រយៈពេល៨ថ្ងៃ ពលរដ្ឋជាង៧ពាន់គ្រួសារ បានរងគ្រោះ ដោយសារជំនន់ទឹកភ្លៀង

ជាតិ

រយៈពេល៨ថ្ងៃ ពលរដ្ឋជាង៧ពាន់គ្រួសារ បានរងគ្រោះ ដោយសារជំនន់ទឹកភ្លៀង

23, Jul 2018 , 5:14 pm

រូបភាព

រូបភាពពីហ្វេសប៊ុកក្រសួងធនធានទឹក

ដោយ:

ភ្នំពេញ៖ ជំនន់ទឹកភ្លៀង រយៈពេល ៨ថ្ងៃ ចាប់ពីថ្ងៃទី១៧-២៣ ខែកក្កដា បានបង្កឱ្យប្រជាពលរដ្ឋសរុប៧១០៦គ្រួសារ ក្នុងរាជធានីភ្នំពេញ និងបណ្តាខេត្តមួយចំនួន កំពត កោះកុង ព្រះសីហនុ កែប និងបាត់ដំបង ជាដើម បានទទួលរងនូវការប៉ះពាល់។ នេះបើតាមការឱ្យដឹងពីលោក កែវ វី អ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយ។

លោក កែវ វី បានប្រាប់សារព័តមានថ្មីៗថា ប្រជាពលរដ្ឋ ដែលរងការប៉ះពាល់ទាំងនោះ មានប្រជាពលរដ្ឋ ១៤១៦គ្រួសារ ត្រូវបានជម្លៀសទៅទីទួលមានសុវត្ថិភាព។ លោក បន្តថា ផ្ទះដែលរងការខូតខាត មាន៦ខ្នង សាលារៀន១០កន្លែង វត្ត១០ វិហារចាម៦ បាត់គោ១៤ក្បាល ហើយដំណាំស្រែចម្ការលិចទឹក មាន៩២១៤ហិកតា ដោយក្នុងនោះ ចំនួនដែលខូចខាត មាន ៩៦ហិកតា។

ជំនន់ទឹកភ្លៀងនេះ ក៏បានធ្វើឱ្យលិចស្ពាន៩ ដោយក្នុងនោះ ខូចខាតស្ពានឈើ២ និងស្រះចិញ្ចឹមត្រី៧។ នេះបើតាមអ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយដដែល ដោយលោក បន្ថែមថា ជំនន់ទឹកភ្លៀងដើមខែកក្កដានេះ មិនបណ្តាលឲ្យបាត់បង់ជីវិតមនុស្សទេ ទោះបីមានការខូចខាតដូចដែលបានរៀបរាប់ខាងលើក្ដី។

លោក បញ្ជាក់យ៉ាងដូច្នេះថា៖«នៅតាមស្ទឹង ឬអូរមួយចំនួន ដែលទឹកបានស្រក ក៏ឡើងវិញផងដែរ។ សម្រាប់ផ្លូវដែលបានផ្អាកធ្វើចរាចរណ៍បណ្ដោះអាសន្ន បានដាក់ឱ្យដំណើរការឡើងវិញជាប្រក្រតីហើយ។ ប៉ុន្តែផ្លូវដែលលិចទឹកបានស្រកទៅវិញ ហើយកំពុងជួសជុលជាបណ្ដើរ ដោយមន្ទីរសាធារណការនៅតាមខេត្ត។ ហើយចម្ងាយផ្លូវដែលលិចទឹកត្រូវជួសជុលប្រមាណ ៨០គីឡូម៉ែត្រ»។

បច្ចុប្បន្ន ជំនន់ទឹកទន្លេមេគង្គ មិនទាន់ឡើងដល់កម្រិត ដែលត្រូវប្រកាសឲ្យប្រុងប្រយ័ត្នទេ ប៉ុន្តែទឹកទន្លេសេសាន ខេត្តរតនគិរីកំពុងតែឡើង ៨ម៉ែត្រ ដែលត្រូវប្រកាសឱ្យប្រុងប្រយ័ត្ន៕

អត្ថបទទាក់ទង

ជំនន់ទឹកភ្លៀង បណ្ដាលឱ្យ ខេត្ត៥ និងប្រជាជនជាង ៣ពាន់គ្រួសារ រងការប៉ះពាល់ខ្លាំង