ក្រុមហ៊ុន តូយ៉ូតា រៀបចំការប្រគំតន្ត្រីសប្បុរសធម៌ តូយ៉ូតាក្លាស៊ិកលើកទី៦ នៅខែវិច្ឆិកាខាងមុខ

អត្ថបទពាណិជ្ជកម្ម

ក្រុមហ៊ុន តូយ៉ូតា រៀបចំការប្រគំតន្ត្រីសប្បុរសធម៌ តូយ៉ូតាក្លាស៊ិកលើកទី៦ នៅខែវិច្ឆិកាខាងមុខ

08, Sep 2018 , 2:18 pm

រូបភាព

ដោយ: ថ្មីៗ

ភ្នំពេញ៖ ក្រុមហ៊ុន តូយ៉ូតា (ខេមបូឌា) ដែលជាក្រុមហ៊ុនទទួលសិទ្ធិនាំចូល និងចែកចាយផ្ដាច់មុខ ផលិតផលយានយន្ត និងគ្រឿងបន្លាស់ម៉ាកតូយ៉ូតា បានប្រកាសពីការមកដល់ឆាប់ៗខាងមុខនេះព្រឹត្តិការណ៍ប្រគំតន្ត្រីសប្បុរសធម៌ តូយ៉ូតា ក្លាស៊ិកលើកទី២៩ និងជាលើកទី៦នៅកម្ពុជា។ក្នុងសន្និសីទសារព័ត៌មាន កាលពីថ្ងៃសុក្រ ទី៧ ខែកញ្ញាកន្លងទៅ លោក ឧកញ៉ា គង់ នួន ប្រធានក្រុមហ៊ុន តូយ៉ូតា (ខេមបូឌា) បានបញ្ជាក់ថា តន្ត្រីសប្បុរសធម៌ តូយ៉ូតា ក្លាស៊ិក ដែលនឹងប្រារព្ធឡើងនៅម៉ៅង៦កន្លះល្ងាច ថ្ងៃសៅរ៍ ទី៣ ខែវិច្ឆិកា ឆ្នាំ២០១៨ នាសាលសន្និសីទចតុមុខ។

លោក ឧកញ៉ា បានបញ្ជាក់ថា៖«នេះជាមោទនភាព និងកិត្តិយសដ៏ឧដុង្គឧត្តមសម្រាប់ក្រុមហ៊ុម តូយ៉ូតា (ខេមបូឌា) ក្នុងការនាំមកជូននូវតន្ត្រីសប្បុរសធម៌ តូយ៉ូតា ក្លាស៊ិក ដែលនឹងផ្ដល់ជូននូវផ្ទាំងទស្សនីយភាពកម្សាន្តអារម្មណ៍ ក៏ដូចជាបម្រើដល់សកម្មភាពសប្បុរសធម៌ នៅក្នុងសង្គមផង»។

បើតាមប្រធានក្រុមហ៊ុន តូយ៉ូតា (ខេមបូឌា) ព្រឹត្តិការណ៍ប្រគំតន្ត្រីសប្បុរសធម៌ តូយ៉ូតា ក្លាស៊ិក នឹងនាំយកជូននូវក្រុមតន្ត្រីដ៏ល្បីល្បាញមួយ មកពីទីក្រុងឡុងដ៏ ចក្រភពអង់គ្លេស គឺក្រុម Orchestra of the Age of Enlightenment ក្រោមការដឹកនាំរបស់លោក Steven Devine។ ជាមួយគ្នានោះ ក៏នឹងមានទស្សនីយភាពចាប៉ីដងវែង ដែលជាសម្បត្តិបេតិភណ្ឌដ៏មានតម្លៃ ពីក្រុមតន្ត្រីបុរាណ និងតារាចម្រៀង កញ្ញា ចំរើន សុភ័ក្ក្រផងដែរ ដោយនឹងលើកឡើងបទចម្រៀងចំនួន២បទ ដើម្បីឆ្លុះបញ្ចាំងពីប្រទេសកម្ពុជា និប្រពៃណីរបស់យើង គឺបទ៖ ឱ! ផ្ទៃស្រុកខ្មែរ និងសារិកាកែវអើយ មកបំពេអារម្មណ៍អ្នកទស្សនា។

បន្ថែមពីនេះ ក្រុមហ៊ុន តូយ៉ូតា ក៏បានផ្ដួចផ្ដើមនូវគម្រោងថ្មីមួយទៀត ឈ្មោះថា«Start Your Impossible» ដែលបានដាក់ដំណើរការចាប់តាំងពីខែតុលា ឆ្នាំ២០១៧ ក្នុងបំណងរួមចំណែកផ្លាស់ប្ដូរ និងលើកស្ទួយជីវភាពរស់នៅរបស់មនុស្សជាតិ ឲ្យកាន់តែមានភាពងាយស្រួល។

ជាក់ស្ដែងក្រុមហ៊ុន តូយ៉ូតា (ខេមបូឌា) នឹងរៀបចំឲ្យមាននូវកាចែករំលែកចំណេះដឹង និងបទពិសោធន៍តូរ្យតន្ត្រី របស់ក្រុម Orchestra of the Age of Englishtenent ដោយផ្ទាល់ ទៅកាន់សិស្ស-និស្សិត នៃសកលវិទ្យាល័យភូមិន្ទវិចិត្រសិល្បៈ ក្នុងខែវិឆ្ឆិកាខាងមុខនេះផងដែរ ដើម្បីឲ្យពួកគាត់ អាចមានឱកាសសម្ដែង នៅលើឆាកអន្តរជាតិនាពេលអនាគត។

គួររំលឹកថា ក្រុមហ៊ុន តូយ៉ូតា (ខេមបូឌា) បានប្រារព្ធតន្ត្រីសប្បុរសធម៌ តូយ៉ូតាក្លាស៊ិក ជាលើកដំបូង នៅក្នុងឆ្នាំ២០១៣។ គិតត្រឹមឆ្នាំ២០១៧ ថវិកាសប្បុរសធម៌ដែលប្រមូលបានពីការលក់សំបុត្រ និងការឧបត្ថម្ភពីសំណាក់ក្រុមហ៊ុន មានចំនួន ១៦៦,២០១ ដុល្លារសហរដ្ឋអាមេរិក។ កាប្រគំតន្ត្រី តូយ៉ូតា ក្លាស៊ិក ក្នុងឆ្នាំនេះ នឹងមានចូលរួមសម្ដែងពីបណ្ដាលប្រទេសចំនួន ៧ ក្នុងតំបន់អាស៊ី ដូចជាប្រទេសប្រ៊ុយណេ ថៃ ឡាវ កម្ពុជា ហ្វីលីពីន ម៉ាឡេស៊ី និងប្រទេសវៀតណាម។ រាល់ថវិកាដែលទទួលបានពីការលក់សំបុត្រចូលទស្សនាការប្រគំតន្ត្រីនេះ ក្រុមហ៊ុន តូយ៉ូតា (ខេមបូឌា) នឹងបរិច្ចាគជាមូលនិធិសប្បុរសធម៌ជូនដល់មន្ទីរពេទ្យគន្ធបុប្ផា។ ចំណែក ថវិកាមួយចំណែកទៀត នឹងបរិច្ចាគទៅមន្ទីរពេទ្យកុមារអង្គរក្នុងខេត្តសៀមរាប ដែលមិនត្រឹមតែជាមន្ទីរពេទ្យសប្បុរសធម៌ ផ្តល់សេវាព្យាបាលកុមាររាប់រយនាក់ជារៀងរាល់ថ្ងៃប៉ុណ្ណោះទេ ប៉ុន្តែក៏ជាមន្ទីរពេទ្យដែលផ្ដល់នូវការបណ្ដុះបណ្ដាល និងសេវាអប់រំ លើតំហែទាំសុខភាពជូនដល់អ្នកជំងឺ អាណាព្យាបាល និងសហគមន៍ទាំងមូលដែរ។

កញ្ញា ចំរើន សុភ័ក្ត្រ ដែលជាអ្នកចម្រៀងផ្នែកបុរាណ និងសម័យ បានថ្លែងថា កញ្ញាពិតជាមានសេចក្ដីរំភើប និងរីករាយយ៉ាងខ្លាំង ដែលក្រុមហ៊ុន តូយ៉ូតា (ខេមបូឌា) បានផ្ដល់កិត្តិយស អញ្ជើញឲ្យចូលរួមសម្ដែងជាមួយក្រុមតន្ត្រីដ៏ល្បី មកពីទីក្រុងឡុងដ៏ នាខែវិឆ្ឆិកាខាងមុខ ក្នុងនាមជាសិល្បៈការិនីកម្ពុជា។ បើតាមកញ្ញា ចំរើន សុភ័ក្ត្រ នៅក្នុងការប្រគំតន្ត្រីនេះ កញ្ញាព្រមទាំងក្រុមសិល្បករ នឹងលើកឡើងនូវបទចម្រៀងដែលប្រគំភ្លេងដោយឧបករណ៍តន្ត្រីខ្មែរ គឺស្គរ និងចាប៉ីដងវែងដែលត្រូវបានចុះបញ្ចីបេតិកភណ្ឌវប្បធម៌ អរូបីនៃមនុស្សជាតិរួចហើយនោះ។ «នេះជាឱកាសដ៏វិសេសវិសាល និងមោទកភាពជាតិមួយ ដែលចាប៉ីដងវែងរបស់ខ្មែរ អាចបង្ហាញខ្លួន និងសំឡេង អមជាមួយនឹងក្រុមតន្ត្រីបរទេស»។ នេះជាការបន្ថែមរបស់កញ្ញា ចំរើន សុភ័ក្ត្រ រួចបន្តដោយបានអំពាវនាវ និងគោរពអញ្ជើញសាធារណជនទាំងអស់ទិញសំបុត្រចូលទស្សនាការប្រគំតន្ត្រីនេះ ក៏ដូចជាគាំទ្រឲ្យបានច្រើន ដើម្បីរួមចំណែកក្នុងកម្មវិធីសប្បុរសធម៌ជួយសង្គ្រោះជីវិតកុមារកម្ពុជារាប់លាននាក់ ដែលកំពុងតែរងគ្រោះ។

សំបុត្រចូលរួមទស្សនាការប្រគំតន្ត្រីនេះ មានដាក់លក់ចាប់ពីថ្ងៃទី ១០ខែកញ្ញា ឆ្នាំ២០១៨តទៅនៅគ្រប់សាខាក្រុមហ៊ុន តូយ៉ូតា (ខេមបូឌា) ក្នុងទីក្រុងភ្នំពេញ ខេត្តបាត់ដំបង និងខេត្តសៀមរាប និងនៅMonument Books សាខាព្រះនរោត្តម។ សំបុត្រមួយសន្លឹក មានតម្លៃ៣៥ដុល្លារសហរដ្ឋអាមេរិក។