សាលារាជធានី រើសមន្ត្រីជាង ៥ពាន់នាក់ សម្រាប់ធ្វើជំរឿនប្រជាជននៅភ្នំពេញ

ជាតិ

សាលារាជធានី រើសមន្ត្រីជាង ៥ពាន់នាក់ សម្រាប់ធ្វើជំរឿនប្រជាជននៅភ្នំពេញ

08, Dec 2018 , 8:29 pm

រូបភាព

រូបភាពពីហ្វេសប៊ុករដ្ឋបាលរាជធានីភ្នំពេញ

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ គណៈកម្មាធិការជំរឿនប្រជាជនរាជធានីភ្នំពេញ បានប្រកាសជ្រើសរើសមន្ត្រីត្រួតពិនិត្យ, មន្ត្រីសម្ភាសន៍ និងមន្ត្រីបំរុង ចំនួន ៥,០៥៩ នាក់ សម្រាប់អនុវត្តការងារជំរឿនទូទៅប្រជាជននៅរាជធានីភ្នំពេញឆ្នាំ២០១៩។ នេះបើតាមសេចក្ដីជូនដំណឹងរបស់សាលារាជធានីភ្នំពេញ ដែលចុះហត្ថលេខាដោយលោក ឃួង ស្រេង។

បើតាមសេចក្ដីជូនដំណឹង គណៈកម្មាធិការជំរឿនប្រជាជនរាជធានីភ្នំពេញ ត្រូវការជ្រើសរើសមន្ត្រីត្រួតពិនិត្យ, មន្ត្រីសម្ភាសន៍ និងមន្ត្រីបំរុង សរុបចំនួន ៥,០៥៩ នាក់ ដោយក្នុងនោះ ត្រូវការមន្ត្រីត្រួតពិនិត្យចំនួន ៩៩៦នាក់, មន្ត្រីសម្ភាសន៍ចំនួន ៣,៩៨៣នាក់ និងមន្ត្រីបំរុងចំនួន ៨០នាក់។

សាធារណជន, មន្ត្រីរាជការ, បុគ្គលិកតាមបណ្ដាមន្ទីរ, អង្គភាព, ស្ថាប័នរដ្ឋបាលខណ្ឌ, សិស្ស និងនិស្សិតទាំងអស់នៅរាជធានីភ្នំពេញ ដែលមានចំណាប់ចង់បំពេញការងារជាមន្ត្រីជំរឿនទូទៅប្រជាជននៅរាជធានីភ្នំពេញក្នុងរយៈពេលខ្លី អាចទៅដាក់ពាក្យ និងកិច្ចសន្យាការងារនៅមន្ទីរផែនការរាជធានីភ្នំពេញ និងនៅតាមបណ្ដាខណ្ឌទាំង ១២។

បេក្ខជនដែលចូលជាមន្ត្រីជំរឿន ត្រូវចូលរួមវគ្គបណ្ដុះបណ្ដាលរយៈពេល ៤ថ្ងៃ។ បន្ទាប់ពីចូលរួមវគ្គបណ្ដុះបណ្ដាលរួច បេក្ខជនដែលជាមន្ត្រីត្រួតពិនិត្យ និងមន្ត្រីសម្ភាសន៍ ត្រូវចុះអនុវត្តការងារជំរឿនសិត្ថិប្រជាជនរយៈពេល ១៤ថ្ងៃ។

គណៈកម្មាធិការជំរឿនប្រជាជនរាជធានីភ្នំពេញ ចាប់ផ្ដើមទទួលពាក្យពីថ្ងៃទី ៦ ធ្នូនេះ រហូតដល់ថ្ងៃទី ៣១ ខែធ្នូ ឆ្នាំ២០១៨នេះ សម្រាប់ព័ត៌មានបន្ថែមទាក់ទងតាមទូរសព្ទលេខ ០៧៧ ៥៨០ ៦១៦/ ០១១ ៩០៧ ៦៣៩/ ០១២ ៣៣៩ ១៣០។ នេះបើតាមសេចក្ដីជូនដំណឹងខាងលើ៕