កូរ៉េទាំងពីរបុកគ្រឹះដើម្បីតភ្ជាប់ផ្លូវថ្នល់ និងរថភ្លើងនៅតាមព្រំដែន

អន្តរជាតិ

កូរ៉េទាំងពីរបុកគ្រឹះដើម្បីតភ្ជាប់ផ្លូវថ្នល់ និងរថភ្លើងនៅតាមព្រំដែន

26, Dec 2018 , 10:19 pm

រូបភាព

ដោយ: តន ចាន់រិទ្ធារ៉ា

កូរ៉េទាំងពីរ នៅថ្ងៃទី២៦ ខែធ្នូ បានរៀបចំពិធីបុកគ្រឹះរួមគ្នាដើម្បីធ្វើទំនើបកម្ម និងតភ្ជាប់ផ្លូវថ្នល់ និងផ្លូវរថភ្លើងឆ្លងកាត់ព្រំដែនខណ្ឌចែកឧបទ្វីបកូរ៉េ។ ទោះគ្រាន់តែជានិមិត្តរូបមែន ការតភ្ជាប់នេះជាការបើកចំហរវាងកូរ៉េទាំងសងខាង និងជាឆន្ទៈបង្រួបបង្រួមគ្នាផងដែរ។ ពិធីដែលធ្វើឡើងនៅក្នុងទឹកដីកូរ៉េខាងជើង និងមានការចូលរួមពីមន្ត្រីប្រទេសជិតខាងកូរ៉េ កើតឡើងបន្ទាប់ពីការត្រួតពិនិត្យគុណភាពផ្លូវរួមគ្នាជាច្រើនថ្ងៃរួចមក។

ប្រតិភូកូរ៉េខាងត្បូងមួយក្រុមដែលមានគ្នាប្រមាណ១០០នាក់ បានជិះរទេះភ្លើងឆ្លងកាត់ព្រំដែនទៅកាន់កូរ៉េខាងជើង ដើម្បីចូលរួមក្នុងពិធីបុកគ្រឹះតភ្ជាប់ផ្លូវរវាងកូរ៉េទាំងពីរនៅឯស្ថានីយ៍រថភ្លើង Panmun ក្នុងទីក្រុង Kaesong ។ នេះជាលើកដំបូងដែលរថភ្លើងកូរ៉េខាងត្បូងឆ្លងកាត់ពីភ្នំ Kumgang ទៅកាន់ទន្លេ Tumen តាមបណ្ដោយឆ្នេរភាគខាងកើតចាប់តាំងពីការបែងចែកកូរ៉េជាពីរក្រោយចប់សង្គ្រាមឆ្នាំ១៩៥០-១៩៥៣ ។

ក្រុមមន្ត្រីកូរ៉េខាងត្បូងដឹកនាំដោយរដ្ឋមន្ត្រីបង្រួបបង្រួម Cho Myoung-gyon និងរដ្ឋមន្ត្រីដឹកជញ្ជូន Kim Hyun-mee និងមានការចូលរួមពីមន្ត្រីសភាផង ឯប្រតិភូកូរ៉េខាងជើងដឹកនាំដោយលោក Ri Son-gwon ដែលជាប្រធានគណៈកម្មាធិការសម្រាប់ការបង្រួបបង្រួមកូរ៉េ។ មន្ត្រីជាន់ខ្ពស់ផ្នែកដឹកជញ្ជូនមកពីប្រទេសក្បែរខាងឧបទ្វីបកូរ៉េដូចជារុស្ស៊ី និងម៉ុងហ្គោលីជាដើម សុទ្ធតែបានចូលរួមក្នុងកម្មវិធីសំខាន់មួយនេះ។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។

តាមពិតទៅ ពិធីបុកគ្រឹះនេះ គ្រាន់តែជានិមិត្តរូបនៃការចាប់ផ្ដើមគម្រោងរួមគ្នាប៉ុណ្ណោះ គ្មានសកម្មភាពជាក់ស្ដែងឡើយ។ ការតភ្ជាប់ និងធ្វើការទំនើបកម្មផ្លូវថ្នល់ និងផ្លូវរថភ្លើងរបស់កូរ៉េខាងជើងពិតប្រាកដ ត្រូវរង់ចាំលទ្ធផលនៃការចរចារំសាយនុយក្លេអ៊ែរសិន ហើយម្យ៉ាងក៏ត្រូវដោះស្រាយទណ្ឌកម្មរាប់សិបជាន់លើកូរ៉េខាងជើងដែរ។ ក្រសួងបង្រួបបង្រួមរបស់កូរ៉េខាងត្បូងបញ្ជាក់ថា ក្រុងសេអ៊ូលនឹងត្រួតពិនិត្យស្ថានភាពផ្លូវកូរ៉េខាងជើងបន្ថែមទៀតក្រោយពិធីខាងលើ។

ទោះជាយ៉ាងណា មន្ត្រីកូរ៉េទាំងពីរសុទ្ធតែបង្ហាញក្ដីសង្ឃឹមវិជ្ជមានដូចគ្នាលើគម្រោងរួមនេះ។ លោកស្រី Kim និយាយថា ការតភ្ជាប់នេះ ជាការបោះជំហានទៅមុខ និងជាការបើកទ្វារដែលបានបិទជិតអស់ជាង៧០ឆ្នាំមកនេះ។ ចំណែកអនុរដ្ឋមន្ត្រីដឹកជញ្ជូនកូរ៉េខាងជើង Kim Yun-hyok ចាត់ទុកព្រឹត្តការណ៍នេះ ជាការបង្ហាញឲ្យពិភពលោកឃើញពីកម្លាំង និងឆន្ទៈដ៏ខ្លាំងក្លារបស់បងប្អូនកូរ៉េទាំងពីរដើម្បីរួបរួមគ្នាឡើងវិញ។

ការធ្វើទំនើបកម្ម និងការតភ្ជាប់នេះ ត្រូវបានឯកភាពគ្នាកាលពីជំនួបរវាងប្រធានាធិបតីកូរ៉េខាងត្បូង មូន ចេអ៊ីន និងមេដឹកនាំកូរ៉េខាងជើង គីម ជុងអ៊ុន នៅភូមិប៉ាន់មុនជុមក្នុងខែមេសា។ តមកក្នុងជំនួបម្ដងទៀតក្នុងខែកញ្ញានៅព្យុងយ៉ាង មេដឹកនាំកូរ៉េក៏ព្រមព្រៀងគ្នារៀបចំពិធីបុកគ្រឹះឲ្យបានមុនដាច់ឆ្នាំ២០១៨ តែម្ដង។ អាមេរិក និងអង្គការសហប្រជាជាតិសុទ្ធតែបានបើកភ្លើងខៀវសម្រាប់ពិធីបុកគ្រឹះនិមិត្តរូបនេះ៕