តួកគី៖ការទិញមីស៊ីលអាមេរិក មិនប៉ះពាល់ការទិញខែលការពារអាកាសរុស្ស៊ី S-400 ឡើយ

អន្តរជាតិ

តួកគី៖ការទិញមីស៊ីលអាមេរិក មិនប៉ះពាល់ការទិញខែលការពារអាកាសរុស្ស៊ី S-400 ឡើយ

26, Dec 2018 , 4:42 pm

រូបភាព

ដោយ:

បន្ទាប់ពីក្រុងវ៉ាស៊ីនតោនព្រមលក់ប្រព័ន្ធមីស៊ីល ក្នុងទំហំទឹកប្រាក់រាប់ពាន់លានដុល្លារឲ្យតួកគី អ្នកនាំពាក្យប្រធានាធិបតីតួកគី បានបញ្ជាក់នៅថ្ងៃទី ២៤ ខែធ្នូថា ការបញ្ជាទិញប្រព័ន្ធមីស៊ីលអាមេរិកនេះ មិនប៉ះពាល់ដល់កិច្ចព្រមព្រៀងទិញប្រព័ន្ធមីស៊ីល S-400 ពីរុស្ស៊ីឡើយ។

កាលពីថ្ងៃទី ១៩ ខែធ្នូ ក្រសួងការបរទេសអាមេរិក បានប្រកាសថា ខ្លួនបានជូនដំណឹងដល់សភាអាមេរិក ទាក់ទងនឹងគម្រោងលក់ប្រព័ន្ធមីស៊ីល Patriot ដែលមានទំហំទឹកប្រាក់ ៣,៥ពាន់លានដុល្លារ។ ក្នុងចំណោមនោះគឺមានដូចជា ប្រព័ន្ធមីស៊ីល Patriot ចំនួន ៨០ និងមីស៊ីលស្ទាក់ចាប់ PAC-3 ចំនួន ៦០ និងសម្ភារៈយោធាផ្សេងៗទៀត។

យោងតាមការចុះផ្សាយរបស់ទីភ្នាក់ងារព័ត៌មាន AFP លោក Ibrahim Kalin អ្នកនាំពាក្យប្រធានាធិបតីតួកគី បានអះអាងនៅថ្ងៃចន្ទថា ៖ «ដំណើរការលក់ប្រព័ន្ធមីស៊ីល Patriot របស់អាមេរិក ពុំប៉ះពាល់ដល់កិច្ចព្រមព្រៀង S-400 ជាមួយរុស្ស៊ីនោះឡើយ»។

គម្រោងទិញប្រព័ន្ធការពារមីស៊ីល S-400 របស់តួកគី បានរងការរិះគន់យ៉ាងខ្លាំងពីបណ្តាសម្ព័ន្ធមិត្តក្នុងអង្គការណាតូ និងសហរដ្ឋអាមេរិក។ យ៉ាងណាមិញ រដ្ឋាភិបាលតួកគីធ្លាប់បានបញ្ជាក់ពីមុនមកថា ខ្លួនត្រូវការប្រព័ន្ធការពារមីស៊ីល S-400 ជាចាំបាច់។ សារព័ត៌មានតួកគី បានចុះផ្សាយថា ការបញ្ជូនប្រព័ន្ធ S-400 ពីរុស្ស៊ីជុំទីមួយ នឹងត្រូវធ្វើឡើងនាឆ្នាំ២០១៩។

គេមើលឃើញថា ការបញ្ជាទិញសព្វាវុធ S-400 បង្ហាញពីទំនាក់ទំនងកាន់តែជិតស្និទ្ធរវាងរុស្ស៊ី និងតួកគី ក្រោមការដឹកនាំរបស់លោក វ្ល៉ាឌីមៀ ពូទីន និងប្រធានាធិបតីរុស្ស៊ី និងលោក Recep Tayyip Erdoğan មេដឹកនាំតួកគី។ ទន្ទឹមនឹងគ្នានេះ បុរសខ្លាំងទាំងពីរនាក់នេះ ក៏បាន និងកំពុងស្វះស្វែងរកដំណោះស្រាយបញ្ចប់សង្គ្រាមដ៏រ៉ាំរ៉ៃរយៈពេល៨ឆ្នាំនៅស៊ីរី ។

តួកគីបានជួយគាំទ្រដល់ក្រុមបះបោរស៊ីរី ដើម្បីទម្លាក់ប្រធានាធិបតីស៊ីរី បាសា អាល់អាសាដ ចេញពីតំណែង ប៉ុន្តែការអន្តរាគមន៍របស់រុស្ស៊ីក្នុងសង្គ្រាមស៊ីរីក្នុងឆ្នាំ២០១៥ បានជួយដល់របបដឹកនាំក្រុងដាម៉ាស់អាចមានប្រៀបក្នុងសង្គ្រាម និងដណ្តើមកាន់កាប់ទឹកដីមួយចំណែកធំស៊ីរីឡើងវិញមកដល់បច្ចុប្បន្នផង៕