អន្តរជាតិ
របបយោធាថៃ ដកបម្រាមនយោបាយដើម្បីត្រៀមការបោះឆ្នោតឆ្នាំ២០១៩ លោក ប្រាយុទ្ធ ចន្ទអូចា ទម្លាក់សន្លឹកឆ្នោតកាលពីការធ្វើប្រជាមតិរដ្ឋធម្មនុញ្ញ
× របបយោធាថៃ បានសម្រេចចិត្តលើកលែងបម្រាមផ្នែកនយោបាយដែលបានអនុវត្តតាំងពីរដ្ឋប្រហារថ្ងៃទី២៤ ខែឧសភា ឆ្នាំ២០១៤ មក។ ការលើកលែងបម្រាមនេះ នឹងផ្លូវឲ្យគណបក្សនយោបាយទាំងអស់ធ្វើសកម្មភាពដោយស្របច្បាប់ ដើម្បីត្រៀមប្រជែងការបោះឆ្នោតខែកុម្ភៈ ឆ្នាំ២០១៩ ។ យ៉ាងណាមិញ ប្រមុខដឹកនាំយោធា ប្រាយុទ្ធ ចន្ទអូចា បានព្រលយថា យុទ្ធនាការរបស់បក្សនយោបាយគួរធ្វើក្នុងក្របខណ្ឌជាក់លាក់មួយ។
ជាងបួនឆ្នាំមុន កិច្ចការដំបូងគេរបស់ក្រុមទាហានដែលធ្វើរដ្ឋប្រហារទម្លាក់រដ្ឋាភិបាលស៊ីវិលនៅថៃ គឺចេញបញ្ជាចំនួន៩ សំដៅហាមឃាត់រាល់សកម្មភាពនយោបាយក្នុងស្រុកទាំងអស់។ ប៉ុន្តែនៅថ្ងៃទី១១ ខែធ្នូ ឆ្នាំ២០១៨ របបសឹកថៃដែលកំពុងដឹកនាំប្រទេសបានលុបចោលបម្រាមនេះវិញ ខណៈត្រៀមខ្លួនដើម្បីការបោះឆ្នោតថ្នាក់ជាតិឆ្នាំ២០១៩ ។ ចាប់ពីពេលនេះ បក្សនយោបាយទាំងអស់អាចធ្វើសកម្មភាពបានដោយសេរី។
បញ្ជាដែលចេញផ្សាយលើរាជកិច្ចចែងថា បក្សនយោបាយអាចធ្វើយុទ្ធនាការដើម្បីបង្ហាញគោលនយោបាយរបស់ខ្លួន។ បើតាមទីភ្នាក់ងារព័ត៌មាន Reuters សេចក្ដីប្រកាសដដែលបន្តថា ប្រជាជន និងបក្សនយោបាយ អាចធ្វើសកម្មភាពនយោបាយក្នុងរយៈពេលនេះដើម្បីឈានទៅកាន់បោះឆ្នោតឲ្យស្របតាមរដ្ឋធម្មនុញ្ញ។
តាមពិតទៅ របបយោធាថៃចាប់ផ្ដើមបើកសិទ្ធិដល់ការធ្វើនយោបាយតាំងពីខែកញ្ញាមកនេះ តាមរយៈការអនុញ្ញាតឲ្យបក្សនយោបាយនានាប្រមូលផ្ដុំ ធ្វើសមាជដើម្បីជ្រើសរើសថ្នាក់ដឹកនាំថ្មី។ ប៉ុន្តែការប្រមូលផ្ដុំតាមផ្លូវ និងការធ្វើយុទ្ធនាការត្រូវបានហាមឃាត់ដដែល។ ក្រោយចេញសេចក្ដីប្រកាសថ្ងៃទី១១ ខែធ្នូនេះ គេរំពឹងថា ការជួបជុំគ្នាតាមផ្លូវដែលធ្លាប់តែកើតមានហូរហឬមកនោះ អាចកើតឡើងជាថ្មីទៀតមិនខាន។
យ៉ាងណាមិញ គេក៏មិនដឹងថា យុទ្ធនាការនេះអាចធ្វើឡើងដោយសេរីដូចអតីតកាលឡើយ។ នេះក៏ព្រោះតែប្រមុខរដ្ឋាភិបាលយោធា ប្រាយុទ្ធ ចន្ទអូចា បាននិយាយកាលពីសប្ដាហ៍មុនថា យុទ្ធនាកាទាំងឡាយត្រូវរៀបចំឡើងក្រោមលក្ខខណ្ឌមួយ។ លោកបញ្ជាក់ថា ការជួបជុំត្រូវមានការអនុញ្ញាតជាមុន ហើយការអនុញ្ញាតនឹងត្រូវបានផ្ដល់ឲ្យតាមគោលការណ៍ជាក់លាក់ដើម្បីរក្សាសន្តិភាពក្នុងប្រទេស បើមិនដូច្នោះទេ ប្រទេសនឹងបែកបាក់មុនទទួលបានប្រជាធិបតេយ្យ។
ជាមួយនឹងការលុបចោលបម្រាមផ្លូវការនេះ គណៈកម្មការរៀបចំការបោះឆ្នោតថៃក៏ប្រកាសកាលបរិច្ឆេទបោះឆ្នោតដែរ គឺនៅថ្ងៃទី២៤ ខែកុម្ភៈ ឆ្នាំ២០១៩ ។ បេក្ខជនទាំងអស់ត្រូវចុះឈ្មោះចាប់ពីថ្ងៃទី១៤ ដល់ថ្ងៃទី១៨ ខែមករាខាងមុខ ហើយយុទ្ធនាការបោះឆ្នោតចាប់ផ្ដើមនៅថ្ងៃទី២ ខែមករា។ បក្សនយោបាយនីមួយៗអាចជ្រើសរើសបេក្ខភាពនាយករដ្ឋមន្ត្រីបានបីរូប ប៉ុន្តែគេមិនច្បាស់ថា លោក ប្រាយុទ្ធ នឹងមានឈ្មោះដែរឬយ៉ាងណាឡើយ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com