ជាតិ
សេដ្ឋកិច្ច
ហេតុផលដែលនាំឲ្យអាជីវកម្ម Startups បរាជ័យ!
× ភ្នំពេញ៖ ការបង្កើតអាជីវកម្មថ្មីថ្មោង (Startup Business) ជាប្រធានបទមួយកំពុងពេញនិយមក្នុងសម័យកាលនេះ ដោយគេសង្កេតឃើញមានបង្កើតអាជីវកម្មថ្មីជាហូរហែ តែបិទទៅវិញក៏ច្រើនដែរ។ មានកត្តាជាច្រើន ដែលស្ថាបនិក Startup គិតគូរមិនដល់ ឬខ្វះសមត្ថភាព ដែលនាំទៅដល់ការបរាជ័យ។
ការស្រាវជ្រាវជាអន្តរជាតិមួយបានរកឃើញហេតុផលសំខាន់ៗចំនួន ២០ ដែលនាំឲ្យ Startups បរាជ័យ។ ក្នុងនោះចំណុចដ៏គ្រោះថ្នាក់ជាងគេសម្រាប់ Startup គឺ ទី១/គ្មានម្រូវការទីផ្សារ ដែលមានអត្រាដល់ទៅជាង ៤០ភាគរយ។ ទី២/ អស់ទុនបង្វិល មានអត្រាដល់ទៅជិត ៣០ភាគរយ។ ទី៣/ គ្មានក្រុមការងារល្អ ដែលមានអត្រាជិត ២៥ភាគរយ។ ទី៤/ មិនអាចប្រកួតប្រជែង ដែលមានអត្រាជិត ២០ភាគរយ។ ទី៥/ បញ្ហាតម្លៃផលិតផល ឬសេវា ដែលមានអត្រាជិត ២០ភាគរយ។
លោក ង៉ែត ជូ អ្នកវិភាគសេដ្ឋកិច្ច និងជាអ្នកប្រឡូកក្នុងរបរកស៊ីមួយរូបដែរ បានលើកឡើងថា Startups បរាជ័យភាគច្រើន គឺបណ្ដាលមកពីស្ថាបនិកទាំងនោះហ៊ានប្រឡូក ទាំងខ្លួនខ្វះបទពិសោធន៍។ លោកថ្លែងដូច្នេះថា៖«អ្នកធ្វើ Startups បរាជ័យ ដោយភាគច្រើន ខ្វះបទពិសោធន៍ការងារ ហើយមិនបានសិក្សាច្បាស់លាស់ថាខ្លួនមានជំនាញអាចធ្វើបានទេ។ ពួកគាត់ចេញធ្វើអាជីវកម្មតាមគេតាមឯង ខ្វះការច្នៃប្រឌិដ្ឋ ដោយមិនបានធ្វើឲ្យផលិតផលរបស់ខ្លួនប្លែកពីគេ»។
លោកបន្ថែមថា កង្វះបទពិសោធន៍ នឹងធ្វើឲ្យម្ចាស់អាជីវកម្ម គិតគូរមិនបានដិតដល់ទៅលើផ្នែកផ្សេងៗទៀត ដូចជាបញ្ហាទុនជាដើម។
អ្នកជំនាញសេដ្ឋកិច្ចរូបនេះ បន្តថា ទោះជាសម្លឹងឃើញឱកាសភ្លាមៗ ក៏អ្នកបង្កើត Startup មិនប្រាកដថាអាចរៀបចំអាជីកវម្មរបស់ខ្លួន ដើម្បីចាប់យកឱកាស បាននោះដែរ បើខ្វះបទពិសោធន៍។
«ឱកាសមួយមុខមិនធ្វើឲ្យអាជីវកម្មជោគជ័យនោះទេ គឺត្រូវមានធាតុផ្សំរបស់វា។ ទោះឃើញឱកាស តែក៏ទាមទារសមត្ថភាពគ្រប់គ្រង ចាត់ចែង និងចេះធ្វើផែនការហិរញ្ញវត្ថុជាដើមផងដែរ»។ នេះជាការគូសបញ្ជាក់របស់លោក ង៉ែត ជូ។ លោកបន្ថែមថា៖«អ្នកពូកែ ទោះចេញធ្វើក្រោយគេ ក៏នៅតែអាចធ្វើអ្វីថ្មីពីគេ។ ឧទាហរណ៍ហាងកាហ្វេ Brown ដែលចេះច្នៃប្រឌិដ្ឋ និងអាចឈរជើងនៅលើទីផ្សារកាហ្វេដ៏ប្រកួតប្រជែងនេះបាន»។
ហេតុផលមួយផ្សេងទៀតដែលធ្វើឲ្យ Startup ដួលរលំទៅវិញ ក្នុងករណីនៅកម្ពុជា គឺការមិនបានជួយជ្រោជ្រែងពីអតិថិជន ពិសេសអ្នកស្គាល់គ្នា តែបែរជាសុំបញ្ចុះតម្លៃក្នុងគ្រាដំបូងដែលលំបាក។ លោក ប៉ិច បូឡែន អគ្គនាយកក្រុមហ៊ុន Westline Education Group បានឲ្យដឹងថា៖«ទន្ទឹមនឹងការចំណាយលើការវិនិយោគច្រើន ចំណាយលើការផ្សព្វផ្សាយដើម្បីកសាងគុណភាព និងទំនុកចិត្ត អតិថិជនជាច្រើនរំពឹងចង់បានការបញ្ចុះតម្លៃច្រើន ឬឥតគិតថ្លៃតែម្ដង ទាំងខ្លួនមានលទ្ធភាព»។
លោកបន្តថា៖«សូម្បីតែមិត្តភក្ដិស្និទ្ធស្នាលមួយចំនួនក៏ចាំមើលសិន តើគួរទុកចិត្តឬទេ ដោយមិនទាន់មកទិញនោះទេ»។ លោកទទូចឲ្យមានការលើកទឹកចិត្ត ជួយជ្រោមជ្រែងអាជីវកម្មថ្មីថ្មោង ដោយកុំទាន់សុំបញ្ចុះតម្លៃ ដើម្បីឲ្យអាជីវកម្មនោះដំណើរការល្អសិន៕
© រក្សាសិទ្ធិដោយ thmeythmey.com