ជាតិ
ចិន ផ្ដល់ជំនួយ៨០លានដុល្លារ សម្រាប់សង់អគារថ្មី នៃមន្ទីរពេទ្យព្រះកុសុមៈ ដោយអាចឲ្យឧទ្ធម្ភាគចក្រចុះចតបាន
× ភ្នំពេញ៖ អគារថ្មីនៃមន្ទីរពេទ្យព្រះកុសុមៈ ហៅពេទ្យលោកសង្ឃ ដែលជាជំនួយរបស់ចិន ក្នុងទឹកប្រាក់៨០លានដុល្លារនោះ ត្រូវបានបើកការដ្ឋានសាងសង់ជាផ្លូវការហើយ កាលពីថ្ងៃទី៣០ ខែតុលា។ អគារថ្មីនៃមន្ទីរពេទ្យនេះ នឹងបំពាក់ឧបករណ៍វេជ្ជសាស្ត្រ និងសម្ភារបរិក្ខាទំនើបផ្សេងៗ។
អគារថ្មីដែលត្រូវសាងសង់នេះ មានទំហំ២៨,៩០០ម៉ែត្រការ៉េ លើផ្ទៃដីសរុប១៣,៧៤០ម៉ែត្រការ៉េ ដែលគ្រោងចំណាយថវិកា ៥៥០ លានយ័ន ( ៨០លានដុល្លារអាមេរិក) ។ អគារនេះ នឹងរៀបចំកន្លែងសម្រាប់ឧទ្ធម្ភាគចក្រ( Helicopter) ទម្ងន់មធ្យមពី៣ ទៅ៥តោន ចុះចតនៅលើដំបូលអគារផងដែរ។ នេះបើតាមលោក ម៉ម ប៊ុនហេង រដ្ឋមន្ត្រីក្រសួងសុខាភិបាល។
ថ្លែងនៅក្នុងពិធីបើកការដ្ឋានសាងសង់អគារមន្ទីរពេទ្យនេះ លោក ម៉ម ប៊ុនហេង បានបញ្ជាក់ថា អគារថ្មីនេះមានកម្ពស់ ៥៣ម៉ែត្រ មាន១១ជាន់ និងបន្ទប់សរុប ១៣២បន្ទប់ រួមទាំងបង្គន់អនាម័យ ២១៩បន្ទប់។ហើយអគារនេះត្រូវចែកចេញជាផ្នែកសម្រាប់មុខងារមួយចំនួនដូចជា៖ ផ្នែកពិគ្រោះជំងឺក្រៅ ផ្នែកសង្គ្រោះបន្ទាន់ ផ្នែកបច្ចេកវិទ្យាវេជ្ជសាស្ដ្រ ផ្នែកជំងឺទូទៅ ផ្នែកជំងឺវះកាត់ព្រមទាំងសេវា ជំនួយផ្សេងៗទៀត។
ក្រៅពីនេះអគារថ្មីនៃមន្ទីពេទ្យព្រះកុសុមៈ ក៏មានការរៀបចំប្រព័ន្ធផ្គត់ផ្គង់ទឹក អគ្គិសនី និងប្រព័ន្ធបង្ហូរលូទឹកស្អុយ ដោយអនុវត្តតាមស្តង់ដារប្រទេសចិនទៀតផង។ បើតាមលោក ម៉ម ប៊ុនហេង អគារថ្មីនេះ នឺងមានអាយុកាលប្រើប្រាស់ ៥០ឆ្នាំ សម្របតាមអាកាសធាតុរដូវប្រាំង និងរដូវវស្សា។
បច្ចុប្បន្នមន្ទីរពេទ្យព្រះកុសុមៈ មានគ្រែព្យាបាលចំនួន៣៥០ និងមានបុគ្គលិកសរុបទាំងអស់ ចំនួន៥៦៣នាក់ ក្នុងនោះស្ដ្រី ចំនួន២៣១នាក់, បុគ្គលិកជាប់កិច្ចសន្យាចំនួន៤០នាក់ និងកម្មករ ចំនួន៧៤នាក់។ នេះបើតាមរបាយការណ៍របស់មន្ត្រីពេទ្យ។
មន្ទីរពេទ្យកុសុមៈ បានកសាងឡើងនាឆ្នាំ១៩៥៣ ហើយចាប់ផ្ដើមដំណើរការនាឆ្នាំ១៩៥៦ ក្រោមព្រះរាជឧបត្ថម្ភដោយ សម្ដេចព្រះមហាក្សត្រីយ៉ានីព្រះកុសុមៈ ជាព្រះមាតារបស់ព្រះ បរមរតនកោដ្ឋ សម្រាប់ព្យាបាលជំងឺព្រះសង្ឃ ។ មន្ទីរពេទ្យនេះបានចាប់ផ្ដើមដំណើរការឡើងវិញ នៅថ្ងៃទី១៦ ខែមិថុនា ឆ្នាំ១៩៧៩ បន្ទាប់ពីដួលរលំរបប ប៉ុល ពត ។
ដោយការណ៍ណោះក្រសួងសុខាភិបាល បានកែប្រែពីមន្ទីរពេទ្យ សម្រាប់ព្យាបាលព្រះសង្ឃ មកជាមន្ទីរពេទ្យពហុព្យាបាលប្រជាជន និងព្រះសង្ឃ ជាពិសេសជំងឺដែលត្រូវការវះកាត់វិញ។ នេះបើតាមរបាយការណ៍ដដែល៕
Tag:
ម៉ម ប៊ុនហេង
មន្ទីរពេទ្យ
ព្រះកុសុមៈ
© រក្សាសិទ្ធិដោយ thmeythmey.com