របាយការណ៍៖ រុស្ស៊ីវ៉ាអង់គ្លេសជាប្រទេសផលិតសព្វាវុធធំជាងគេទី២ ឯអាមេរិកនៅលេខ១ ដដែល

អន្តរជាតិ

របាយការណ៍៖ រុស្ស៊ីវ៉ាអង់គ្លេសជាប្រទេសផលិតសព្វាវុធធំជាងគេទី២ ឯអាមេរិកនៅលេខ១ ដដែល

10, Dec 2018 , 10:59 pm

រូបភាព

រូបភាព AFP

ដោយ: តន ចាន់រិទ្ធារ៉ា

រុស្ស៊ី បានដណ្ដើមតំណែងលេខ២ ពីអង់គ្លេសក្នុងបញ្ជីប្រទេសផលិតសព្វាវុធធំជាងគេរបស់ពិភពលោក ប៉ុន្តែឈរនៅពីក្រោមអាមេរិក ដែលបន្តរក្សាតំណែងលេខ១ ដដែល។ នេះបើតាមរបាយការណ៍របស់វិទ្យាស្ថានស្រាវជ្រាវមួយរបស់ស៊ុយអែតចេញផ្សាយថ្ងៃទី១០ ខែធ្នូ។ កំណើនការផលិតអាវុធតាំងពីឆ្នាំ២០១១ មក ជាមូលហេតុចម្បងដែលនាំឲ្យរុស្ស៊ីឡើងលេខរៀងបែបនេះ ហើយក្រុមហ៊ុនរុស្ស៊ីជាច្រើនបានហក់ចូលចំណាត់ថ្នាក់កំពូលទាំង១០ ដែរ។

ការចំណាយច្រើនដើម្បីបំពេញតម្រូវការអាវុធដើម្បីធ្វើទំនើបកម្មយោធា បានក្លាយជាមូលហេតុចម្បងដែលនាំឲ្យឧស្សាហកម្មសព្វាវុធរបស់រុស្ស៊ី កើនឡើងខ្លាំងក្នុងរយៈពេល៧ឆ្នាំចុងក្រោយនេះ។ ក្នុងរបាយការណ៍របស់វិទ្យាស្ថានស្រាវជ្រាវសន្តិភាពអន្តរជាតិស្តុកខូល (SIPRI) ក្រុមហ៊ុនរបស់រុស្ស៊ីចំនួន១០ បានជាប់ឈ្មោះក្នុងបញ្ជីក្រុមហ៊ុនផលិតអាវុធចំនួន១០០ សម្រាប់ឆ្នាំ២០១៧ មានតម្លៃ៣៧.៧ពាន់លានដុល្លារ ស្មើនឹង ៩.៥ ភាគរយនៃទំហំផលិតសរុប។

ជាមួយទំហំដ៏ច្រើននេះ រុស្ស៊ីបានក្លាយជាប្រទេសផលិតសព្វាវុធធំទីពីរ ដែលធ្លាប់អង្គុយដោយអង់គ្លេស តាំងពីឆ្នាំ២០០២ មកម្ល៉េះ។ Almaz-Antey ដែលជាក្រុមហ៊ុនផលិតអាវុធធំជាងគេរបស់រុស្ស៊ី បានក្លាយជាក្រុមហ៊ុនរុស្ស៊ីដំបូងគេមានឈ្មោះក្នុងតំណែងកំពូលទាំង១០ ដោយមានកំណើនការលក់ចំនួន១៧ភាគរយក្នុងឆ្នាំ២០១៧ និងមានទំហំទឹកប្រាក់៨.៦ពាន់លានដុល្លារ។ ក្រុមហ៊ុនរុស្ស៊ី ៣ ទៀត ក៏ជាប់ឈ្មោះក្នុងតំណែងកំពូលទាំង១០០ ដែរ។

បើតាមរបាយការណ៍ដែលចេញផ្សាយចំទិវាសិទ្ធិមនុស្ស អាមេរិកនៅតែឈរលើគេក្នុងតារាងដដែល។ ក្រុមហ៊ុនអាមេរិកចំនួន ៤២ បានជាប់ឈ្មោះក្នុងបញ្ជីរបស់ SIPRI ដោយការលក់បានកើនឡើង២ភាគរយដល់ទៅចំនួន ២២៦.៦ពាន់លានដុល្លារ ស្មើនឹង៥៧ភាគរយនៃការលក់របស់ក្រុមហ៊ុនទាំង១០០ ។ លោក Aude Fleurant អ្នកចាត់ការជាន់ខ្ពស់របស់ SIPRI និយាយថា ក្រុមហ៊ុនអាមេរិកទទួលប្រយោជន៍ច្រើនពីក្រសួងការពារជាតិអាមេរិក។ ក្រុមហ៊ុន Lockheed Martin ឈរតំណែងលើគេក្នុងបញ្ជីឆ្នាំ ២០១៧ ។

អង់គ្លេសឯណោះវិញ ទោះបាត់បង់តំណែងលេខពីរមែន មហាអំណាចមួយនេះនៅតែរក្សាតំណែងប្រទេសផលិតអាវុធធំជាងគេនៅអឺរ៉ុបខាងលិចដដែល។ ការលក់សព្វាវុធរបស់ក្រុមហ៊ុនអង់គ្លេស បានកើនឡើងគួរឲ្យកត់សម្គាល់ក្នុងឆ្នាំ ២០១៧ ក្នុងទំហំទឹកប្រាក់ចំនួន ៣៥.៧ពាន់លានដុល្លារ។ ក្រុមហ៊ុន BAE Systems របស់អង់គ្លេស ស្ថិតនៅចំណាត់ទី ៤ ដោយមានបរិមាណលក់ចំនួន ២២.៩ពាន់លានដុល្លារ គឺតិចជាងក្រុមហ៊ុន Almaz-Antey ។

អ្វីគួរឲ្យកត់សម្គាល់នោះ បរិមាណលក់របស់ក្រុមហ៊ុនតួកគីក៏កើនឡើងដែរ ដែលនេះបង្ហាញពីមហិច្ឆតារបស់ក្រុងអង់ការ៉ាក្នុងការអភិវឌ្ឍឧស្សាហកម្មសព្វាវុធរបស់ខ្លួនដើម្បីបំពេញតម្រូវការអាវុធ និងកាត់បន្ថយការពឹងផ្អែកការផ្គត់ផ្គង់បរទេស។ យ៉ាងណាមិញ របាយការណ៍ខាងលើនេះ មិនរាប់បញ្ចូលចិនឡើយ ទោះជាប្រទេសនេះចំណាយច្រើនលើវិស័យយោធារបស់ខ្លួនក្ដី ខណៈ SIPRI អះអងថា គ្មានទិន្នន័យពីប្រទេសនេះឡើយ៕