ខួប១០ឆ្នាំការវាយប្រហារនៅម៉ុមបៃ អាមេរិកថែម៥លានដុល្លារដើម្បីចាប់ខ្លួនមេខ្លោង

អន្តរជាតិ

ខួប១០ឆ្នាំការវាយប្រហារនៅម៉ុមបៃ អាមេរិកថែម៥លានដុល្លារដើម្បីចាប់ខ្លួនមេខ្លោង

26, Nov 2018 , 9:59 pm

រូបភាព

ដោយ: តន ចាន់រិទ្ធារ៉ា

ថ្ងៃទី២៦ ខែវិច្ឆិកានេះ ជាខួប១០ឆ្នាំនៃការវាយប្រហារភេរវកម្មនៅទីក្រុងម៉ុមបៃរបស់ឥណ្ឌា ដែលសម្លាប់មនុស្ស១៦៦នាក់ និងជាច្រើននាក់ទៀតរបួស។ សកម្មជនជ្រុលនិយមមូស្លីមមកពីប៉ាគីស្ថាន ជាអ្នកនៅពីក្រោយហេតុការណ៍មហន្តរាយនេះ។ នៅថ្ងៃទី២៥ ខែវិច្ឆិកា រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានស្នើឲ្យក្រុងអ៊ីស្លាម៉ាបាដចាត់វិធានការរកមុខអ្នកទទួលខុសត្រូវ ខណៈអាមេរិកបានសន្យាផ្ដល់រង្វាន់បន្ថែម៥លានដុល្លារសម្រាប់ការផ្ដល់ព័ត៌មានណាដែលជួយដល់ការចាប់ខ្លួនឧក្រិដ្ឋជន។

ថ្ងៃទី២៦ ខែវិច្ឆិកា ឆ្នាំ២០០៨ សកម្មជនមួយក្រុមបានបើកការវាយប្រហារនៅទីក្រុងហិរញ្ញវត្ថុដ៏សំខាន់របស់ឥណ្ឌា គឺម៉ុមបៃ។ មានក្នុងដៃនូវកាំភ្លើង AK-47 និងគ្រាប់បែកដៃជាច្រើនទៀត ភេរវករមកពីប៉ាគីស្ថានបានធ្វើឲ្យកក្រើកទីក្រុងនេះដល់ទៅ៣ថ្ងៃ។ សណ្ឋាគារទំនើបៗ ស្ថានីយ៍រថភ្លើង និងភោជនីយដ្ឋានសម្បូរដោយជនជាតិជ្វីហ្វ គឺជាគោលដៅវាយប្រហាររបស់សកម្មជនដែលសមាជិកក្រុម Lashkar-e-Taiba (LeT) ដែលមានមូលដ្ឋាននៅប៉ាគីស្ថាន។

ជនជាតិអាមេរិក៦នាក់ស្ថិតក្នុងជនរងគ្រោះ១៦៦នាក់ដែលបានបាត់បង់ជីវិត។ ក្រោយហេតុការណ៍នេះ ក្រុងវ៉ាស៊ីនតោនក៏បានប្រកាសផ្ដល់រង្វាន់ចំនួន១០លានដុល្លារសម្រាប់ការចាប់ខ្លួន Hafez Saeed ដែលជាមេដឹកនាំរបស់ LeT ។ ជននេះកំពុងរស់នៅដោយមានសេរីភាពនៅប៉ាគីស្ថាន បើទោះជាអង្គការសហប្រជាជាតិបញ្ចូលឈ្មោះក្នុងបញ្ជីភេរវករអន្តរជាតិក្ដី។ អាមេរិកក៏ប្រកាសផ្ដល់លុយ២លានដុល្លារសម្រាប់ការចាប់ខ្លួន Hafiz Abdul Rahman Makki ដែលជាមេដឹកនាំជាន់ខ្ពស់របស់ក្រុមនេះ។

នៅចំខួប១០ឆ្នាំនៃហេតុការណ៍នៅទីក្រុងមានប្រជាជន២២លានដុល្លាររបស់ឥណ្ឌា ក្រសួងការបរទេសអាមេរិកក៏បានប្រកាសផ្ដល់ទឹកប្រាក់ចំនួន៥លានដុល្លារទៀតសម្រាប់ការផ្ដល់ព័ត៌មានដែលនាំដល់ការចាប់ខ្លួនអ្នកនៅពីក្រោយហេតុការណ៍ដែលកំពុងនៅក្រៅសំណាញ់ច្បាប់។ ប្រមុខការទូតអាមេរិក ម៉ៃ ប៉ុមប៉េអូ និយាយថា វាជាការមាក់ងាយគ្រួសារជនរងគ្រោះដែលអ្នករៀបចំផែនការវាយប្រហារមិនទាន់ត្រូវបានកាត់ទោស។

«យើងស្នើប្រទេសទាំងអស់ ជាពិសេសប៉ាគីស្ថានឲ្យគោរពកាត្វកិច្ចរបស់ខ្លួនក្នុងការអនុវត្តទណ្ឌកម្មប្រឆាំងភេរវករដែលជាប់ទាក់ទងហេតុការណ៍នៅម៉ុមបៃរួមទាំងក្រុម Lashkar-e-Tayyiba និងបក្សពួកផង។» នេះជាការលើកឡើងរបស់លោក ប៉ុមប៉េអូ ក្នុងសេចក្ដីថ្លែងការណ៍ថ្ងៃទី២៥ ខែវិច្ឆិកា ដែលបន្តថា អាមេរិកនឹងឈរជាមួយគ្រួសារ និងសាច់ញាតិរបស់ជនរងគ្រោះក្នុងអំពើឃោរឃៅបែបនេះ។

យ៉ាងណាមិញ Saeed ដែលជាជនសង្ស័យធំជាងគេនោះ បានបដិសេធការចោទប្រកាន់មកលើខ្លួន ខណៈប៉ាគីស្ថានក៏បានការពារជននេះដែរ ទោះជាមានការអំពាវនាវពីសំណាក់ឥណ្ឌា និងអាមេរិកនាពេលកន្លងមកក្ដី។ លើសពីនោះ បក្សនយោបាយដែលមានទំនាក់ទំនងជាមួយស្ថាប័នមនុស្សរបស់ LeT ថែមទាំងអាចចូលរួមការបោះឆ្នោតទៅទៀត ទោះជាមិនឈ្នះកៅអីសភាក៏ដោយ តែអាចប្រមូលសំឡេងគាំទ្រជាង៥សែនសំឡេងឯណោះ៕