ជាតិ
EU លើកស្ទួយគុណភាពអប់រំក្នុងតំបន់អាស៊ានតាមរយៈកម្មវិធី SHARE
× ភ្នំពេញ៖ «ស្ហ៊ែរ» SHARE គឺជាកម្មវិធីលើកកម្ពស់គុណភាពអប់រំ ការប្រកួតប្រជែង និងអន្តរជាតូបនីយកម្មនៃគ្រឹះស្ថានឧត្ដមសិក្សា និងនិស្សិតនៅក្នុងតំបន់អាស៊ាន។
អ្នកជំនាញផ្នែកឧត្តមសិក្សា ថ្នាក់ដឹកនាំនៃសាកលវិទ្យាល័យ មន្ត្រីជាន់ខ្ពស់ក្នុងវិស័យអប់រំមកពីតំបន់អាស៊ាន រួមទាំងមន្ត្រីជាន់ខ្ពស់នៃសហភាពអឺរ៉ុបទាំងអស់ជាង១០០នាក់ បានមកជួបជុំគ្នានៅក្នុងសន្និសីទថ្នាក់តំបន់ក្នុងរាជធានីភ្នំពេញដើម្បីពិភាក្សាអំពីការជំរុញកម្មវិធីអប់រំក្នុងតំបន់អាស៊ានតាមរយៈកម្មវិធី SHARE។ សន្និសីទដែលប្រព្រឹត្តទៅនៅសណ្ឋាគារ Sunway ត្រូវបានដឹកនាំរួមគ្នាដោយឯកអគ្គរដ្ឋទូតសហភាពអឺរ៉ុបប្រចាំកម្ពុជាលោក ចច អេដហ្គា (George Edgar) និងរដ្ឋលេខាធិការក្រសួងអប់រំ លោក យក់ ង៉ុយ។
SHARE គឺជាកម្មវិធីគាំទ្រកម្រិតឧត្តមសិក្សាក្នុងតំបន់អាស៊ាន ដែលត្រូវបានឧបត្ថម្ភដោយសហភាពអឺរ៉ុប ដោយមានកិច្ចសហប្រតិបត្តិការជាមួយលេខាធិការអាស៊ាន។ តាំងពីឆ្នាំ២០១៦ កម្មវិធីSHARE បានដើរតួនាទីយ៉ាងសំខាន់ក្នុងការធ្វើអន្តរជាតូបនីយកម្ម និងសុខដុមនីយកម្មនៃឧត្តមសិក្សាក្នុងចំណោមប្រទេសសមាជិកអាស៊ាន។
ការជួបជុំគ្នានៃអ្នកជំនាញអប់រំថ្នាក់ឧត្តមសិក្សារយៈពេល២ថ្ងៃ (៣០-៣១ ឧសភា) កន្លងទៅនេះ ត្រូវរៀបចំឡើងដើម្បីផ្តល់ឲ្យអ្នកចូលរួមយល់ដឹងអំពីគោលនយោបាយអប់រំនាពេលបច្ចុប្បន្ន គំនិតច្នៃប្រឌិត (នវានុវត្តន៍)ដែលទទួលបានជោគជ័យ និងពិសោធន៍ល្អដែលត្រូវបានអនុវត្តនៅក្នុងតំបន់អាស៊ាន និងនៅអឺរ៉ុប។
នៅក្នុងឱកាសបើកសន្និសីទនោះ ឯកអគ្គរដ្ឋទូតសហភាពអឺរ៉ុបបានមានប្រសាសន៍ លោករីករាយដែលបានឃើញបទពិសោធន៍របស់សហភាពអឺរ៉ុបលើប្រព័ន្ធផ្ទេរក្រេឌីត បានតួនាទីយ៉ាងសំខាន់ក្នុងជំរុញឲ្យមានការចល័តនិស្សិតក្នុងតំបន់អាស៊ាន និងការកសាងអត្តសញ្ញាណអាស៊ានខ្លួនឯង។ លោក អេដហ្គា បានបន្ថែមយ៉ាងដូច្នេះ៖«កម្មវិធីនេះ ជាកម្មវិធីបន្ថែមលើកម្មវិធីអាហារូបករណ៍ជាច្រើនដែលផ្តល់ដល់កម្ពុជាតាមរយៈកម្មវិធី Erasmus Plus។ លើសពីនេះទៀត កម្មវិធីនេះក៏ជាកម្មវិធីបន្ថែមលើការគាំទ្រយ៉ាងច្រើនរបស់សហភាពអឺរ៉ុបដល់វិស័យអប់រំកម្ពុជា»។
ប្រព័ន្ធផ្ទេរក្រេឌីតរបស់ SHARE បានឆ្លងកាត់ការអនុវត្តសាកល្បងតាមរយៈការអនុវត្តកម្មវិធីអាហារូបករណ៍របស់ SHARE។ ចាប់តាំងពីឆ្នាំ ២០១៦ មក កម្មវិធីស្ហ៊ែរបានផ្តល់អាហារូបករណ៍សរុប ៤០០កន្លែងដល់និស្សិតមកពីបណ្ដាប្រទេសអាស៊ាន ៨ប្រទេសដើម្បីសិក្សារយៈពេលខ្លីនៅសាកលវិទ្យាចំនួន ៣២ក្នុងតំបន់អាស៊ាន និងអាហារូបករណ៍ ១០០កន្លែងផ្សេងទៀត ដល់និស្សិតអាស៊ានសិក្សានៅសាកលវិទ្យាល័យ ៨នៅអឺរ៉ុប។
សម្រាប់លោក យក់ ង៉ុយ អន្តរជាតូបនីយកម្មតាមប្រព័ន្ធផ្ទេរក្រឌីត និងការចល័តនិស្សិត បាននាំមកនូវផលប្រយោជន៍ដល់ប្រទេសជាតិ និងតំបន់អាស៊ាន តាមរយៈការផ្ដល់ផលសេដ្ឋកិច្ច នវានុវត្ដន៍ និងធនធានមនុស្ស។ លោកបន្តថា ការបង្កើតស្ដង់ដារឧត្ដមសិក្សាសកលមួយ នឹងផ្ដល់ឱកាសឲ្យយុវជនបានចូលរួមក្នុងទីផ្សារការងារ ដែលមានការផ្លាស់ប្តូរយ៉ាងឆាប់រហ័ស ហើយធ្វើឲ្យកំណើនសេដ្ឋកិច្ចមានភាពរឹងមាំ ដោយមានការប្រកួតប្រជែងសេដ្ឋកិច្ចអន្តរជាតិសម្រាប់អាស៊ាន។
«ក្រោយពីចប់ការសិក្សា និស្សិតអាចធ្វើការងារនៅប្រទេសអាស៊ាន និងនៅអឺរ៉ុបបាន។ ទាំងជំនាញរឹង និងទន់ ពួកគេនឹងអាចឆ្លើយតបតម្រូវការទីផ្សារក្នុងស្រុក និងបរទេស»។ នេះជាការអះអាងរបស់លោក យក់ ង៉ុយ។
សូមបញ្ជាក់ថា និស្សិតជាង ១៤០០នាក់ មន្ត្រីផ្នែកទំនាក់ទំនងអន្តរជាតិ ២៥០នាក់ និងគ្រឹះស្ថានឧត្ដមសិក្សា ៤២គ្រឹះស្ថាន បច្ចុប្បន្នកំពុងតែប្រើប្រាស់វេទិការអនឡាញរបស់ស្ហ៊ែរ និងឧបករណ៍ឌីជីថលដែលមានលក្ខណៈពេញលេញ៕
© រក្សាសិទ្ធិដោយ thmeythmey.com