កាលពីថ្ងៃទី៨ ខែកញ្ញា BNI Cambodia បានរៀបចំព្រឹត្តិការណ៍មហាសន្និបាតដ៏ធំប្រចាំឆ្នាំ២០១៨ និងបង្ហាញពីភាពរីកចម្រើននៅក្នុងទីផ្សារប្រទេសកម្ពុជា ជាមួយអាត្រាចំណូលរបស់ខ្លួន រហូតដល់៦៣លានដុល្លារ ក្នុងរយៈពេល៥ឆ្នាំ ពោលចាប់តាំង២០១៣ រហូតដល់២០១៨ នេះ។ មហាសិន្និបាតប្រចាំឆ្នាំលើកទី៣នេះ រៀបចំនៅសណ្ឋាគារសុខា រាជធានីភ្នំពេញ មានការអញ្ជើញចូលរួមពី លោក ហុង សុខហួរ អគ្គនាយកផ្សារមូលបត្រកម្ពុជា និងភ្ញៀវកត្តិយសជាច្រើនពីសមាជិករបស់ BNI Cambodia ទាំងអស់គ្នា និងតំណាងសហគ្រាសធុនតូច និងមធ្យមជាច្រើន។
កម្មវិធីនេះបង្កើតឡើងក្នុងគោលបំណងឲ្យសមាជិកទាំងអស់បានជួបជុំគ្នា និងស្គាល់គ្នា ក៏ដូចជាដើម្បីពង្រីកទំនាក់ទំនង ពង្រីកឱកាសអាជីវកម្ម និងបង្កើនមិត្តភាពផងដែរ។ លើសពីនេះ មហាសន្និបាតនេះ ក៏ជាឱកាសពិសេសបំផុតដើម្បីរៀនសូត្រ ពីគន្លឹះ និងទ្រឹស្តីធ្វើយ៉ាងណាឲ្យអាជីវកម្មរបស់លោកអ្នក កាន់តែមានភាពជោគជ័យបន្ថែមទៀត។
លោក ឡុក សាមឌី នាយកប្រតិបត្តិរបស់ក្រុមហ៊ុន BNI Cambodia បានថ្លែងថារយៈពេល៥ឆ្នាំមកនេះ BNI Cambodia រកចំណូលបានជាង៦៣លានដុល្លារ និងមានសមាជិកជិត៥០០នាក់។ បើតាម លោក ឡុក សាមឌី មានចក្ខុវិស័យបង្កើនសមាជិកឲ្យដល់ជិត១០០០នាក់នៅឆ្នាំ២០១៩ ហើយនៅឆ្នាំ២០២០ និងមានសមាជិក១៥០០នាក់។
លោក ហុង សុខហួរ អគ្គនាយកផ្សារមូលបត្រកម្ពុជា បានបង្ហើបពីគន្លះផ្សេងៗក្នុងការធ្វើឲ្យអាជីវកម្មកាន់តែរីកចម្រើនទៅមុខដោយប្រើប្រាស់លុយរបស់អ្នកដទៃ ដើម្បីពង្រីកអាជីវកម្ម។ បើតាម លោក ហុង សុខហួរ ផ្សារមូលបត្របានចាប់ផ្តើមដំណើរការអស់រយៈពេល៦ឆ្នាំមកហើយ មានក្រុមហ៊ុនចុះបញ្ជីចំនួន៥ ហើយនៅដំណាច់ឆ្នាំនេះ មានក្រុមហ៊ុនចុះបញ្ជីថែម២ទៀត។ លោក ហុង សុខហួរ បញ្ជាក់ថា៖«ផ្សារមូលបត្របានចាប់ផ្តើមដំណើរការយូរហើយ ហេតុអ្វីក្រុមហ៊ុនចុះបញ្ជីតិច?អាចមានមូលហេតុច្រើន និងមានមូលហេតុមួយក្នុងចំណោមនេះ គឺម្ចាស់សហគ្រិន ម្ចាស់សហគ្រាស ម្ចាស់អាជីវកម្មនៅក្នុងស្រុកនៅមិនទាន់យល់អំពីចំណុចមួយ ដែលធ្វើឱ្យអាជីវកម្មនៅបរទេសរីកចម្រើនខ្លាំង។ ចំណែកយើងរីកចម្រើនយឺត គឺប្រើប្រាស់លុយរបស់អ្នកដទៃ ដើម្បីពង្រីកអាជីវកម្ម»។
BNI បានចូលមកក្នុងប្រទេសកម្ពុជាចាប់តាំងពីឆ្នាំ២០១៣មក ពោលគឺ៥ឆ្នាំមកហើយ។ គោលដៅចម្បងរបស់ BNI គឺជួយសមាជិករបស់ខ្លួនដែលជាម្ចាស់អាជីវកម្ម ពង្រីកអាជីវកម្មតាមប្រព័ន្ធ BNI ។ ពេលចូលរួមជា សមាជិករបស់ BNI និងទទួលបានអត្ថប្រយោជន៍ចំនួន៥យ៉ាងរួមមាន៖
១. ក្រុមទីផ្សារដ៏ធំ។
២. បានសិទ្ធិផ្តាច់មុខនៅក្នុងក្រុមរបស់គាត់។
៣. ប្រភពអតិថិជនជាប្រចាំ។
៤. វគ្គបណ្តុះបណ្តាល និងចែករំលែកបទពិសោធន៍ ធ្វើយ៉ាងណាដើម្បីម្ចាស់អាជីវកម្មមានការ រីកចម្រើនកាន់តែខ្លាំង ថែមទៀត។
៥. ទំនាក់ទំនងយូរអង្វែង។
(អត្ថបទពាណិជ្ជកម្ម)