អន្តរជាតិ
លោក ត្រាំ បង្ខំឲ្យរដ្ឋមន្ត្រីការពារជាតិលាលែងមុនថ្ងៃកំណត់ពីរខែ
× ប្រធានាធិបតី ដូណាល់ ត្រាំ បានសម្រេចចិត្តឲ្យលោក ជេម ម៉ាធីស លាលែងពីតំណែងរដ្ឋមន្ត្រីការពារជាតិនៅដើមខែមករា ឆ្នាំ២០១៩ ខាងមុខ ដោយមិនចាំបាច់រង់ចាំដល់ដំណាច់ខែកុម្ភៈឡើយ។ លោក ម៉ាធីស បានប្រកាសលាលែងពីតំណែងប្រមុខមន្ទីរបញ្ចកោណកាលពីសប្ដាហ៍មុន ព្រោះមានជំហរមិនស្របគ្នាជាមួយលោក ត្រាំ ។ ការលាលែងនេះ បានគ្របដណ្ដប់ពេញប្រព័ន្ធផ្សព្វផ្សាយអាមេរិក ដែលនេះធ្វើឲ្យលោក ត្រាំ មិនសប្បាយចិត្ត ហើយក៏ពន្លឿនពេលការផ្ទេរតំណែងតែម្ដង។
មិនមែនថ្ងៃទី២៨ ខែកុម្ភៈឡើយ ដែលលោក ជេម ម៉ាធីស ត្រូវចាកចេញពីតំណែងរដ្ឋមន្ត្រីការពារជាតិ។ ប្រធានាធិបតី ដូណាល់ ត្រាំ បានសម្រេចចិត្តផ្លាស់ប្ដូរតំណែងរដ្ឋមន្ត្រីការពារជាតិនៅដើមឆ្នាំ២០១៩ តែម្ដង ដោយលោក Patrick Shanahan នឹងជំនួសតំណែងលោក ម៉ាធីស ។ ការតែងតាំងមន្ត្រីជាន់ខ្ពស់ថ្មីប្រចាំមន្ទីរបញ្ចកោណតាមបែបប្រញាប់ប្រញាល់បែបនេះ ក៏ព្រោះតែលោក ត្រាំ មិនពេញចិត្តនឹងព័ត៌មានផ្ដោតលើលោក ម៉ាធីស ខ្លាំងពេក។
តាមរយៈពេលបណ្ដាញសង្គម Twitter លោក ត្រាំ ប្រកាសថា លោក Shanahan ដែលកំពុងកាន់តំណែងរដ្ឋលេខាធិការក្រសួងការពារជាតិ នឹងកាន់តំណែងរដ្ឋមន្ត្រីស្ដីទីការពារជាតិចាប់ពីថ្ងៃទី១ ខែមករា ឆ្នាំ២០១៩ តទៅ។ លោក ត្រាំ បានសរសើរលោក Shanahan ជាមនុស្សមានសមត្ថភាព និងមានគុណសម្បត្តិយ៉ាងច្រើនពេលកាន់តំណែងជារដ្ឋលេខាធិការ និងពេលធ្វើការនៅ Boeing ហើយលោករំពឹងថា រដ្ឋមន្ត្រីស្ដីទីការពារជាតិ នឹងធ្វើការបានល្អមិនខាន។
តាមពិតទៅ លោក ម៉ាធីស ដែលបានប្រកាសលាលែងពីតំណែងកាលពីថ្ងៃទី២០ ខែធ្នូ ត្រូវចាកចេញនៅដំណាច់ខែកុម្ភៈឯណោះទេ ប៉ុន្តែព័ត៌មានស្ដីពីការចាកចេញរបស់លោក ធ្វើឲ្យលោក ត្រាំ សង្កៀរត្រចៀកខ្លាំង។ ទោះបានសរសើរពីដំបូងក្ដី លោក ត្រាំ បែរជារិះគន់លោក ម៉ាធីស តាម Twitter ដោយអះអាងថា ឧត្តមសេនីយ៍ចូលនិវត្តន៍រូបនេះ ត្រូវបានលោក បារ៉ាក់ អូបាម៉ា បញ្ចប់តំណែង ហើយលោកជាអ្នកផ្ដល់ឱកាសលើកទី២ ឲ្យអតីតមេទ័ពរូបនេះ។
មានមូលហេតុចម្បងដែលនាំឲ្យមានការសម្រេចចិត្តចាកចេញរបស់លោក ម៉ាធីស ។ ការបញ្ជូនទ័ពទៅព្រំដែនម៉ិកស៊ិក, ការបង្កើតកងទ័ពអវកាស ក៏ដូចជាការគំរាមកំហែងសម្ព័ន្ធមិត្តខ្លួនសុទ្ធតែជារឿងដែលអតីតមេទ័ពម៉ារីនជំទាស់ជាមួយចៅហ្វាយនាយរបស់ខ្លួន។ ចុងក្រោយនេះ ការបញ្ជាឲ្យដកទ័ពថ្មើរជើងបន្ទាន់ពីស៊ីរី ក៏ជាការសម្រេចិត្តមួយដែលលោក ម៉ាធីស កាន់តែមិនពេញចិត្តទៀត។ ដូច្នេះជម្រើសចុងក្រោយ គឺមានតែដើរចេញ។
ការចាកចេញរបស់លោក ម៉ាធីស ជារឿងគួរឲ្យសោកស្ដាយមួយ។ មេទ័ពមានរហស្សនាម Mad Dog រូបនេះ ត្រូវបានគេចាត់ទុកជាមនុស្សនឹងធឹងជាងគេនៅក្នុងចំណោមសមាជិកនៃគណៈរដ្ឋមន្ត្រីដ៏រញ៉េរញ៉ៃរបស់លោក ត្រាំ។ មានការបារម្ភថា ការចាកចេញនេះធ្វើឲ្យប៉ះពាល់កាន់តែខ្លាំងលើគោលនយោបាយ និងយុទ្ធសាស្ត្រសន្តិសុខជាតិអាមេរិកផង ហើយរដ្ឋាភិបាលអាមេរិកនឹងមានតែមនុស្សយល់ស្របលោក ត្រាំ គ្មាននរណាហ៊ានចេញមុខជំទាស់ឡើយ៕
Tag:
អាមេរិក
ដូណាល់ ត្រាំ
ជេម ម៉ាធីស
© រក្សាសិទ្ធិដោយ thmeythmey.com