ជាតិ
សម្ដេច ហ៊ុន សែន៖ ខ្ញុំចង់ប្រើប្រាស់អាណត្តិទី៦ ប្រមូលធនធានខួរក្បាល អភិវឌ្ឍជាតិ
× សម្ដេច ហ៊ុន សែន នឹងពិនិត្យមើលសមត្ថភាពមន្ត្រីគណបក្សនយោបាយដទៃ ដែលមិនជាប់ឆ្នោត ធ្វើជាទីប្រឹក្សា រដ្ឋលេខាធិការ និងអនុរដ្ឋលេខាធិការនៅតាមក្រសួងនានា។ មូលហេតុដែលប្រមុខរដ្ឋាភិបាល គ្រោងរៀបចំបែបនេះ ព្រោះតែចង់ប្រមូលធនធានមានសមត្ថភាព អភិវឌ្ឍប្រទេស។ នេះជាការបង្ហើបរបស់សម្ដេច ហ៊ុន សែន នៅក្នុងពិធីជួបសំណេះសំណាលជាមួយកម្មកររោងចក្រ នៅសង្កាត់ឃ្មួញ ខណ្ឌសែនសុខ រាជធានីភ្នំពេញ នៅព្រឹកនេះ។
ការដាក់បញ្ចូលមន្ត្រីសមត្ថភាពពីគណបក្សដទៃ ដែលមិនជាប់ឆ្នោតនេះ គឺដើម្បីឲ្យពួកគេចូលរួមជួយបម្រើការងារឲ្យបានល្អ ជាមួយរដ្ឋាភិបាល ក៏ដូចជាការផ្ដល់គំនិតយោបល់ជាដើម។ ប៉ុន្តែមន្ត្រីក្រៅពីគណបក្សប្រជាជននេះ មិនអាចអនុវត្តការងារ ផ្ទុយពីគោលនយោបាយរបស់រដ្ឋាភិបាលឡើយ។
ក្រៅពីប្រមូលអ្នកមានសមត្ថភាពបម្រើការងារ នៅក្នុងជួររដ្ឋាភិបាលហើយ សម្ដេច ហ៊ុន សែន ក៏ចង់ប្រើប្រាស់ពេលវេលាក្នុងអាណត្តិទី៦នេះ បម្រើពលរដ្ឋឲ្យអស់ពីចិត្ត តាមរយៈការប្រើប្រាស់ធនធានដែលមានទាំងប្រាជ្ញា និងទ្រព្យសម្បត្តិ សង្វាតដោះស្រាយបញ្ហាពលរដ្ឋ។ ប្រមុខរដ្ឋាភិបាល បានកំណត់យកពេលវេលាក្នុងអាណត្តិទី៦នេះ គឺជាពេលវេលាដែលត្រូវប្រមូលធនធានមានសមត្ថភាព មកអភិវឌ្ឍប្រទេសជាតិ។
សូមស្ដាប់ប្រសាសន៍ប្រមុខរដ្ឋាភិបាល ក្នុងពិធីជួបសំណេះសំណាលជាមួយកម្មកររោងចក្រ នៅថ្ងៃទី១៥ សីហានេះ៖
ជាមួយគ្នានេះសម្ដេច ហ៊ុន សែន បានបញ្ជាក់ពីបំណងបង្កើតវេទិកាពិភាក្សាជាមួយបណ្ដាភាគីគណបក្សនយោបាយ ដែលមិនជាប់ឆ្នោតទាំងនោះ ដើម្បីទទួលយកគំនិតល្អៗរបស់ពួកគេ ក្នុងការដោះស្រាយបញ្ហាពលរដ្ឋ និងប្រទេសជាតិផង។ បើតាមប្រមុខរដ្ឋាភិបាល ការរៀបចំវេទិកានេះ វាជាឱកាសឲ្យគណបក្សនយោបាយ ដែលមិនជាប់ឆ្នោតនេះ កសាងកិត្តិយសខ្លួន សម្រាប់ការបោះឆ្នោតនៅអាណត្តិខាងមុខទៀតផងដែរ។
វេទិកាពិភាក្សាគ្នានេះ រដ្ឋាភិបាល នឹងបើកចំហឲ្យគណបក្សនយោបាយ ដែលមិនជាប់ឆ្នោតទាំងនោះ មានសិទ្ធិរិះគន់លើគោលនយោបាយរបស់រដ្ឋាភិបាល ដែលអនុវត្តការងារមិនល្អ និងជួយដោះស្រាយចំណុចខ្វះខាតនានា តាមរយៈការពិនិត្យលើយន្តការក្នុងសេចក្តីព្រាងច្បាប់ជាដើម។ ការរៀបចំបែបនេះ វានឹងជួយរំឭកដល់ការងាររដ្ឋាភិបាល ឲ្យអនុវត្តការងារត្រឹមត្រូវតាមការសន្យាខ្លួន ពោលគឺកុំឲ្យរដ្ឋាភិបាល ជិះសេះលែងដៃ ហើយទុកពលរដ្ឋរងទុក្ខលំបាក។ នេះបើតាមសម្ដេច ហ៊ុន សែន ដែលគ្រោងជួបជាមួយមេបក្សនយោបាយដទៃ នៅមុនបង្កើតគណៈរដ្ឋមន្ត្រីអាណត្តិទី៦។
ការលើកឡើងរបស់ប្រមុខរដ្ឋាភិបាលនេះ គឺជាគំនិតមួយល្អ ដែលទទួលបានការគាំទ្រពីថ្នាក់ដឹកនាំគណបក្ស ដែលចូលរួមបោះឆ្នោតអាណត្តិទី៦នេះ។ មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន លោក យ៉ង សាំងកុមារ បាននិយាយថា វេទិកាពិគ្រោះយោបល់ជាមួយអ្នកនយោបាយនេះ នឹងផ្តល់ឱកាសឲ្យខ្លួន អាចមានលទ្ធភាពយកចំណុចខ្វះខាតរបស់រដ្ឋាភិបាលកន្លងមក ទៅបង្ហាញនិងផ្ដល់គំនិតដោះស្រាយជូនសម្ដេច ហ៊ុន សែន។
«វេទិកានេះ វាជារឿងមួយល្អ ដែលស្របតាមគោលនយោបាយបង្រួបប្រួមជាតិរបស់គណបក្សយើង ក្នុងការជួយដោះស្រាយបញ្ហាជាតិ ហើយយើងត្រៀមខ្លួនរួចជាស្រេច ក្នុងការជួបនឹងផ្ដល់យោបល់លើការដោះស្រាយបញ្ហាជាតិ»។ នេះជាការបញ្ជាក់របស់លោក យ៉ង សាំងកុមារ ។
សម្រាប់លោក ពេជ្រ ស្រស់ ប្រធានគណបក្សយុវជនកម្ពុជា ចាត់ទុកការសម្រេចរបស់រដ្ឋាភិបាលនេះ គឺជារបត់នយោបាយមួយ ក្នុងដំណើររួមគ្នាអភិវឌ្ឍជាតិ រវាងគណបក្សកាន់អំណាច និងគណបក្សក្រៅរដ្ឋាភិបាល។ ប្រធានគណបក្សរូបនេះ បានបញ្ជាក់ដូច្នេះថា៖«វាជាព័ត៌មានមួយដែលគួរឲ្យចាប់អារម្មណ៍ ហើយក៏ជារបត់នយោបាយថ្មីមួយសម្រាប់កម្ពុជា ដែលផ្ដល់ឱកាសឲ្យគណបក្សដែលមិនឈ្នះឆ្នោតបានពាំនាំ នូវអ្វីដែលគេដឹង ទៅប្រមុខរដ្ឋាភិបាលឲ្យបានដឹង ក្នុងការចូលរួមដោះស្រាយបញ្ហាជាតិមួយចំនួន ក្នុងការដោះស្រាយបញ្ហាពលរដ្ឋនៅក្នុងភាពជាក់ស្ដែងផងដែរ។ ខ្ញុំគាំទ្រចំពោះការជួបជុំជាមួយគណបក្សនយោបាយទាំងអស់ ដើម្បីឲ្យពួកគាត់មានឱកាស និងលទ្ធភាពបញ្ចេញមតិ និងការរិះគន់ត្រង់ចំទៅមេដឹកនាំប្រទេស។ វាជាសញ្ញាល្អសម្រាប់ប្រទេសកម្ពុជាយើង ដែលមានវេទិកានេះ ដើម្បីឲ្យអ្នកនយោបាយយល់គ្នាផង»។
បើតាមលោក ពេជ្រ ស្រស់ ការផ្ដល់តួនាទីពីរដ្ឋាភិបាល ឲ្យបម្រើការងារនៅតាមក្រសួងនានា ក៏ជាឱកាសល្អមួយ សម្រាប់អ្នកនយោបាយពិចារណាផងដែរ៕
Tag:
ហ៊ុន សែន
យ៉ង សាំងកុមារ
ពេជ្រ ស្រស់
បោះឆ្នោត
© រក្សាសិទ្ធិដោយ thmeythmey.com