ជប៉ុនពិចារណាបញ្ជូននាវាទៅចូលរួមប្រតិបត្តិការយោធាជាមួយចិន ក្រោយទំនាក់ទំនងល្អប្រសើរ

អន្តរជាតិ

ជប៉ុនពិចារណាបញ្ជូននាវាទៅចូលរួមប្រតិបត្តិការយោធាជាមួយចិន ក្រោយទំនាក់ទំនងល្អប្រសើរ

27, Dec 2018 , 8:39 am

រូបភាព

ដោយ:

រដ្ឋាភិបាលជប៉ុនកំពុងពិចារណាបញ្ជូននាវាចម្បាំងទៅចូលរួមប្រតិបត្តិការយោធា ជាមួយកងទ័ពជើងទឹកចិន ដែលគ្រោងរៀបចំឡើង នាខែមេសាឆ្នាំ២០១៩។ គម្រោងនេះធ្វើឡើង ស្របពេលដែលប្រទេសទាំងពីរកំពុងព្យាយាមពង្រឹងចំណងទាក់ទងក្នុងវិស័យការពារជាតិ បន្ទាប់ពីទំនាក់ទំនងការទូតមានភាពល្អប្រសើរជាងមុនច្រើន។

បើសិនជាការបញ្ជូននេះអាចធ្វើឡើងបាន តាមការគ្រោងទុកមែននោះ វានឹងក្លាយជាប្រតិបត្តិការយោធាលើកទីមួយបង្អស់ហើយ ដែលនាវាចម្បាំងជប៉ុនត្រូវបានបញ្ជូនទៅកាន់ដែនទឹកចិន ចាប់តាំងពីឆ្នាំ២០១១មក។ ប្រតិបត្តិការយោធារបស់ចិន ដែលគ្រោងនឹងត្រូវរៀបចំឡើងនាថ្ងៃទី ២៣ ខែមេសា នាទីក្រុង Qingdao ភាគខាងកើតចិន មានគោលដៅដើម្បីរម្លឹកដល់ខួបទី៧០ឆ្នាំនៃការបង្កើតទ័ពជើងទឹករបស់ចិន។

យោងតាមទីភ្នាក់ងារព័ត៌មាន Kyodo នាយករដ្ឋមន្ត្រីជប៉ុន ស៊ីនហ្សូ អាបេ បានយល់ព្រមជាមួយប្រធានាធិបតីចិន ស៊ី ជិនភីង និងនាយករដ្ឋមន្ត្រីចិន លី ឃឹឈាំង ក្នុងរដ្ឋធានីប៉េកាំង ក្នុងជំនួបកាលពីខែតុលាកន្លងទៅ ស្តីពីចាប់ផ្តើមទំនាក់ទំនងកងទ័ពជើងទឹកជាមួយគ្នាឡើងវិញ។ ទន្ទឹមនឹងគ្នានេះដែរ ជប៉ុនក៏ប្រហែលជាត្រៀមអញ្ជើញកងទ័ពជើងទឹកចិន ដើម្បីឲ្យចូលរួមប្រតិបត្តិការនាវាយោធា ដែលគ្រោងនឹងរៀបចំនាខែកញ្ញា ឆ្នាំ២០១៩ខាងមុខ។ នេះបើតាមការឲ្យដឹងពីប្រភពរដ្ឋាភិបាលជប៉ុន។

គួររម្លឹកដែរថា នាវាចម្បាំងជប៉ុន និងចិនធ្លាប់មានទស្សនកិច្ចទៅវិញទៅមក ចាប់ពីឆ្នាំ២០០៧ ដលល់ឆ្នាំ២០១១ ប៉ុន្តែត្រូវបានផ្អាកទៅវិញ នៅពេលដែលរដ្ឋាភិបាលក្រុងតូក្យូបានដណ្តើមកាន់កាប់ប្រជុំកោះ Diaoyou ក្នុងសមុទ្រចិនខាងកើត ដែលជប៉ុនបានហៅឈ្មោះថា ប្រជុំកោះ Senkaku កាលពីឆ្នាំ២០១២កន្លងទៅ។ ការណ៍នេះបានបណ្តាលឲ្យទំនាក់ទំនងរវាងប្រទេសទាំងពីរធ្លាក់ចុះជាខ្លាំង។

មែនទែនទៅ ចំណងទាក់ទងរវាងរដ្ឋទាំងពីរក្នុងតំបន់អាស៊ីបូព៌ានេះ មានភាពល្អប្រសើរឡើងវិញកាលពីថ្មីៗនេះ ក្រោយពីលោកនាយករដ្ឋមន្ត្រី អាបេ បានធ្វើទស្សនកិច្ចទៅកាន់ទីក្រុងប៉េកាំងកាលពីខែតុលាកន្លងទៅ។ ការចូលទៅជាន់ដីចិនរបស់លោកអាបេ ជាទស្សនកិច្ចផ្លូវការទីមួយរបស់មេដឹកនាំនយោបាយជប៉ុន ក្នុងរយៈពេល៧ឆ្នាំចុងក្រោយនេះ។

ក្នុងអំឡុងទស្សនិច្ចនេះដែរ លោក ស៊ី ជិនភីង បានប្រាប់ទៅកាន់នាយករដ្ឋមន្ត្រីជប៉ុនថា លោកនឹងពិចារណារៀបចំទស្សនកិច្ចមួយទៅកាន់ប្រទេសជប៉ុននាឆ្នាំក្រោយនេះ។ ហើយបើសិនវាកើតឡើងមែននោះ វានឹងក្លាយជាទស្សនកិច្ចទីមួយបង្អស់ផងដែររបស់មេដឹកនាំចិន ក្នុងរយៈពេល១១ឆ្នាំចុងក្រោយនេះ៕