លោក ត្រាំ ថា តួកគីធានាបោសសម្អាត ISIS ឲ្យអស់ពីដីស៊ីរី

អន្តរជាតិ

លោក ត្រាំ ថា តួកគីធានាបោសសម្អាត ISIS ឲ្យអស់ពីដីស៊ីរី

24, Dec 2018 , 9:19 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី២៣ ខែធ្នូ បានប្រកាសថា តួកគីនឹងបោសសម្អាតក្រុមរដ្ឋឥស្លាមឲ្យអស់ពីទឹកដីស៊ីរី។ លោក ត្រាំ ប្រកាសដូចនេះ បន្ទាប់ពីសម្រេចចិត្តដកទ័ពចេញពីស៊ីរី ដែលបង្កជាការភ្ញាក់ផ្អើលយ៉ាងខ្លាំងរហូតដល់មន្ត្រីអាមេរិកសំខាន់ពីររូបលាលែងពីតំណែង។ ក្រោយការប្រកាសដកទ័ពនេះ តួកគីឯណោះក៏ប្រមូលកម្លាំងនៅក្បែរព្រំដែនស៊ីរីដើម្បីត្រៀមធ្វើប្រតិបត្តិការយោធា តែមិនមានវាយក្រុមរដ្ឋឥស្លាម គឺដាក់លើគោលដៅក្រុមឃើដស៊ីរីទៅវិញ។

ប្រធានាធិបតីអាមេរិក ដូណាល់ ត្រាំ បានជជែកតាមទូរសព្ទជាមួយសមភាគីតួកគី តៃយីប អ៊ែរដូហ្កាន់ ជុំវិញជម្លោះនៅស៊ីរី ខណៈអាមេរិកនឹងដកទ័ពថ្មើរជើងរបស់ខ្លួនចេញពីប្រទេសនេះ។ ប្រធានាធិបតីតួកគី អ៊ែរដូហ្កាន់ បានធានាថា តួកគីនឹងកម្ចាត់ក្រុមជ្រុលនិយមរដ្ឋឥស្លាមដែលនៅសេសសល់ក្នុងទឹកដីស៊ីរីឲ្យអស់។ នេះបើតាមការប្រកាសរបស់លោក ត្រាំ តាមបណ្ដាញសង្គម Twitter នៅយប់ថ្ងៃទី២៣ ខែធ្នូ ។

ក្នុងជំនួបពិភាក្សាតាមទូរសព្ទនេះដែរ មេដឹកនាំអាមេរិក និងតួកគីបានពិភាក្សាពីការដកទ័ពអាមេរិកចេញពីស៊ីរី ដែលជារឿងគួរឲ្យភ្ញាក់ផ្អើលបំផុតសម្រាប់ដៃគូ និងអ្នកនយោបាយនៅអាមេរិក។ យោធាអាមេរិកនៅស៊ីរីមានប្រមាណពីរពាន់នាក់ បានចូលរួមក្នុងយុទ្ធនាការចម្រុះអន្តរជាតិដើម្បីបោសសម្អាតក្រុមជ្រុលនិយមរដ្ឋឥស្លាម ដែលមកទល់ពេលនេះបានរងបរាជ័យផ្ទួនៗ និងបាត់បង់ទឹកដែលធ្លាប់គ្រប់គ្រងជាបន្តបន្ទាប់។ ហេតុនេះ ទើបលោក ត្រាំ ចាត់ទុកនេះជាជ័យជម្នះ និងមូលហេតុនៃការដកទ័ព។

ដោយឡែក លោក អ៊ែរដូហ្កាន់ ក៏ប្រកាសជួយសម្រួលការដកទ័ពរបស់អាមេរិកដែរ សំដៅធ្វើយ៉ាងកុំឲ្យមានចន្លោះប្រហោង ដែលនាំអាចប៉ះពាល់ដំណើរការដកទ័ព ក៏ដូចជាការផ្ទេរអំណាចនៅស៊ីរី។ ជាមួយនឹងការស្វាគមន៍ការសម្រេចចិត្តរបស់លោក ត្រាំ មេដឹកនាំតួកគីក៏ត្រៀមខ្លួនរួចហើយក្នុងការគាំទ្រសម្ព័ន្ធយោធាណាតូដើម្បីអនុវត្តការសម្រេចចិត្តរបស់អាមេរិក ខណៈការដកទ័ពនឹងធ្វើឡើងយឺតៗ និងមានការសម្របសម្រួល។

មិនមែនចម្លែកឡើយដែលតួកគីសប្បាយចិត្តនឹងការប្រកាសរបស់លោក ត្រាំ ។ នេះក៏ព្រោះតែទាហានអាមេរិក ជាឧបសគ្គមួយរបស់តួកគីក្នុងការបោសសម្អាតក្រុមឃើដ ដែលតួកគីចាត់ទុកសត្រូវ។ ក្រុមឃើដស៊ីរី YPG ជាកម្លាំងជួរដែលអាមេរិកគាំទ្រ និងផ្គត់ផ្គង់ដើម្បីវាយប្រយុទ្ធនឹងក្រុមរដ្ឋឥស្លាម ហើយក្រោមការឧបត្ថម្ភរបស់អាមេរិក ក្រុមឃើដនេះមានឥទ្ធិពលខ្លាំង និងគ្រប់គ្រងទឹកដីតាមបណ្ដោយព្រំដែនតួកគី-ស៊ីរី។

ក្រោយលោក ត្រាំ ប្រកាសដកទ័ព តួកគីក៏ចាប់ផ្ដើមបង្កើនចំនួនយោធានៅព្រំដែនដែលកាន់កាប់ដោយក្រុមឃើដនៅភាគខាងជើងស៊ីរី។ ក្រុងអង់ការ៉ាទំនង់កម្ចាត់ការគំរាមកំហែងនេះចោល ទាន់អាមេរិកដកការគាំទ្រ។ កន្លងមក តួកគីបានចាត់ទុកក្រុមឃើដស៊ីរី ជាសាខារបស់ក្រុមឃើដនៅតួកគី ដែលបានប្រយុទ្ធតទល់នឹងតួកគី ដើម្បីផ្ដាច់ទឹកដីបង្កើតជារដ្ឋឯករាជ្យតាំងពីឆ្នាំ១៩៨៤ មក៕