អន្តរជាតិ
ចិន៖ អាមេរិកជាមហាអំណាចទី១ តែក្រអឺតក្រទម និងអាត្មានិយម លោកស្រី Hua Chunying អ្នកនាំពាក្យក្រសួងការបរទេសចិននាសន្និសីទសារព័ត៌មានថ្ងៃទី២១ ខែធ្នូ។ (រូបភាពពីវេបសាយក្រសួងការបរទេសចិន)
× ក្រុងប៉េកាំង នៅថ្ងៃទី២១ ខែធ្នូ បានប្រតិកម្មយ៉ាងខ្លាំងទៅនឹងអាមេរិកដែលបានចោទប្រកាន់ជនជាតិចិន២នាក់ពីបទការលួចព័ត៌មានពីស្ថាប័នរដ្ឋ និងក្រុមហ៊ុនអាមេរិក ដែលធ្វើឲ្យប៉ះពាល់សន្តិសុខបច្ចេកវិទ្យាអាមេរិកអស់ពេលយ៉ាងយូរ។ ក្រសួងការបរទេសចិនចោទអាមេរិកថា ចេះតែបង្កើតរឿងមិនពិតហូរហែ បិទផ្លូវអភិវឌ្ឍរបស់ប្រទេសផ្សេង និងមានចរិតអួតអាងទោះខ្លួនជាមហាអំណាចក្ដី។ ចិនព្រមានអាមេរិកឲ្យឈប់ធ្វើសកម្មភាពបែបនេះ បើចង់ឲ្យទំនាក់ទំនងទ្វេភាគីល្អប្រសើរ។
ពីមួយថ្ងៃទៅមួយថ្ងៃ ទំនាក់ទំនងចិន និងអាមេរិកកាន់តែស្រអាប់ទៅ ទោះជាមេដឹកនាំកំពូលបានជួបគ្នាទល់មុខដើម្បីស្វែងរកដំណោះស្រាយក្ដី។ នៅថ្ងៃទី២០ ខែធ្នូ ក្រសួងយុត្តិធម៌អាមេរិកបានចោទប្រកាន់បុរសជនជាតិចិន២នាក់ពីបទធ្វើសកម្មភាពលួចយកព័ត៌មានតាមប្រព័ន្ធអ៊ីនធឺណិតពីក្រុមហ៊ុន និងស្ថាប័នរដ្ឋនានា។ ការចោទប្រកាន់នេះ ធ្វើឲ្យក្រុងប៉េកាំងក្ដៅស្លឹកត្រចៀកយ៉ាងខ្លាំង និងទាមទារឲ្យទម្លាក់បទចោទលើជនជាតិចិនទាំង២។
លោកស្រី Hua Chunying អ្នកនាំពាក្យក្រសួងការបរទេសចិនបានចាត់ទុកករណីចោទចុងក្រោយនេះ ជារឿងប្រឌិត ដែលបំពានបទបញ្ញត្តិមូលដ្ឋានក្នុងការគ្រប់គ្រងទំនាក់ទំនងអន្តរជាតិ និងធ្វើឲ្យទំនាក់ទំនងចិន-អាមេរិករងផលមិនល្អ។
ក្នុងសន្និសីទសារព័ត៌មានថ្ងៃទី២១ ខែធ្នូ លោកស្រី Hua អះអាងថា នេះមិនមែនជារឿងថ្មីដែលអាមេរិកចោទចិនបែបនេះ ប៉ុន្តែចុងក្រោយការចោទប្រកាន់ទាំងអស់សុទ្ធតែមិនមែនជាការពិត។
មន្ត្រីអ្នកនាំពាក្យដដែលនេះក៏បានរិះគន់អាមេរិកវិញដែរជុំវិញការលួចស៊ើបព័ត៌មាន លួចចូល( Hack) ប្រព័ន្ធអ៊ីនធឺណិតប្រទេសផ្សេង និងតាមដានសកម្មភាពរដ្ឋាភិបាលបរទេស ក្រុមហ៊ុន និងបុគ្គលជាច្រើន ដែលធ្វើឡើងដោយស្ថាប័នរដ្ឋរបស់អាមេរិក។ ទង្វើបែបនេះ គឺជាររឿងមិនអាចទទួលយកបានឡើងសម្រាប់ចិន ដ្បិតអាមេរិកតែងតែដើរចោទគេឯងផ្ដេសផ្ដាស ខណៈខ្លួនបែរជាបានធ្វើសកម្មភាពបំពានច្បាប់ដែរនោះ។
«អាមេរិកជាមហាអំណាចលេខ១ តែពោរពេញដោយភាពក្រអឺតក្រទម និងការគិតតែប្រយោជន៍ផ្ទាល់។ អាមេរិកបានធ្វើទុក្ខបុកម្នេញសិទ្ធិអភិវឌ្ឍដោយស្របច្បាប់របស់ប្រទេសផ្សេង ព្រោះតែគំនិតចង្អៀតចង្អល់ និងការគិតចង់ឈ្នះចាញ់ដើម្បីរក្សាអនុត្តរភាពរបស់ខ្លួន។» នេះសម្ដីរិះគន់ធ្ងន់ៗរបស់លោកស្រី Hua ដែលបន្តថា អ្វីដែលអាមេរិកបានធ្វើមិនសមនឹងឈ្មោះជាមហាអំណាចឡើយ និងជាប្រផ្នូលអាក្រក់សម្រាប់ពិភពលោក ហើយក៏ផ្ដល់ផលមិនល្អដែរសម្រាប់អាមេរិកនៅរយៈពេលវែង។
ចំណាត់ការរបស់ក្រុងវ៉ាស៊ីនតោន គឺជាផ្នែកមួយនៃយុទ្ធនាការបង្ក្រាបបទល្មើសតាមប្រព័ន្ធអ៊ីនធឺណិតដែលអាមេរិកចោទចិនថា បានលួចបច្ចេកវិទ្យារបស់អាមេរិកដើម្បីប្រយោជន៍ផ្ទាល់ខ្លួន។ មន្ត្រីជាន់ខ្ពស់នៃការិយាល័យស៊ើបអង្កេតសហព័ន្ធ (FBI) បានប្រាប់ព្រឹទ្ធសភាអាមេរិកកាលពីសប្ដាហ៍មុនថា រដ្ឋាភិបាលមិនត្រឹមលួចព័ត៌មាន ឬផែនការពីស្ថាប័នរដ្ឋអាមេរិកឡើយ តែក៏ចង់បានគំនិតបញ្ញារបស់ប្រជាជនអាមេរិកដែលបានជួយឲ្យសេដ្ឋកិច្ចរីកចម្រើនទៅមុខ៕
© រក្សាសិទ្ធិដោយ thmeythmey.com