អន្តរជាតិ
អធិរាជជប៉ុន អាគីហ៊ីតុ ថ្លែងសារក្នុងថ្ងៃចម្រើនព្រះជន្មចុងក្រោយ មុនដាក់រាជ្យ អធិរាជជប៉ុន អាគីហ៊ីតុ (កណ្ដាល) ឈរអមដោយអធិរាជនី មីឈីកុ (ស្ដាំ) និងរជ្ជទាយាទ ណារ៉ូហ៊ីតុ ដែលត្រូវសោយរាជ្យបន្ត។ (រូបភាព AFP)
× ព្រះចៅអធិរាជជប៉ុន អាគីហ៊ីតុ បានថ្លែងសារទៅកាន់ប្រជាជាតិជប៉ុននៅថ្ងៃទី២៣ ខែធ្នូនេះ ដោយបានសង្កត់ធ្ងន់ពីសន្តិភាពក្នុងរាជ្យរបស់ទ្រង់។ ការថ្លែងសារនេះ ធ្វើឡើងនាឱកាសថ្ងៃចម្រើនព្រះជន្មគម្រប់៨៥វស្សា ខណៈព្រះអង្គនឹងដាក់រាជ្យសម្បត្តិនៅឆ្នាំ២០១៩ ខាងមុខ ហើយរជ្ជទាយាទណារ៉ូហ៊ីតុ នឹងសោយរាជ្យបន្ត។ ព្រះអង្គ គឺជាអធិរាជជប៉ុនដំបូងគេ ដែលត្រូវអនុញ្ញាតឲ្យដាក់រាជ្យ ខណៈច្បាប់ជប៉ុនកំណត់ថា អធិរាជត្រូវកាន់តំណែងអស់មួយព្រះជន្ម។
ថ្ងៃទី២៣ ខែធ្នូ ឆ្នាំ២០១៨ ជាថ្ងៃចម្រើនព្រះជន្មចុងក្រោយរបស់ព្រះអធិរាជជប៉ុន អាគីហ៊ីតុ មុនពេលទ្រង់យាងចូលនិវត្តន៍ក្រោមហេតុផលព្រះរាជសុខភាពមិនអំណោយផល។ ទ្រង់ឡើងសោយរាជ្យជាអធិរាជទី១២៥ របស់ជប៉ុននៅឆ្នាំ១៩៨៩ បន្តពីបិតាព្រះចៅអធិរាជ Showa ។ ជិត៣០ឆ្នាំនៃការគ្រងរាជ្យ អធិរាជអង្គនេះបានទទួលការស្រឡាញ់យ៉ាងខ្លាំងពីប្រជាជនជប៉ុន ពិសេសលើការទទួលស្គាល់កំហុសរបស់ជប៉ុនក្នុងសម័យសង្គ្រាមលោកលើកទី២ ។
ក្នុងការថ្លែងសារដ៏កម្រទៅកាន់ប្រជាជននាឱកាសថ្ងៃចម្រើនព្រះជន្ម៨៥វស្សា ព្រះចៅណារ៉ូហ៊ីតុមានបន្ទូលសង្កត់ធ្ងន់ពីរជ្ជកាលរបស់ទ្រង់ដែលមានសន្តិភាព និងបានអរគុណប្រជាជនជប៉ុន និងអធិរាជនីមីឈីកុ ដែលបាននៅក្បែរទ្រង់៦០ឆ្នាំមកនេះ។ ព្រះអង្គ ក៏បានរំឭកដល់ការបាត់បង់ជីវិតមនុស្សច្រើនរាប់មិនអស់ក្នុងសម័យសង្គ្រាមលោក ដែលពេលនោះជប៉ុនស្ថិតក្រោមរជ្ជកាលរបស់អធិរាជ Showa ដែលជាបិតារបស់ទ្រង់ផ្ទាល់។
«ខ្ញុំជឿថា វាជាការសំខាន់ដែលមិនត្រូវភ្លេចឡើយជីវិតជាច្រើនដែលបាត់បង់ក្នុងសង្គ្រាមលោកលើកទី២ ព្រមទាំងសន្តិភាព និងវិបុលភាពរបស់ជប៉ុនដែលត្រូវបានកសាងឡើងដោយការលះបង់ដោយមិននឿយហត់របស់ប្រជាជនជប៉ុន។» នេះជាសុន្ទរកថាចុងក្រោយសម្រាប់ថ្ងៃចម្រើនព្រះជន្មរបស់ទ្រង់ មុនបន្តទៀតថា ការបង្រៀនប្រវត្តិសាស្ត្រនេះទៅកាន់ក្មេងជំនាន់ក្រោយ ក៏ជាចំណុចសំខាន់ផងដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ក្នុងពេលសោយរាជ្យជាច្រើនមកនេះ អធិរាជ អាគីហ៊ីតុ បានយាងធ្វើដំណើរទៅកាន់បរទេស និងថ្លែងសុន្ទករថាស្ដីពីនយោបាយសន្តិភាពរបស់ជប៉ុន ទោះជាមានអ្នកនយោបាយអភិរក្សនៅជប៉ុនបន្តចង់ឃើញជប៉ុនខ្លាំងក្លាផ្នែកយោធាក្ដី។ ទ្រង់មិនភ្លេចឡើយទង្វើឃោតឃៅពីអតីតកាលរបស់យោធាជប៉ុននៅប្រទេសជាច្រើននៅអាស៊ី ហើយទ្រង់ក៏បានទទួលស្គាល់កំហុសនេះ រួចក៏សុំទោសជារឿយៗចំពោះទង្វើដែលចារក្នុងប្រវតិ្តសាស្ត្រមួយនេះ។
តាមការកំណត់របសច្បាប់ពិសេសដែលនឹងអនុវត្តសម្រាប់តែទ្រង់មួយអង្គនោះ អធិរាជ អាគីហ៊ីតុ នឹងដាក់រាជ្យសម្បត្តិនៅថ្ងៃទី៣០ ខែមេសា ហើយរាជបុត្រ ណារ៉ូហ៊ីតុ ដែលជារជ្ជទាយាទ នឹងឡើងគ្រងរាជ្យនៅថ្ងៃទី១ ខែឧសភាតែម្ដង។ ក្នុងប្រវត្តិសាស្ត្រជប៉ុន មិនមានឡើយការដាក់រាជ្យបែបនេះ ប៉ុន្តែសម្រាប់អធិរាជបច្ចុប្បន្ន បញ្ហាសុខភាពរ៉ាំរ៉ៃជាឧបសគ្គដ៏ធំសម្រាប់ទ្រង់៕
© រក្សាសិទ្ធិដោយ thmeythmey.com