អត្ថបទពាណិជ្ជកម្ម
×![]()
ដោយ: ជី ដាណា
គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី បានលក់ភាគហ៊ុនរបស់ខ្លួនរហូតដល់ ៨០ភាគរយ ឲ្យធនាគារស៊ាងហៃពាណិជ្ជ និងសន្សំ (The Shanghai Commercial & Savings Bank, Ltd.) ហៅកាត់ថាធនាគារ អេស ស៊ី អេស ប៊ី (SCSB)។ ការចូលជាសមាជិកតែមួយនឹងធ្វើឲ្យ អេ អឹម ខេ ផ្លាស់ប្តូរ មុខមាត់ថ្មី ក្លាយជាគ្រឹះស្ថានមីក្រូហិរញ្ញវត្ថុមួយ ដែលឈានមុខគេនៅប្រទេសកម្ពុជា ក្នុងពេលអនាគត ជាពិសេសគ្រួសារមួយនេះ នឹងជួយលើកកម្ពស់វិស័យធនាគារនៅកម្ពុជាដែរ។
លោក គា បូរាណ នាយកប្រតិបត្តិ អេ អឹម ខេ បានបញ្ជាក់ដូច្នេះថា៖«យើងមានចិត្តសប្បាយរីករាយយ៉ាងខ្លាំង ដែលបានក្លាយជាសមាជិក អេស ស៊ី អេស ប៊ី។ ឥឡូវនេះ អេ អឹម ខេ និង អេស ស៊ី អេស ប៊ី គឺជាគ្រួសារតែមួយ មានគោលដៅតែមួយ ហើយយើងនឹងរឹងមាំនៅថ្ងៃអនាគត»។ សម្រាប់លោក គា បូរាណ វិស័យធនាគារនៅប្រទេសកម្ពុជានាពេលបច្ចុប្បន្ន បានដើរដល់របត់មួយ ដែលប្រើប្រាស់ប្រព័ន្ធ ឌីជីថល ដែលតម្រូវឱ្យធនាគារ និងគ្រឹះស្ថានមីក្រូហិរញ្ញវត្ថុ វិនិយោគទៅលើបច្ចេកវិទ្យាថ្មី ដើម្បីធ្វើឲ្យសេវាហិរញ្ញវត្ថុរបស់ខ្លួន មានភាពបត់បែន និងសម្បូរបែប។ ការក្លាយជាសមាជិក អេស ស៊ី អេស ប៊ី មិនត្រឹមតែធ្វើឲ្យ អេ អឹម ខេ ទទួលបានបទពិសោធន៍ ចំណេះ ជំនាញនោះទេ ប៉ុន្តែ ក៏នឹងទទួលបានប្រភពទុនក្នុងការវិនិយោគផ្សេងៗ ក្នុងពេលជាមួយគ្នាដែរ។ នេះជាការបន្ថែមរបស់លោក គា បូរាណ។
លោក John Yung សមាជិកក្រុមប្រឹក្សាភិបាល EVP & CIO នៃធនាគារ អេស ស៊ី អេស ប៊ី បានឲ្យដឹងថា អេស ស៊ី អេស ប៊ី បង្កើតឡើងក្នុងឆ្នាំ ១៩១៥ មក ដូច្នេះ អេស ស៊ី អេស ប៊ី មានទាំងបទពិសោធន៍ ចំណេះ ជំនាញ លើវិស័យហិរញ្ញវត្ថុ។ លោក John Yung បញ្ជាក់ដូច្នេះថា៖«ឥឡូវនេះយើងបានក្លាយជាគ្រួសារតែមួយ ហើយយើងនឹងនាំយកបទពិសោធន៍ទាំងនេះមកជួយ អេ អឹម ខេ ដោយផ្តោតសំខាន់ទៅលើការផ្តល់សេវាហិរញ្ញវត្ថុដ៏សម្បូរបែប ដល់វិស័យឯកជន អាជីវកម្មខ្នាតតូច និងមធ្យមនៅកម្ពុជា ជាពិសេសប្រជាពលរដ្ឋដែលមានចំណូលទាប រស់នៅតំបន់ដាច់ស្រយាល»។ ធនាគារ អេស ស៊ី អេស ប៊ី ជឿជាក់ថា នៅពេលដែលអតិថិជនទទួលសេវាហិរញ្ញវត្ថុទាន់ពេល និងសមស្រប ពលរដ្ឋនឹងយកកម្ចីទាំងនោះ ទៅពង្រីកការរកស៊ី ឬរបរដំណាំដាំដុះរបស់គាត់ ដែលជាកត្តាមួយជួយជំរុញឱ្យសេដ្ឋកិច្ចនៅក្នុងប្រទេស មានភាពរីកចម្រើនមួយកម្រិតទៀត។
គួរកត់សម្គាល់ថា វិស័យធនាគារនៅកម្ពុជា មានការរីកចម្រើនគួរឱ្យកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះ។ បើយោងតាមរបាយការណ៍របស់ធនាគារជាតិនៃកម្ពុជា បច្ចុប្បន្នកម្ពុជាមានធនាគារពាណិជ្ជចំនួន៣៩ ធនាគារឯកទេសចំនួន១៥ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើចំនួន៧ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើចំនួន៧០ និងស្ថាប័នផ្តល់ឥណទានជនបទចំនួន៣០២។ មានធនាគារ និងគ្រឹះស្ថានមីក្រូហិរញ្ញវត្ថុធំៗមួយចំនួន បាន និងកំពុងធ្វើបច្ចុប្បន្នភាពផលិតផល និង សេវាកម្មរបស់ខ្លួន ដែលមានភាពបត់បែន និងទាន់សម័យ។
អេ អឹម ខេ គឺជាគ្រឹះស្ថានដែលឈានមុខគេ លើវិសាលភាពប្រតិបត្តិការ និងចំនួនអតិថិជនប្រាក់កម្ចី។ គិតត្រឹមខែកញ្ញា ឆ្នាំ២០១៨នេះ អេ អឹម ខេ មានអតិថិជនជាង ៨៣ម៉ឺននាក់ ជាមួយផលប័ត្រកម្ចីជាង ២៤៤លានដុល្លារអាមេរិក និងប្រាក់បញ្ញើជាង ១៤៣លានដុល្លារអាមេរិក ព្រមទាំងមានការិយាល័យប្រតិបត្តិការចំនួន ១៤៩កន្លែង និងភ្នាក់ងារចំនួន ៣,៥០០ កន្លែងនៅទូទាំងប្រទេស។ អេ អឹម ខេ មានផលិតផល និងសេវាកម្មជាច្រើន ដែលកំពុងត្រូវបានផ្តល់ជូនអតិថិជន មានដូចជា សេវាប្រាក់កម្ចី ប្រាក់សន្សំ ផ្ទេរប្រាក់នៅក្នុង និងក្រៅប្រទេស សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ ដោយស័យប្រវត្តិ ( ATMs/CDMs)ជាដើម៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 5 ម៉ោង
