ជាតិ
នយោបាយជាតិ
រដ្ឋមន្ត្រីយុត្តិធម៌ បញ្ជាឲ្យតុលាការចាត់ការលោក សម រង្ស៊ី ពីបទប្រមាថព្រះមហាក្សត្រ
× លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ បានធ្វើអធិបញ្ជាទៅកាន់ស្ថាប័នអយ្យការអមសាលាដំបូងរាជធានីភ្នំពេញ ដើម្បីឲ្យចាត់វិធានការផ្លូវច្បាប់លើលោក សម រង្ស៊ី អតីតប្រធានគណបក្សសង្គ្រោះជាតិ ពាក់ព័ន្ធនឹងការប្រមាថព្រះមហាក្សត្រ។ នេះជាការអះអាងរបស់លោក គឹម សន្តិភាព អ្នកនាំពាក្យក្រសួងយុត្តិធម៌។
តាមរយៈសារលើទំព័រហ្វេសប៊ុក លោក គឹម សន្តិភាព បានបញ្ជាក់មូលហេតុថា ការចាត់វិធានការនេះ គឺដើម្បីការពារព្រះចេស្តាអង្គព្រះមហាក្សត្រ ឲ្យស្របតាមស្មារតីនៃរដ្ឋធម្មនុញ្ញ និងច្បាប់នៅកម្ពុជា។
ថ្មីៗនេះ ព្រះមហាក្សត្រ បានចេញរាជសារមួយ ដោយអំពាវនាវឲ្យប្រជាពលរដ្ឋ ទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨។ បន្ទាប់មក លោក សម រង្ស៊ី ដែលកំពុងនិរទេស បានសរសេរសារលើទំព័រហ្វេសប៊ុកថា ព្រះរាជសាររបស់ព្រះមហាក្សត្រ គឺជាព្រះរាជសារក្លែងក្លាយ ឬក៏ត្រូវបានធ្វើឡើងក្រោមការគំរាមកំហែង។
លោក គឹម សន្តិភាព ចេញមកប្រតិកម្មខ្លាំងៗនឹងលោក សម រង្ស៊ី ដែលលើកឡើងបែបនេះ។ អ្នកនាំពាក្យក្រសួងយុត្តិធម៌ បានចាត់ទុកការចោទប្រកាន់របស់លោក សម រង្ស៊ី ថាជាការធ្វើឲ្យប៉ះពាល់យ៉ាងធ្ងន់ធ្ងរដល់ព្រះកិត្តិនាមរបស់ព្រះមហាក្សត្រ។
លើសពីនេះ ក្រសួងព្រះបរមរាជវាំង ក៏ចេញមកបំភ្លឺដែរ ដោយអះអាងថា ព្រះរាជសារនោះ គឺជាព្រះរាជសារពិត ហើយមិនត្រូវបានធ្វើឡើងក្រោមការគំរាមកំហែងរបស់ជនណាឡើយ។
ប៉ុន្តែ មកដល់ពេលនេះ អ្នកនាំពាក្យនៃអយ្យការអមសាលាបូងរាជធានីភ្នំពេញ នៅមិនទាន់ផ្តល់ព័ត៌មានដល់អ្នកកាសែតនោះទេ ថាតំណាងអយ្យការ កំពុងចាត់ការតាមសំណើរបស់រដ្ឋមន្ត្រីក្រសួងយុត្តិធម៌ ឬយ៉ាងណា៕
Tag:
ព្រះមហាក្សត្រ
សម រង្ស៊ី
អង្គ វង្សវឌ្ឍានា
គឹម សន្តិភាព
© រក្សាសិទ្ធិដោយ thmeythmey.com