ជាតិ
សាលារាជធានីភ្នំពេញ រៀបចំប្រកួតរចនាម៉ូតខ្លោងរបារកាត់ទទឹងផ្លូវអបអរបុណ្យអុំទូក
× ភ្នំពេញ៖ ដើម្បីអបអរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកនាពេលខាងមុខនេះ រដ្ឋបាលរាជធានីភ្នំពេញ នឹងរៀបចំការប្រកួតរចនាម៉ូតខ្លោងរបារកាត់ទទឹងផ្លូវ។ ការប្រកួតនេះ ផ្ដល់ឱកាសដល់បងប្អូនអ្នកជំនាញខាងរចនា ជាពិសេសសិស្សនិស្សិតឲ្យបានចូលរួមបង្ហាញស្នាដៃរបស់ខ្លួន។ ការប្រកួតរចនានេះ ផ្ដោតលើភាពស្រស់ស្អាត និងរចនាប័ទ្មរបស់ខ្លួន។
បើតាមទំព័រហ្វេសប៊ុកផ្លូវការរបស់រដ្ឋបាលរាជធានីភ្នំពេញ កាលពីថ្ងៃទី ១៣ តុលា រដ្ឋបាលរាជធានីភ្នំពេញ នឹងរៀបចំការប្រកួតរចនាម៉ូតខ្លោងរបារកាត់ទទឹងផ្លូវ ដើម្បីអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០១៨។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញ បានប្រាប់សារព័ត៌មានថ្មីៗ តាមទូរសព្ទថា ការរៀបចំប្រកួតនេះ គឺដើម្បីផ្ដល់ឱកាសដល់ អ្នកជំនាញខាងរចនាទាំងអស់ ជាពិសេសសិស្ស និស្សិត ដែលសិក្សានៅសាកលវិទ្យាល័យភូមិន្ទវិចិត្រសិល្បៈ ក្នុងការបង្ហាញស្នាដៃរបស់ខ្លួន។
បើតាមអ្នកនាំពាក្យសាលារាជធានីភ្នំពេញ ការរចនាខ្លោងរបារកាត់ទទឹងផ្លូវនេះ ផ្ដោតលើសោភណភាពស្រស់ស្អាត រួមទាំងការបង្កប់ទៅដោយរចនាប័ទ្មខ្មែរ។ បន្លែមលើនេះ ខ្លឹមសារអក្សរ នៅលើខ្លោងរបារគឺ «អបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក, ថ្ងៃពុធ ១៤កើត ព្រហស្បតិ៍ ១៥កើត និងសុក្រ ១រោច ខែកត្តិក ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១ ២២ និង២៣ ខែវិច្ឆិកា ឆ្នាំ២០១៨»។
បេក្ខជនដែលមានចំណាប់អារម្មណ៍អាចផ្ញើស្នាដៃរបស់ខ្លួនចាប់ពីថ្ងៃជូនដំណឹងនេះ រហូតដល់ថ្ងៃទី២២ ខែតុលា ឆ្នាំ២០១៨។ ស្នាដៃរបស់បេក្ខជន ដែលទទួលបានការគាំទ្រច្រើនជាងគេ តាមរយៈការចុច Like នឹងទទួលបានរង្វាន់លើកទឹកចិត្ត រួមទាំងដាក់ដំឡើងស្នាដៃរបស់បេក្ខជន នៅតាមទីតាំងដែលបានត្រៀមទុក។
សូមបញ្ជាក់ថា ទីតាំងចំនួន ៤ នឹងមានការដំឡើងរួមមាន របារកាត់ទទឹងមហាវិថីព្រះនរោត្តមមុខវិមានឯករាជ្យ, របារកាត់ទទឹងមុខនាឡិការមណីយដ្ឋានវត្តភ្នំ, របារកាត់ទទឹងវិថីព្រះសីហនុចំណុចខាងលិចរង្វង់មូលសម្ដេចជួនណាត និងរបារកាត់ទទឹងតិរវិថីព្រះស៊ីសុវត្ថិចំណុចសួនព្រះគន្លុង។ នេះបើតាមទំព័រហ្វេសប៊ុករដ្ឋបាលរាជធានីភ្នំពេញដដែល៕
Tag:
អុំទូក
របារ
ប្រកួត
© រក្សាសិទ្ធិដោយ thmeythmey.com