អន្តរជាតិ
លោក ពូទីន៖ រុស្ស៊ីគ្មានមហិច្ឆតាត្រួតត្រាពិភពលោកឡើយ តែអ្នកផ្សេងមាន លោក វ៉្លាឌីមៀ ពូទីន នាសន្និសីទសារព័ត៌មានប្រចាំឆ្នាំ។ (រូបភាព៖ វ៉េបសាយប្រធានាធិបតីរុស្ស៊ី)
× ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី២០ ខែធ្នូ បានអះអាងថា រុស្ស៊ីគ្មានមហិច្ឆតាត្រួតត្រាពិភពលោកឡើយ ប៉ុន្តែដឹងថា ប្រទេសផ្សេងមានបំណងដឹកនាំពិភពលោកទាំងមូល។ លោក ពូទីន អះអាងបែបនេះទៅនឹងសំណួររបស់អ្នកសារព័ត៌មានអាមេរិកក្នុងសន្និសីទកាសែតប្រចាំឆ្នាំ។ ចំណែកប្រទេសផ្សេងណានោះ មេដឹកនាំរុស្ស៊ីរូបនេះមិនបាននិយាយឲ្យច្បាស់ឡើយ តែលោកបានប្រៀបធៀបទំហំទឹកប្រាក់វិស័យការពារជាតិរវាងរុស្ស៊ី និងអាមេរិក។
នាឱកាសសន្និសីទសារព័ត៌មានប្រចាំឆ្នាំ២០១៨ ប្រធានាធិបតីរុស្ស៊ី វ៉ា្លឌីមៀ ពូទីន ត្រូវបានសួរសំណួររសើបៗជាច្រើន។ ក្នុងនោះអ្នកសារព័ត៌មានអាមេរិកម្នាក់បានសួរលោកពីមហិច្ឆតារបស់រុស្ស៊ី។ ប្រធានការិយាល័យព័ត៌មានរបស់កាសែតអាមេរិក Wall Street Journal ប្រចាំក្រុងមូស្គូ បានសួរលោក ពូទីន ថា តើរុស្ស៊ីមានបំណងគ្រប់គ្រងពិភពលោកដែរឬយ៉ាងណា។ លោកក៏ឆ្លើយវិញថា រុស្ស៊ីគ្មានបំណងបែបនេះឡើយ។
ចំពោះមុខអ្នកសារព័ត៌មានជាច្រើន លោក ពូទីន បញ្ជាក់ថា ការណ៍ដែលមានការយល់ឃើញថា រុស្ស៊ីចង់ត្រួតត្រាពិភពលោក គឺជាការសន្មត់ពីសំណាក់មនុស្សមានបញ្ហាខួរក្បាលដើម្បីបន្ទុចបង្អាក់អ្នកផ្សេងប៉ុណ្ណោះ។ ដោយមិននិយាយចំប្រទេសណានោះ បុរសខ្លាំងរុស្ស៊ីរូបនេះបន្តថា៖ «និយាយដល់រឿងត្រួតត្រាពិភពលោកនេះ យើងសុទ្ធតែដឹងច្បាស់ថា នរណាជាអ្នកចង់ធ្វើបែបនេះ ហើយធ្វើនៅឯណោះ តែពិតណាស់មិនមែនអ្នកនៅមូស្គូជាអ្នកចង់ធ្វើបែបនោះឡើយ។»
ទោះមិននិយាយចំឈ្មោះអាមេរិកពីរឿងមហិច្ឆតាត្រួតត្រាពិភពលោកក្ដី លោក ពូទីន ជឿថា ការប្រកួតប្រជែងឥទ្ធិពលលើឆាកអន្តរជាតិមានទាក់ទងតួនាទីរបស់អាមេរិកក្នុងការដឹកនាំសេដ្ឋកិច្ចសាកល និងទំហំប្រាក់ចំណាយវិស័យការពារជាតិដែលទំហំលើស៧០០ពាន់លានដុល្លារ។ ចំណែកឯទឹកប្រាក់វិស័យការពារជាតិរបស់រុស្ស៊ីវិញមានតែ៤៦ពាន់លានដុល្លារ ហើយមានប្រជាជន១៤០លាននាក់ ខណៈរដ្ឋសមាជិកណាតូមានប្រជាជនប្រមាណ៦០០លាននាក់។
ត្រង់ចំណុចនេះ ប្រធានាធិបតីរុស្ស៊ីរូបនេះបានសួរវិញថា តើអ្នកជឿថា វាជាបំណងរុស្ស៊ីដែលចង់គ្រប់គ្រងពិភពលោក? លោកក៏ចាត់ទុកសម្ដីចេញពីមាត់ចាបមាត់ព្រាបទាំងអម្បាលម៉ានជុំវិញមហិច្ឆតារុស្ស៊ី ជារឿងគ្មានបានការអ្វីទេ។
ទំនាក់ទំនងរុស្ស៊ី និងអាមេរិក កំពុងស្ថិតក្នុងស្ថានភាពអាក្រក់កាន់តែខ្លាំងឡើងបន្ទាប់ពីក្រុងវ៉ាស៊ីនតោនចោទក្រុងមូស្គូថា ជ្រៀតជ្រែកការបោះឆ្នោតឆ្នាំ២០១៦ ដែលលោក ដូណាល់ ត្រាំ ឈ្នះឆ្នោតជាប្រធានាធិបតី។ ចាប់ពីពេលនោះមក អាមេរិកបានដាក់សម្ពាធជាបន្តបន្ទាប់លើរុស្ស៊ី រឹតបន្តឹងការដាក់ទណ្ឌកម្ម និងពង្រឹងសម្ព័ន្ធយោធាណាតូផង។ ចុងក្រោយ អាមេរិកក៏ដកខ្លួនពីសន្ធិសញ្ញាមីស៊ីលចម្ងាយមធ្យម ដែលធ្វើឲ្យរុស្ស៊ីខឹងយ៉ាងខ្លាំង៕
Tag:
រុស្ស៊ី
អាមេរិក
វ៉ា្លឌីមៀ ពូទីន
© រក្សាសិទ្ធិដោយ thmeythmey.com