ត្រាំ គំរាមបិទរដ្ឋាភិបាលសហព័ន្ធរហូតទាល់តែបានលុយសង់ជញ្ជាំងព្រំដែន

អន្តរជាតិ

ត្រាំ គំរាមបិទរដ្ឋាភិបាលសហព័ន្ធរហូតទាល់តែបានលុយសង់ជញ្ជាំងព្រំដែន

26, Dec 2018 , 9:39 pm

រូបភាព

ដោយ: ថ្មីៗ

ថ្ងៃប្រារព្ធបុណ្យណូអែល ប្រធានាធិបតីអាមេរិក ដូណាល់ ត្រាំ បានប្រកាសជាថ្មីថា លោកមិនបើកដំណើរការរដ្ឋាភិបាលសហព័ន្ធវិញឡើយ ដរាបណាលោកមិនបានទទួលកញ្ចប់លុយប្រាំពាន់លានដុល្លារសម្រាប់សង់ជញ្ជាំង។ រដ្ឋាភិបាលសហព័ន្ធអាមេរិកបានបន្តបិទទ្វារបណ្តោះអាសន្នដោយផ្នែកចាប់តាំងពីថ្ងៃសុក្រទី ២១ ខែធ្នូម្ល៉េះដ្បិតបក្សប្រជាធិបតេយ្យមិនព្រមផ្តល់ហិរញ្ញវត្ថុតាមសំណើរបស់លោក ត្រាំ។

«ខ្ញុំមិនអាចប្រាប់អ្នកបានទេថាពេលណាដែលរដ្ឋាភិបាលនឹងចាប់ផ្តើមបើកដំណើរការឡើងវិញនោះ។ ប៉ុន្តែខ្ញុំអាចប្រាប់បានថា វានឹងមិនបើកដំណើរការឡើងវិញ រហូតទាល់តែយើងមានជញ្ជាំង ឬរបង អាចថាអី្វក៏ដោយតាមដែលយើងចង់ហៅវា»។ លោក ត្រាំ ប្រាប់អ្នកកាសែតបែបនេះពេលស្ថិតនៅសេតវិមាន ក្រោយចូលរួមសន្និសីទតាមទូរសព្ទនាថ្ងៃបុណ្យណូអែលជាមួយកងទ័ពអាមេរិក។

យោងតាមទីភ្នាកងារព័ត៌មាន AFP លោក ត្រាំ បានប្រកាសទាមទារលុយថ្លៃជញ្ជាំងប្រាំពាន់លានដុល្លារជាថ្មី តាមរយៈការបន្តបិទរដ្ឋាភិបាលបណ្តោះអាសន្ននេះ គឺជារឿងចម្រូងចម្រាសបំផុត។ អ្វីដែលគួរឲ្យចាប់អារម្មណ៍លោកក៏ត្រាំ ក៏បញ្ជាក់ជាថ្មីដែរថា លោកពិតជាបានសម្រេចអនុញ្ញាតឲ្យមានកិច្ចព្រមព្រៀងសាងសង់ជញ្ជាំមានចម្ងាយ ១៨៥គីឡូម៉ែត្ររួចទៅហើយដែរនៅរដ្ឋតិចសាស។

តាមសម្តីប្រធានាធិបតីរូបនេះ គម្រោងសាងសង់នេះនឹងចាប់ផ្តើមនៅចុងខែមករាខាងមុខតែម្តង។ ប៉ុន្តែសេតវិមានអាមេរិកបដិសេធលាតត្រដាងឲ្យបានល្អិតល្អន់ពីគម្រោងនេះ។

តាមពិតទៅ ការសាងសង់ជញ្ជាំងព្រំដែនម៉ិកស៊ិកជាចំណុចអាទិភាពនៃនយោបាយអន្តប្រវេសន៍របស់លោក តាំងពីពេលឃោសនាបោះឆ្នោតម្ល៉េះ។ លោកបានទារឲ្យសភាបញ្ចូលលុយប្រាំពាន់លានដុល្លារក្នុងច្បាប់ថវិកាថ្មី ប៉ុន្តែសំណើត្រូវបានបដិសេធដោយបណ្តាសមាជិកបក្សប្រជាធិបតេយ្យ និងសមាជិកបក្សសាធារណរដ្ឋមួយចំនួនផង។

តាមលក្ខខណ្ឌបច្ចេកទេស ដើម្បីអនុម័តសេចក្តីព្រាងច្បាប់ថវិកានៅព្រឹទ្ធសភា វាចាំបាច់មានសំឡេងគាំទ្រ ដល់ទៅ ៦០ ។ បច្ចុប្បន្នបក្សសាធារណរដ្ឋក្តោបក្តាប់អាសនៈភាគច្រើន ៥១ក្នុងព្រឹទ្ធសភា ប៉ុន្តែគេនៅត្រូវការសំឡេងគាំទ្រប្រាំបួនទៀតពីសមាជិកបក្សប្រជាធិបតេយ្យដើម្បីបង្គ្រប់សំឡេង។

លោក ត្រាំ បដិសេធចុះហត្ថលេខាលើសេចក្តីព្រាងច្បាប់ថវិកា ដោយសារលោកមិនបានទទួលលុយសង់ជញ្ជាំងតាមបំណង។ ដោយសារគ្មានការអនុម័តកញ្ចប់ហិរញ្ញវត្ថុសម្រាប់ចាយវាយនេះហើយ ទើបវាណ្តាលឲ្យក្រសួង និងទីភ្នាក់ងាររដ្ឋាភិបាលសហព័ន្ធអាមេរិកជាច្រើនត្រូវផ្អាកសកម្មភាពបណ្តោះអាសន្នដោយសារខ្វះលុយ។

តាមការព្រមានរបស់លោក ត្រាំ ការបិទរដ្ឋាភិបាលនេះប្រហែលជានឹងមានរយៈពេលយូរផង។ ប៉ុន្តែទោះជាត្រូវបិទរយៈពេលខ្លីឬវែងក្តី វាជះឥទ្ធិពលអាក្រក់ដោយសារបុគ្គលិករាប់សែននាក់ដែលបម្រើការងារក្នុងរដ្ឋាភិបាលសហព័ន្ធត្រូវបង្ខំឲ្យធ្វើការងារដោយមិនទទួលបានកម្រៃ ឬក៏ត្រូវបង្ខំឲ្យសម្រាកពីការងារពេលនេះសិនដែរ។ ចំណែកប្រតិបត្តិការជំនួញនានានៅអាមេរិកក៏រងផលប៉ះពាល់ដូចគ្នា។

ព្រឹទ្ធសភាអាមេរិកបានវាយតម្លៃពីផលប៉ះពាល់នៃការបិទរដ្ឋាភិបាលបណ្តោះអាសន្នដែរ។ ការបិទរដ្ឋាភិបាលនេះប៉ះពាល់ដល់ក្រសួងចំនួនប្រាំបួនក្នុងចំណោមក្រសួងទាំងអស់ ១៥ ហើយទីភ្នាក់ងារសំខាន់ៗចំនួនច្រើនជាងដប់ដែលត្រូវផ្អាកដំណើរការ។ បុគ្គលិកបម្រើការងារទាំងអស់ប្រហែល ប្រាំបីសែននាក់នឹងមិនទទួលបានប្រាក់កម្រៃ ក្នុងនោះមាន ៤២ ម៉ឺននាក់ត្រូវបន្តធ្វើការងារដោយគ្មានប្រាក់កម្រៃ ខណៈ៣៨ ម៉ឺននាក់ផ្សេងទៀតត្រូវផ្អាកការងារតែម្តង។

ជុំវិញការបិទរដ្ឋាភិបាលនេះ សមាជិកព្រឹទ្ធសភានិងជាមេដឹកនាំបក្សប្រជាធិបតេយ្យ Chuck Schumer បានផ្ដាំទៅប្រធានាធិបតីថា បំណងសាងសង់ជញ្ជាំងត្រូវតែបោះបង់ចោល ហើយត្រូវបើករដ្ឋាភិបាលឡើងវិញ៕