លោក ប្រាយុទ្ធ ប្រាប់បក្សនយោបាយនានា កុំយកឈ្មោះលោកទៅពាក់ព័ន្ធ

អន្តរជាតិ

លោក ប្រាយុទ្ធ ប្រាប់បក្សនយោបាយនានា កុំយកឈ្មោះលោកទៅពាក់ព័ន្ធ

26, Dec 2018 , 8:19 pm

រូបភាព

ដោយ: តន ចាន់រិទ្ធារ៉ា

នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី២៥ ខែធ្នូ បានព្រមានបក្សនយោបាយនានាកុំយកឈ្មោះលោកទៅពាក់ព័ន្ធក្នុងយុទ្ធនាការស្វែងរកសំឡេងឆ្នោតរបស់ពួកគេ ព្រោះលោកមិនទាន់សម្រេចចិត្តចូលរួមជាមួយបក្សណានៅឡើយទេ។ លោកព្រមានបែបនេះ ខណៈមានបក្សនយោបាយខ្លះចង់បានលោក ធ្វើជាបេក្ខជននាយករដ្ឋមន្ត្រីសម្រាប់ការបោះឆ្នោតខែកុម្ភៈ ឆ្នាំ២០១៩ ។

គណបក្សនយោបាយនានានៅថៃ កំពុងធ្វើយុទ្ធនាការស្វែងរកសំឡេងគាំទ្រជាបណ្ដើរៗហើយសម្រាប់ការបោះឆ្នោតថ្ងៃទី២៤ ខែកុម្ភៈ ឆ្នាំ២០១៩ ។ ឯលោក ប្រាយុទ្ធ ចន្ទអូចា វិញ និយាយថា មានបក្សជាច្រើនចាប់អារម្មណ៍រូបលោកឲ្យធ្វើជាបេក្ខជននាយករដ្ឋមន្ត្រីរបស់ពួកគេ។ ប៉ុន្តែលោកបានប្រាប់ឲ្យបក្សទាំងនោះប្រុងប្រយ័ត្ន និងកុំទាន់ប្រើប្រាស់ឈ្មោះលោក ព្រោះលោកមិនទាន់ប្រកាសចូលរួមអ្វីទេ។

លោក ប្រាយុទ្ធ ឆ្លើយដូចនេះតបនឹងសំណួរពាក់ព័ន្ធបក្ស Palang Pracharath ដែលជាបក្សគាំទ្រលោកជានាយករដ្ឋមន្ត្រី។ នេះក៏ព្រោះតែកាលពីសប្ដាហ៍មុន ក្នុងយុទ្ធនាការនៅខេត្ត Phitsanulok បក្សនេះបានលើកបដាដែលគាំទ្រលោក ប្រាយុទ្ធ ជាបេក្ខជននាយករដ្ឋមន្ត្រីក្រោយការបោះឆ្នោតឆ្នាំ២០១៩ ។ មន្ត្រីជាន់ខ្ពស់បក្សក៏បង្ហាញជំហរគាំទ្រមេដឹកនាំរដ្ឋប្រហារឆ្នាំ២០១៤ ឲ្យបន្តដឹកនាំប្រទេសទៀតដែរ។

យ៉ាងណាមិញ លោក ប្រាយុទ្ធ បានព្រមានបក្សមួយនេះ និងប្រាប់ពួកគេកុំឲ្យភ្ជាប់រូបលោកទៅនឹងបក្សនយោបាយឲ្យសោះ។ បើតាមកាសែតបាងកកប៉ុស្តិ៍ ប្រមុខរដ្ឋាភិបាលយោធារូបនេះបញ្ជាក់ថា ដរាបណាលោកមិនទាន់សម្រេចចិត្តទទួលយកសំណើធ្វើជាបេក្ខជននាយករដ្ឋមន្ត្រី ពួកគេមិនគួរធ្វើបែបនោះឡើយ។

តាមពិតទៅ វាមិនមែនជារឿងចម្លែកឡើយ ដែលបក្ស Palang Pracharath ចង់ឲ្យលោក ប្រាយុទ្ធ បន្តអង្គុយកៅអីនាយករដ្ឋមន្ត្រីឡើយ ព្រោះបក្សនេះមានទំនាក់ទំនងជិតស្និទ្ធជាមួយរបបយោធា ហើយរដ្ឋមន្ត្រីខ្លះនៃរដ្ឋាភិបាលលោក ប្រាយុទ្ធ ជាស្ថាបនិកបក្សនេះផង។ ប៉ុន្តែលោក ប្រាយុទ្ធ ហាក់មិនចង់ឲ្យមានទំនាក់ទំនងជាមួយបក្សណាឡើយ សំដៅចៀសវាងពាក្យរិះគន់ថា លោកកេងចំណេញតំណែងរដ្ឋដើម្បីផលប្រយោជន៍នយោបាយខ្លួនឯង។

ដោយឡែក លោក ប្រាយុទ្ធ ដែលជាអតីតមេទ័ពជើងគោកភូមិន្ទថៃ ក៏មិនទាន់សម្រេចចិត្តយ៉ាងណាឡើងចំពោះអនាគតនៅឡើយដែរ។ ប៉ុន្តែគេជឿថា លោកនឹងបន្តអាជីពនយោបាយក្រោយការបោះឆ្នោតឆ្នាំ២០១៩ ដែលថៃនឹងវិលទៅរកប្រជាធិបតេយ្យវិញ។ ដ្បិតកំពុងកាន់តំណែងជាមេដឹកនាំរបបយោធានៅឡើយនោះ លោក ប្រាយុទ្ធ បានអំពាវនាវឲ្យបក្សទាំងអស់គោរពច្បាប់ធម្មនុញ្ញ និងច្បាប់ពាក់ព័ន្ធការបោះឆ្នោត៕