កីឡាជាតិ
ជាតិ
ជិតដល់ថ្ងៃការ លោក និល សីហា គ្រូល្បុក្កតោបាត់បង់ជីវិតដោយគ្រោះថ្នាក់ចរាចរណ៍
× លោក និល សីហា គ្រូបង្វឹកគុនល្បុក្កតោវ័យ២៧ឆ្នាំ បានស្លាប់ភ្លាមៗនៅនឹងកន្លែងកើតហេតុ ក្នុងហេតុការគ្រោះថ្នាក់ចរាចរណ៍មួយកាលពីយប់រំលងអាធ្រាត្រឈានចូលថ្ងៃទី២០ ខែធ្នូ ឆ្នាំ២០១៨ បន្ទាប់ពីត្រឡប់មកពីប្រាប់ការមិត្តភក្តិ។ បច្ចុប្បន្នសពលោកកំពុងតម្កល់ធ្វើបុណ្យនៅវត្តសំបួរមាស ក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។
គ្រូបង្វឹកគុនល្បុក្កតោ លោក និល សីហា ត្រូវបានរថយន្តកិនស្លាប់ភ្លាមៗនៅកន្លែងកើតហេតុ ក្រោយជិះម៉ូតូឌុបមិត្តភក្តិម្នាក់មកពីប្រាប់ការមិត្តភក្តិទាក់ដៃជាមួយរ៉ឺម៉កកង់បីដួល។ គ្រូបង្វឹកវ័យ២៧ឆ្នាំរូបនេះ ត្រូវចូលរោងការជាមួយកញ្ញា ពៅ ពិសិដ្ឋ ដែលមានវ័យ២២ឆ្នាំរស់នៅក្នុងភូមិបុរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ នៅថ្ងៃទី៧ ខែមករា ឆ្នាំ២០១៩ ខាងមុខនេះ។
ក្នុងហេតុការណ៍ដែលកើតឡើងកាលយប់រំលងអាធ្រាត្រឈានចូលថ្ងៃទី២០ ខែធ្នូ ឆ្នាំ២០១៨ នៅចំណុចមុខច្រកចូលសាលាសង្កាត់ស្ទឹងមានជ័យ២ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញនេះដែរ ក៏បានបណ្តាលឲ្យមិត្តភក្តិរបស់គ្រូបង្វឹកខាងលើរងរបួសស្រាលផងដែរ។
បច្ចុប្បន្នសាកសពរបស់លោក និល សីហា ដែលស្នាក់នៅក្នុងសង្កាត់ដង្កោ ខណ្ឌដង្កោ រាជធានីភ្នំពេញ កំពុងតម្កល់ធ្វើបុណ្យនៅវត្តសំបួរមាស ក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ៕
Tag:
គុនល្បុក្កតោ
និល សីហា
© រក្សាសិទ្ធិដោយ thmeythmey.com