អន្តរជាតិ
សភាជប៉ុនព្រមអនុម័តច្បាប់បើកទ្វារទទួលពលករបរទេសបន្ថែម ស្របពេលប្រឈមវិបត្តិខ្វះកម្លាំងពលកម្ម
× សភាជាន់ទាបជប៉ុន កាលពីថ្ងៃទី២៧ ខែវិច្ឆិកា បានអនុម័តសេចក្តីព្រាងច្បាប់ដ៏ចម្រូងចម្រាស់មួយ ដែលនឹងបើកចំហទ្វារប្រទេសឲ្យកាន់តែទូលាយ ដើម្បីទទួលយកពលករបរទេសរាប់ម៉ឺននាក់បន្ថែមទៀត។ គំនិតផ្តួចផ្តើមថ្មីនេះនឹងប្រែក្លាយជប៉ុនទៅជាប្រជាជាតិមួយ ដែលស្វាគមន៍ជនអន្តោប្រវេសន៍ជាពិសេសពលករមានជំនាញខ្ពស់។
ក្រោយពីសភាជាន់ទាបបានពិនិត្យ និងសម្រេចអនុម័តរួចរាល់កាលពីថ្ងៃអង្គារកន្លងទៅ សេចក្តីព្រាងច្បាប់ថ្មីនេះនឹងត្រូវលើកយកទៅជជែកតទល់បន្ថែមទៀត នៅឯសភាជាន់ខ្ពស់នាថ្ងៃទី១០ ខែធ្នូខាងមុខ។ បើតាមទីភ្នាក់ងារព័ត៌មានជប៉ុន Kyodo ប្រសិនច្បាប់នេះចូលជាធរមាន វាអាចបង្កើនចំនួនពលករបរទេសក្នុងប្រទេសជប៉ុន ប្រមាណជាង ៣៤៥ ០០0នាក់ ក្នុងរយៈពេល៥ឆ្នាំខាងមុខ។
រដ្ឋាភិបាលជប៉ុនបានពន្លឿនការតស៊ូមតិ និងសម្រេចអនុម័តសេចក្តីព្រាងច្បាប់នេះ ដោយសង្ឃឹមថា វា អាចនឹងចូលជាធរមាន ត្រឹមខែមេសា ឆ្នាំ២០១៩។ ជាក់ស្តែង ដំណើរនៃការពិភាក្សាលើសេចក្តីព្រាងច្បាប់នេះ បានប្រើប្រាស់រយៈពេលត្រឹម១៧ម៉ោង និង១៥នាទី ជំនួសឲ្យរយៈទាបបំផុតសម្រាប់ច្បាប់ដ៏ចម្រូងចម្រាស់ គឺមានរយៈពេលដល់ ២០ម៉ោង។
ការបង្កើនល្បឿនកិច្ចពិភាក្សានេះគឺធ្វើឡើង ស្របពេលដែលក្រុងតូក្យូប្រឹងប្រែងយ៉ាងសស្រាក់សស្រាំ ដើម្បីដោះស្រាយបញ្ហាកង្វះកម្លាំងពលកម្មក្នុងស្រុក ដែលបណ្តាលមកពីការធ្លាក់ចុះនៃអត្រាកំណើត ប្រជាជន និងការកើនឡើងនៃប្រជាជនចាស់ជរា។
តាមពិតទៅ ជប៉ុនមានប្រពៃណីរឹតត្បិតចំពោះការទទួលយកពលករទេស មកធ្វើការក្នុងប្រទេសខ្លួន លើកលែងតែ ពលករមានជំនាញខ្ពស់ ជាពិសេសក្នុងវិស័យវិជ្ជសាស្ត្រជាដើម។ ប៉ុន្តែសម្រាប់សេចក្តីព្រាងច្បាប់ថ្មីនេះ វានឹងអនុញ្ញាតឲ្យពលករទាំងជំនាញនិងគ្មានជំនាញពីបរទេស អាចចូលបម្រើការក្នុងវិស័យចំនួន ១៤ ក្នុងប្រទេសជប៉ុន ដែលកំពុងរងគ្រោះដោយសារកង្វះកម្លាំងពលកម្ម។ វិស័យទាំង១៤ គឺរាប់បញ្ចូលដូចជា ផ្នែកថែទាំសុខភាព, សំណង់ និងឧស្សាហកម្មជាដើម។
ប្រព័ន្ធគ្រប់គ្រងជនអន្តោប្រវេសន៍របស់ជប៉ុនថ្មីនេះ នឹងបង្កើតជាទិដ្ឋាការប្រភេទថ្មីចំនួនពីរសម្រាប់ពលករបរទេស។ ទីមួយគឺមានសុពលភាព៥ឆ្នាំសម្រាប់ពលករបរទេស ដែលអាចនិយាយភាសាជប៉ុនបានល្អ និងស្ថិតក្នុងវិស័យកំពុងខ្វះខាតខាងលើ។ ហើយទីពីរវិញនោះគឺសម្រាប់ពលករមានជំនាញខ្ពស់ ដែលពួកគេក៏ត្រូវបានអនុញ្ញាតឲ្យនាំគ្រួសារទៅរស់នៅជាមួយថែមទៀតផង។ ជាពិសេស សម្រាប់ទិដ្ឋាការប្រភេទទីពីរនេះ រដ្ឋាភិបាលពុំបានកំណត់ចំនួនការផ្តល់ចំនួនទិដ្ឋាការជាថ្មីឡើយ។ នេះមានន័យថា ពួកគេអាចមានសិទ្ធិរស់នៅក្នុងប្រទេសជប៉ុនជារៀងរហូតថែមទៀតផង។
យោងតាមក្រសួងការងារជប៉ុន ចំនួនពលករបរទេសក្នុងប្រទេសជប៉ុនមានចំនួនប្រមាណ ១,២៨លាននាក់ គិតត្រឹមចុងខែតុលានេះ ដែលកើនឡើងពីចំនួន ៦៨ម៉ឺននាក់ កាលពីឆ្នាំ២០១២។ ក្នុងចំណោមពលករបរទេសទាំងអស់ ជនជាតិចិនមានចំនួនច្រើនជាងគេបំផុតដែលស្មើនឹង៣៧ម៉ឺននាក់ និងតាមពីក្រោយដោយវៀតណាម និងហ្វីលីពីន៕
Tag:
ជប៉ុន
គោលនយោបាយអន្តោប្រវេសន៍
កង្វះកម្លាំងពលកម្ម
© រក្សាសិទ្ធិដោយ thmeythmey.com