វថ្ងៃ នឹងដួលរលំដោយខ្លួនឯង ដោយសារតែអន្តរជាតិឈប់ទទួលស្គាល់ អស់ជំនួយ អស់ទីផ្សារ អស់វិនិយោគ អស់ឱកាសខ្ចីប្រាក់ពីគេ»។

លោក សុខ ឥសាន អ្នកនាំពាក្យគណបក្សប្រជាជនកម្ពុជា ឆ្លើយតបថា ក្នុងចំណោមប្រជាពលរដ្ឋជាង៨លាននាក់ ដែលមានឈ្មោះក្នុងបញ្ជីបោះឆ្នោត មានប្រមាណ៦០ភាគរយឯណោះ ជាអ្នកគាំទ្រគណបក្សប្រជាជនកម្ពុជា។ លោក ចង់បញ្ជាក់ថា យ៉ាងហោចណាស់ក៏មានប្រជាពលរដ្ឋប្រមាណ៦០ភាគរយដែរ ដែលនឹងទៅបោះឆ្នោត។

ប៉ុន្តែ អ្នកនាំពាក្យគណបក្សកាន់អំណាច អះអាងថា ទោះបីជាអ្នកទៅបោះឆ្នោត មានចំនួនតិចជាង៥០ភាគរយក៏ដោយ ក៏ការបោះឆ្នោត នៅតែបានការដដែល។ លោក បកស្រាយថា ច្បាប់នៅកម្ពុជា មិនកំណត់ចំនួនអ្នកទៅបោះឆ្នោតនោះទេ។

លោក សុខ ឥសាន លើកយកការបោះឆ្នោតនៅបណ្តាប្រទេសមួយចំនួន មកធ្វើជាឧទាហរណ៍យ៉ាងដូច្នេះថា៖«នៅប្រទេសខ្លះ អ្នកទៅបោះឆ្នោត មិនបាន៥០ភាគរយទេ ដូចជាបោះឆ្នោតនៅអាមេរិក ទទួលបានសំឡេងត្រឹមតែ៤០ភាគរយប៉ុណ្ណោះ តែប្រធានាធិបតីរបស់គេឡើងកាន់អំណាចបាន។ គេមិនបានគិតអ្នកដែលមិនបានទៅបោះឆ្នោតទេ ទោះបីជាដល់ទៅ៦០ ឬ៧០ភាគរយក៏ដោយ។ គេគិតតែសំឡេងអ្នកដែល បានទៅបោះឆ្នោតប៉ុណ្ណោះ»។

លោក សុខ ឥសាន បន្តថា រដ្ឋាភិបាលកម្ពុជា នឹងមិនជាប់គាំង ដោយសារតែសហគមន៍អន្តរជាតិខ្លះ មិនទទួលស្គាល់នោះទេ។ លោក ប្រាប់សារព័ត៌មានថ្មីៗបែបនេះថា៖«លើពិភពលោក មានប្រទេសរាប់រយជាមហាអំណាច។ បើប្រទេសមួយ-ពីរ មិនទទួលស្គាល់ ក៏មានប្រទេសច្រើនទៀតគេទទួលស្គាល់»។

លោក សម រង្ស៊ី និងក្រុមប្រឆាំងនៅក្រៅប្រទេស ដែលអំពាវនាវមិនឲ្យប្រជាពលរដ្ឋទៅបោះឆ្នោត បានរងការព្រមានពីរដ្ឋាភិបាលកម្ពុជា។ សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនម្ពុជា ចាត់ទុកការអំពាវនាវរបស់ក្រុមប្រឆាំងថា ជាការរំលោភសិទ្ធិរបស់ប្រជាពលរដ្ឋ និងជាការបំផ្លាញប្រជាធិបតេយ្យនៅកម្ពុជា។

ចំណែកឯ សម្តេច ស ខេង រដ្ឋមន្ត្រីក្រសួងមហាផ្ទៃ បានហៅការអំពាវនាវនេះ ថាជាការរារាំងប្រជាពលរដ្ឋ មិនឲ្យទៅបោះឆ្នោត ដែលជាទង្វើខុសច្បាប់។ ឯ គណៈកម្មាធិការជាតិរៀបចំការបោះឆ្នោត ក៏បានស្នើឲ្យស្ថាប័នមានសមត្ថកិច្ច ចាត់វិធានការលើករណីនេះដែរ៕