ជាតិ
សិល្បករនិងអ្នកបម្រើការក្នុងវិស័យសិល្បៈ មានឱកាសទទួលបានមូលនិធិ«ដាំដុះ»
× ភ្នំពេញ៖ គម្រោង”ដាំដុះ” គឺជាគម្រោងមួយរបស់អង្គការសិល្បៈខ្មែរអមតៈ ដែលបង្កើតឡើងដើម្បីជួយសិល្បករ និងអ្នកបម្រើការងារក្នុងវិស័យសិល្បៈនិងវប្បធម៌ ក្នុងការអភិវឌ្ឍគម្រោងច្នៃប្រឌិតថ្មី និងការបង្កើនជំនាញរបស់ពួកគេ។
គម្រោងមូលនិធិនេះ មានគោលដៅ រួមចំណែកដើម្បីបង្កើនឱកាសដល់សហគមន៍សិល្បៈ ក្នុងការបង្កើតការងារ ស្នាដៃថ្មី ព្រមទាំងបង្កើតគម្រោង បណ្ដាញ និងចំណេះដឹងថ្មី។ការរំពឹងទុករបស់ មូលនិធិ “ដាំដុះ” ក្នុងយុទ្ធសាស្ត្ររយៈពេល៥ឆ្នាំ(២០១៧-២០២១) គឺចង់ទទួលបានការអភិវឌ្ឍភាពច្នៃប្រឌិត ការតស៊ូមតិ និងការបង្កើតថ្មីផងដែរ។ នេះបើតាមអង្គការសិល្បៈខ្មែរអមតៈ។
មូលនិធិ”ដាំដុះ” បែងចែកជាពីរប្រភេទ គឺមូលនិធិដាំដុះសម្រាប់គម្រោង និងមូលនិធិដាំដុះចល័ត។ មូលនិធិដាំដុះសម្រាប់គម្រោង គឺសម្រាប់គម្រោងសិល្បៈច្នៃប្រឌិត គម្រោងសិល្បៈសហគមន៍ គម្រោងសិល្បៈស្រាវជ្រាវពីសិល្បៈ និងវប្បធម៌នៅកម្ពុជា។ ចំណែកមូលនិធិចល័តវិញ ប្រើសម្រាប់ចូលរួមកម្មវិធីទាក់ទងនឹងសិល្បៈ និងវប្បធម៌ ដូចជាសិក្ខាសាលា សន្និសីទ ការធ្វើនិវាសនដ្ឋាន វគ្គបណ្ដុះបណ្ដាល និងបេសកកម្មស្រាវជ្រាវទាំងក្នុងនិងក្រៅប្រទេស។
បេក្ខជនដែលមានបំណងចង់បានមូលនិធិ”ដាំដុះ” ដើម្បីអភិវឌ្ឍន៍គម្រោងរបស់ខ្លួន ពួកគេត្រូវតែពលរដ្ឋកំពុងរស់នៅក្នុងប្រទេសកម្ពុជា និងមានអត្តសញ្ញណប័ណ្ណសញ្ជាតិកម្ពុជា លិខិតឆ្លងដែន ឬទិដ្ឋាការ (K Visa)។
មូលនិធិ”ដាំដុះ” មិនប្រកាន់ វ័យ ភេទ ពិការភាព ជនជាតិដើមភាគតិច និងស្ថានភាពគ្រួសារឡើយ។ មូលនិធិនេះលើកទឹកចិត្តដល់បេក្ខជនដែលមកពីសហគមន៍ ដែលមានសំឡេងភាគតិច។
Tag:
សិល្បៈ
វប្បធម៌
តន្ត្រី
គម្រោងដាំដុះ
© រក្សាសិទ្ធិដោយ thmeythmey.com