អន្តរជាតិ
រោងចក្រផលិតប្រេងដ៏ធំបំផុតរបស់វៀតណាម ចាប់ផ្តើមប្រតិបត្តិការពាណិជ្ជកម្មផ្លូវការ
× រោងចក្រផលិតប្រេងដ៏ធំមួយរបស់វៀតណាម ឈ្មោះថា Nghi Son បានចាប់ផ្តើមបើកប្រតិបត្តិការពាណិជ្ជកម្មជាផ្លូវការ កាលពីថ្ងៃអាទិត្យ ទី២៣ ខែធ្នូ ដោយសង្ឃឹមថា ខ្លួននឹងអាចផ្គត់ផ្គង់តាមតម្រូវការប្រេងឥន្ធនៈក្នុងស្រុកប្រមាណ៤០ភាគរយ នាឆ្នាំ២០១៩ខាងមុខ។
ចាប់ផ្តើមសាងសង់ក្នុងឆ្នាំ២០១៣ រោកចក្រផលិតប្រេង Nghi Son ស្ថិតក្នុងតំបន់សេដ្ឋកិច្ចពិសេស Nghi Son ក្នុងខេត្ត Thanh Hóa ដែលមានចម្ងាយ២០០គីឡូម៉ែត្រពីភាគខាងត្បូងទីក្រុងហាណូយ។
ជាមួយប្រាក់វិនិយោគសរុបជិត៩,៣ពាន់លានដុល្លារ រោកចក្រផលិតប្រេងនេះ មានសមត្ថភាពផលិតប្រេងឆៅរហូតដល់ទៅ ២ម៉ឺនបារ៉ែលក្នុងមួយថ្ងៃក្នុងដំណាក់កាលទីមួយ ដែលស្មើនឹងជាង ៦៨លានបារ៉ែល ក្នុងមួយឆ្នាំ។ យោងតាមសារព័ត៌មានវៀតណាម Vietnam News គិតមកត្រឹមខែធ្នូ ឆ្នាំ២០១៨នេះ រោងចក្រនេះបានផលិតប្រេងឆៅជាង៣៤លានបារ៉ែល និងរកប្រាក់បានជាង៨ទ្រីលានដុល្លារហើយសម្រាប់រដ្ឋាភិបាលវៀតណាម។
រោងចក្រផលិតប្រេង Nghi Son ជាមួយនឹងរោងចក្រផលិតប្រេងមួយទៀតរបស់វៀតណាម ឈ្មោះថា Dung Qua ដែលស្ថិតក្នុងខេត្ត Quang Ngai អាចមានសមត្ថភាពបំពេញតម្រូវការប្រេងឥន្ធនៈក្នុងស្រុកដល់ទៅ៨០ភាគរយ។ ការណ៍នេះអាចធ្វើឲ្យវៀតណាម កាត់បន្ថយការពឹងផ្អែកខ្លាំងលើការនាំចូលប្រេងឥន្ធនៈពីបរទេស។
គួរឲ្យដឹងដែរថា រោងចក្រផលិតប្រេងតម្លៃជាង៩ពាន់លានដុល្លារនេះ មានចំណែកកាន់កាប់ដោយ ក្រុមហ៊ុន Idemitsu Kosan Co ចំនួន ៣៥,១ភាគរយ, ក្រុមហ៊ុនប្រេងឥន្ធនៈរបស់កូវ៉ែតចំនួន ៣៥,១ភាគរយ, ក្រុមហ៊ុនប្រេងឥន្ធនៈ PetroVietnam របស់វៀតណាមចំនួន ២៥,១ភាគរយ និងក្រុមហ៊ុន Mitsui Chemicals Inc ចំនួន៤,៧ភាគរយផងដែរ៕
Tag:
វៀតណាម
សេដ្ឋកិច្ច
ក្រុមហ៊ុនផលិតប្រេង
© រក្សាសិទ្ធិដោយ thmeythmey.com