ជាតិ
កងទ័ពមួកខៀវកម្ពុជា នៅម៉ាលីរងការវាយប្រហារពីពួកឧទ្ទាម ប៉ុន្តែមិនមានគ្រោះថ្នាក់ដល់ជីវិតទេ
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បាននិយាយថា កងកម្លាំងរក្សាសន្តិភាពរបស់អង្គការសហប្រជាជាតិ ដែលបោះជំរុំនៅប្រទេសម៉ាលី បានរងការវាយប្រហារពីក្រុមពួកឧទ្ទាមកាលពីពេលថ្មីៗនេះ ដែលបង្ករឲ្យមានអ្នកស្លាប់២នាក់ និងរបួស៥នាក់។ ប៉ុន្តែកងទ័ពមួកខៀវកម្ពុជា មិនរងគ្រោះថ្នាក់ដល់ជីវិតនោះទេ។
ថ្លែងក្នុងពិធីជួបសំណេះសំណាលជាមួយកម្មកររោងចក្រជាង៦ពាន់នាក់ នៅស្រុកមុខកំពូល ខេត្តកណ្ដាលព្រឹកនេះ សម្ដេច ហ៊ុន សែន បាននិយាយថា ក្រុមពួកឧទ្ទាមបានវាយប្រហារយ៉ាងធ្ងន់ធ្ងរ ទៅលើបន្ទាយក្រុមកងកម្លាំងរក្សាសន្តិភាព ដោយពួកឧទ្ទាមប្រើប្រាស់រថយន្ត (Pick up) ៨គ្រឿង មកឡោមព័ទ្ធជំរុំ ហើយរថយន្ត២គ្រឿង បានចូលវាយប្រហារបែបអត្តឃាត ទៅលើបន្ទាយកងទ័ពអង្គការសហប្រជាជាតិ ដែលក្នុងនោះមានកងទ័ពមួកខៀវកម្ពុជារស់នៅ។
តាមយៈការវាយប្រហារនេះ វាមិនបានបង្ករឲ្យកងទ័ពមួកខៀវកម្ពុជា រងរបួស ឬបាត់បង់ជីវិតនោះទេ ពោលគឺមានតែកងទ័ពរបស់បួគីណាហ្វាសូស្លាប់២នាក់ និងរបួស៥នាក់។ នេះបើតាមសម្ដេច ហ៊ុន សែន ដែលបានបន្ថែមថា ការវាយប្រហារនេះ ត្រូវបានកងកម្លាំងអង្គការសហប្រជាជាតិអន្តរាគមន៍ទាន់ពេលវេលា ទើបធ្វើឲ្យស្ថានការណ៍បានធូរស្រាលវិញ។
ទោះជាមានករណីបែបនេះកើតឡើងក្តី ក៏សម្ដេច ហ៊ុន សែន នៅតែបញ្ជាក់ជំហរថា កម្ពុជានឹងបញ្ជូនកងកម្លាំងមួកខៀវបន្ថែមទៀត ទៅប្រតិបត្តិការរក្សាសន្តិសុខក្រោមឆ័ត្រអង្គការសហប្រជាជាតិ នៅគ្រប់ប្រទេសទាំងអស់ ដែលត្រូវការជំនួយកងទ័ពពីកម្ពុជា។
គួរបញ្ជាក់ថា កងរក្សាសន្តិភាពកម្ពុជា៤នាក់បានស្លាប់ និងម្នាក់របួស នៅក្នុងការវាយប្រហាររបស់ពួកឧទ្ទាម Anti-Balaka ដែលបានពួនស្ទាក់វាយប្រហារទៅលើក្បួនកងកម្លាំងរក្សាសន្តិសុខនៃអង្គការសហប្រជាជាតិនៅប្រទេសអាហ្វ្រិកកណ្តាល កាលពីថ្ងៃទី៨ខែឧសភា ឆ្នាំ២០១៧ កន្លងមក ។ ការវាយប្រហារនោះ ក៏បានបង្ករឲ្យកងកម្លាំងម៉ារុករបួសធ្ងន់ ស្រាល៥នាក់ និងស្លាប់ម្នាក់ផងដែរ។
ប្រទេសអាហ្វ្រិកកណ្ដាល និងប្រទេសម៉ាលី គឺជាទីតាំងដែលកងកម្លាំងរក្សាសន្តិភាព ងាយរងការវាយប្រហារពីក្រុមពួកឧទ្ទាមជាងតំបន់ផ្សេងៗទៀត។ នេះជាការបញ្ជាក់របស់សម្ដេច ហ៊ុន សែន៕
Tag:
ហ៊ុន សែន
មួកខៀវ
UN
© រក្សាសិទ្ធិដោយ thmeythmey.com