ចុងក្រោយសភាថៃបានសម្រេចវិសោធនកម្មច្បាប់គ្រឿងញៀនឆ្នាំ ១៩៧៩ ដើម្បីអនុញ្ញាតឲ្យមានការប្រើប្រាស់កញ្ឆាក្នុងគោលដៅការព្យាបាលជំងឺ និងស្រាវជ្រាវវេជ្ជសាស្ត្រ។ ថៃក្លាយជាប្រទេសដំបូងគេក្នុងតំបន់អាស៊ីអាគ្នេយ៍ដែលអនុញ្ញាតឲ្យមានការប្រើប្រាស់កញ្ឆាដោយស្របច្បាប់បែបនេះ។
ក្នុងកិច្ចប្រជុំសភាថែមម៉ោងថ្ងៃអង្គារទី ២៥ ខែធ្នូ មុនថ្ងៃឈប់សម្រាកឆ្លងឆ្នាំមកដល់ សមាជិកសភាថៃបាននាំគ្នាបោះឆ្នោតគាំទ្រការកែប្រែច្បាប់គ្រប់គ្រងគ្រឿងញៀនឆ្នាំ ១៩៧៩ ដោយត្រួសត្រាយផ្លូវឲ្យមានការប្រើប្រាស់កញ្ឆាដោយស្របច្បាប់។
យោងតាមទីតាមភ្នាក់ងារព័ត៌មាន Reuters ថៃក្លាយជាប្រទេសទីមួយដែលអនុញ្ញាតឲ្យមានការប្រើប្រាស់កញ្ឆាក្នុងក្របខណ្ឌស្រាវជ្រាវសុខាភិបាល និងព្យាបាលជំងឺជាដើម។ ប៉ុន្តែគ្មានការបើកផ្លូវឲ្យប្រជាជនប្រើប្រាស់កញ្ឆាក្នុងការកម្សាន្តដូចនៅកាណាដា និងរដ្ឋមួយចំនួននៅអាមេរិកនោះឡើយ។
«វាជាអំណោយឆ្នាំថ្មីពីសភានីតិបញ្ញត្តិជាតិសម្រាប់រដ្ឋាភិបាល និងប្រជាជនថៃ»។ នេះជាការអះអាង របស់លោក Somchai Sawangkarn ដែលជាប្រធានគណៈកម្មការពង្រាងច្បាប់តាមកញ្ចក់ទូរទស្សន៍ថៃ។ លោកបន្ថែមថាចាប់ពីពេលនេះទៅ ប្រជាជនដែលមានជំងឺរ៉ាំរ៉ៃនិងត្រូវការកញ្ឆាដើម្បីព្យាបាលជំងឺលែងបារម្ភទៀតហើយ។
កញ្ឆាត្រូវបានប្រើប្រាស់ជាលក្ខណៈប្រពៃណីនៅក្នុងប្រទេសថៃរាប់ទសវត្សដើម្បីជួយកាត់បន្ថយការឈឺច្បាប់និងការហត់នឿយ។ ប៉ុន្តែចាប់ពីឆ្នាំ ១៩៣០ វាលែងមានការប្រើប្រាស់កញ្ឆាដោយសេរីទៀតនៅ ថៃ។ ឆ្នាំ ១៩៣៥ ការជួញដូរ និងទិញកញ្ឆាក្លាយជាបទឧក្រិដ្ឋ ហើយច្បាប់ឆ្នាំ ១៩៧៩ ក៏មានដាក់ទោសទណ្ឌលើអ្នកជួញដូរនិងប្រើប្រាស់កញ្ឆាដែរ។
តាមពិតទៅ រដ្ឋាភិបាលថៃបានបញ្ជូនសេចក្តីព្រាងច្បាប់អនុញ្ញាតឲ្យប្រើប្រាស់កញ្ឆាទៅសភានីតិបញ្ញត្តិថៃឲ្យពិនិត្យ និងអនុម័តតាំងដើមខែវិច្ឆិកាម្ល៉េះ។ ក្រោយការអនុម័តច្បាប់ថ្មីនេះ គេរំពឹងថា នៅពេលអនាគត ថៃនឹងបើកផ្លូវឲ្យមានការប្រើប្រាស់កញ្ឆាក្នុងគោលដៅកម្សាន្តផងដែរ។
ការជួញដូរ ឬប្រើប្រាស់កញ្ឆាជារឿងខុសច្បាប់នៅរាល់បណ្តារដ្ឋអាស៊ីទាំងមូល ហើយនៅរដ្ឋខ្លះនៅអាស៊ានក៏មានការពិន័យធ្ងន់ធ្ងរផងដែរ។ កាលពីវិច្ឆិកា កូរ៉េខាងត្បូងក៏បានសម្រេចកែប្រែច្បាប់អនុញ្ញាតឲ្យមានការប្រើប្រាស់កញ្ឆាក្នុងវិស័យសុខាភិបាលដូចគ្នា។ នៅឥណ្ឌូណេស៊ី ម៉ាឡេស៊ី និងសិង្ហបុរី ការជួញដូរទំនិញប្រភេទនេះប្រឈមនឹងការកាត់ទោសប្រហារជីវិតថែមទៀត។
យ៉ាងណាមិញ បញ្ហាមួយកើតឡើងនៅពេលនេះគឺការចែកចាយនិងលក់ដូរកញ្ឆា។ គេបារម្ភថា ក្រុមហ៊ុនបរទេសនឹងកាន់កាប់ទីផ្សារកញ្ឆា ហើយប្រជាជនថៃដែលជាអ្នកជំងឺនិងអ្នកស្រាវជ្រាវក៏ពិបាករកទិញកញ្ឆាសម្រាប់ប្រើប្រាស់ដែរ។ ប៉ុន្តែឧបនាយករដ្ឋមន្ត្រីថៃ Prajin Juntong បានបញ្ជាក់ថា រដ្ឋាភិបាលនឹងកំណត់មើលពីរបៀបនៃការដាំដុះកញ្ឆា និងបរិមាណកញ្ឆាសម្រាប់ការលក់ដូរនៅពេលដែលច្បាប់ថ្មីចូលជាធរមានឆ្នាំក្រោយ៕