អន្តរជាតិ
អ្នកជំនាញ៖ បើបង្ខំឲ្យរើស ប្រទេសភាគច្រើននឹងជ្រើសយកអាមេរិក មិនមែនចិនឡើយ
× អ្នកនិពន្ធសៀវភៅដ៏ល្បីស្តីពីចិនលោក Fraser Howie យល់ឃើញថា បើសិនជាបណ្តាប្រទេសនានាក្នុងតំបន់ត្រូវបង្ខំឲ្យជ្រើសរើសរវាងអាមេរិក និងចិន ពួកគេភាគច្រើននឹងជ្រើសរើសយកមហាអំណាចអាមេរិកមិនខាន។ លោកលើកយកហេតុផលចម្បងថា ថ្វីជាមហាអំណាចក៏ដោយ អំណាចទន់របស់ចិននៅតែទន់ខ្សោយនៅឡើយ។
ការប្រែប្រួលក្នុងធម្មជាតិនៃទំនាក់ទំនងទ្វេភាគីរវាងអាមេរិក និងចិនធ្វើកំពុងកែប្រែស្ថានភាពសេដ្ឋកិច្ច និងនយោបាយសាកល។ ប្រទេសជាច្រើនក្នុងតំបន់បារម្ភថា នៅពេលអនាគតពួកគេនឹងត្រូវបង្ខំឲ្យជ្រើសរើសយករវាងមហាអំណាចទាំងពីរ។
ក្នុងបទសម្ភាសន៍ជាមួយទូរទស្សន៍ CNBC នៅថ្ងៃពុធទី ២៦ ខែធ្នូ ពេលចោទសួរថា តើប្រទេសភាគច្រើននឹងជ្រើសរើសយកមហាអំណាចមួយណា បើសិនជាកាលៈទេសៈខាងលើនេះកើតឡើង អ្នកវិភាគឯករាជ្យ និងជាអ្នកនិពន្ធសៀវភៅស្តីពីចិនលោក Fraser Howie ឆ្លើយឥតស្ទាក់ស្ទើរបែបនេះ៖«ប្រទេសទាំងនោះនឹងទៅជាមួយអាមេរិក»។
អ្នកជំនាញរូបនេះបានពន្យល់ថា ថ្វីដ្បិតថា មហាអំណាចចិនមានតួនាទីចម្បងក្នុងការជំរុញកំណើនសេដ្ឋកិច្ច និងធ្វើឲ្យតំបន់អាស៊ីមានបានក៏ដោយ ចិននៅមានចំណុចខ្សោយច្រើនជាពិសេសការកសាងអំណាចទន់នេះតែម្តង។ ត្រង់នេះ លោកចង់សំដៅលើការបើកចំហសេដ្ឋកិច្ចកាលពី ៤០ឆ្នាំមុនរបស់ចិនដែលជាកម្លាំងចលករយ៉ាងសំខាន់ដែលជំរុញការលូតលាស់នៃសេដ្ឋកិច្ចអាស៊ីកន្លងមក។
លោក Howie មើលឃើញថា ការលូតលាស់នៃអំណាចទន់របស់ចិនពិតជាមិនអាចប្រៀបប្រដូចបានឡើយជាមួយអំណាចទន់អាមេរិក ហើយប្រទេសភាគច្រើនភ័យបារម្ភពីការរះត្រដែតឡើងរបស់ចិនច្រើនជាងសប្បាយរីករាយ។
«រយៈពេល ៣០ឆ្នាំនៃការរីកចម្រើនលូតលាស់ អាស៊ីមានបានទៅកើតដោយសារពឹងផ្អែកសំខាន់លើចិន។ ប៉ុន្តែចិនគ្មានសមត្ថភាពចង់មិត្តជាមួយប្រទេសដទៃឡើយ។ ខ្ញុំគិតថា វាបណ្តាលមកពីភាពអន់ខ្សោយនៃអំណាចទន់របស់ចិនផ្ទាល់។ ចិនមិនអាចបង្កើតមិត្តបានច្រើន ហើយគេនាំគ្នាបារម្ភពីចិន ច្រើនជាងមានអារម្មណ៍រីករាយចង់ធ្វើជាមិត្តរបស់ចិន»។លោក Howie អធិប្បាយដូច្នេះ។
បច្ចប្បន្ននេះ អាមេរិក និងចិនកំពុងស្ថិតក្នុងសង្គ្រាមពាណិជ្ជកម្ម ហើយភាគីកំពុងចរចាគ្នាបញ្ចប់សង្គ្រាមនេះជាអចិន្ត្រៃយ៍។ ជម្លោះពាណិជ្ជកម្ម និងភាពតានតឹងក្នុងទំនាក់ទំនងទ្វេភាគីរវាងយក្សសេដ្ឋកិច្ចទាំងពីរបង្កឲ្យពិភពលោកទាំងមូលព្រួយបារម្ភខ្លាំង។ សម្រាប់រដ្ឋបាលក្រុងវ៉ាស៊ីនតោន ការលូតលាស់គួរឲ្យកត់សម្គាល់របស់ចិនដែលឈានជើងពីប្រទេសក្រីក្រមកជាមហាអំណាចសេដ្ឋកិច្ចទីពីរក្នុងពេល ៤០ឆ្នាំនេះអាចនឹងឈានទៅក្តោបក្តាប់ពិភពលោក និងផ្លាស់ប្តូរសណ្តាប់ធ្នាប់ពិភពលោកដែលខ្លួនបង្កើតឡើងក្រោយចប់សង្គ្រាមលោកលើកទីពីរដែរ៕
Tag:
ចិន
អាមេរិក
Fraser Howie
© រក្សាសិទ្ធិដោយ thmeythmey.com