តុលាការសម្រេចឃុំខ្លួនស្ត្រី ដែលធ្វើទារុណកម្មលើក្មេងស្រីបម្រើបណ្ដោះអាសន្ន

ជាតិ

តុលាការសម្រេចឃុំខ្លួនស្ត្រី ដែលធ្វើទារុណកម្មលើក្មេងស្រីបម្រើបណ្ដោះអាសន្ន

31, May 2018 , 3:23 pm

រូបភាព

ដោយ: ថ្មីៗ

ភ្នំពេញ៖ ក្រោយចំណាយពេលសាកសួរអស់ជាច្រើនម៉ោង ចៅក្រមស៊ើបសាលាដំបូងរាជធានីភ្នំពេញ បានសម្រេចឃុំខ្លួន ស្ត្រីដែលបានធ្វើទារុណកម្មលើក្មេងស្រីបម្រើ នៅពន្ធនាគារព្រៃស បណ្ដោះអាសន្ន ដើម្បីបន្តនីតិវិធីសាកសួរ។

ស្ត្រីម្នាក់ ដែលប្រើទណ្ឌកម្មលើក្មេងស្រីបម្រើ អាយុ១៦ឆ្នាំ ត្រូវបានព្រះរាជអាជ្ញារង សាលាដំបូងរាជធានីភ្នំពេញ ចោទប្រកាន់ពីបទហិង្សាដោយចេតនា តាមមាត្រា២១៩ នៃក្រមព្រហ្មទណ្ឌ។ បើសិនជាតុលាការ រកឃើញថា ស្ត្រីខាងលើនេះ ពិតជាបានធ្វើទារុណកម្មលើកុមារមែននោះ រូបគេអាចប្រឈមមុខជាប់ពន្ធនាគារពី២ទៅ៥ឆ្នាំ។

កាលពីថ្ងៃទី២៧ ឧសភា កន្លងមក សមត្ថកិច្ចបានចុះអន្តរាគមន៍ ជួយសង្គ្រោះក្មេងស្រីរងគ្រោះ ពីសំណាក់ស្ត្រីម្ចាស់ផ្ទះ ក្រោយពីមានសេចក្តីរាយការណ៍ពីប្រជាពលរដ្ឋ ដែលរស់នៅក្បែរគ្នានោះ ។ ស្ត្រីម្ចាស់ផ្ទះ មានឈ្មោះ ម៉េង រ័ត្នពិសី ហៅសុភា ជាអ្នកលក់សម្លៀកបំពាក់ នៅផ្សារបុរីសន្តិភាព២ ភូមិតំណាក់ត្រយឹង សង្កាត់ចោមចៅ២ ខណ្ឌពោធិសែនជ័យ រាជធានីភ្នំពេញ។ ចំណែកក្មេងស្រីរងគ្រោះ ឈ្មោះ ជា ស្រីនូ មានស្រុកកំណើតនៅភូមិទំនប់ថ្មី ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ ។ បើតាមសម្ដីក្មេងស្រីរងគ្រោះ ស្ត្រីខាងលើបានប្រើអំពើហិង្សាមកលើរូបនាង អស់រយៈពេល៤ឆ្នាំមកហើយ៕