ភ្នំពេញក្រោនព្រមតាមការសម្រេច FFC និងគាំទ្រចំពោះសេចក្តីព្រាងច្បាប់គ្រប់គ្រងការផ្ទេរកីឡាករ

កីឡាជាតិ

ជាតិ

ភ្នំពេញក្រោនព្រមតាមការសម្រេច FFC និងគាំទ្រចំពោះសេចក្តីព្រាងច្បាប់គ្រប់គ្រងការផ្ទេរកីឡាករ

26, Dec 2018 , 5:40 pm

រូបភាព

ដោយ:

ក្លិបបាល់ទាត់ភ្នំពេញក្រោន ប្រកាសជំហរព្រមទទួលយកតាមចំណាត់ការរបស់សហព័ន្ធកីឡាបាល់ទាត់កម្ពុជា ដែលបានចេញសម្រេចថា ក្លិបបាល់ទាត់វិសាខាព្រមសងសំណងអភិវឌ្ឍន៍ឲ្យភ្នំពេញក្រោន ដើម្បីបញ្ចប់ភាពចម្រូងចម្រាសលើរឿងផ្ទេរកីឡាករ៥រូប។ ក្លិបនេះ ក៏គាំទ្រចំពោះគម្រោងធ្វើសេចក្តីព្រាងច្បាប់ ដើម្បីគ្រប់គ្រងការផ្ទេរកីឡាករក្នុងស្រុករបស់សហព័ន្ធផងដែរ។

នៅថ្ងៃទី២៦ ខែធ្នូ ឆ្នាំ២០១៨ សហព័ន្ធកីឡាបាល់ទាត់កម្ពុជាបានចេញសេចក្តីសម្រេចថា ក្លិបបាល់ទាត់វិសាខាព្រមសងសំណងលើថ្លៃហូបចុក ស្នាក់នៅ និងបណ្តុះបណ្តាលកីឡាករ៥រូបរួមមាន ស៊ិន កក្កដា អ៊ិន សូដាវីដ អ៊ុក សុវណ្ណ គឹម ឆៃយ៉ា និង កែន ចាន់សុភ័ក្តិ ដែលទើបផ្ទេរទៅក្លិបវិសាខា ដល់ភ្នំពេញក្រោន។ ភ្លាមៗនោះ ក្លិបភ្នំពេញក្រោនបានចេញសេចក្តីសម្រេច ដោយព្រមទទួលយកតាមចំណាត់ការរបស់សហព័ន្ធ។

«ក្នុងស្មារតីនៃមហាគ្រួសារបាល់ទាត់កម្ពុជា ក្លិបបាល់ទាត់ភ្នំពេញក្រោន ព្រមទទួលយកដំណោះស្រាយដូចសេចក្តីសម្រេចរបស់សហព័ន្ធកីឡាបាល់ទាត់កម្ពុជា ដោយក្លិបបាល់ទាត់ភ្នំពេញក្រោនយល់ព្រមទទួលយកប្រាក់ឧបត្ថម្ភពីក្លិបបាល់ទាត់វិសាខា ជាថ្លៃហូបចុក ស្នាក់នៅ និងបណ្តុះបណ្តាលកីឡាករ៥នាក់»។ នេះជាខ្លឹមសារក្នុងសេចក្តីសម្រេចរបស់ក្លិបភ្នំពេញក្រោន ដែលបានចាត់ទុកចំណាត់ការរបស់សហព័ន្ធ ស្របតាមជំហររបស់ខ្លួន ដែលបានទាមទារកាលពីថ្ងៃទី១៧ ខែធ្នូ ឆ្នាំ២០១៨ កន្លងទៅ។

ទន្ទឹមនឹងនេះក្លិបបាល់ទាត់ភ្នំពេញក្រោន គាំទ្រចំពោះជំហររបស់សហព័ន្ធ ដែលគ្រោងដាក់ឆ្លងពង្រាងច្បាប់ស្តីពីការគ្រប់គ្រងការផ្ទេរកីឡាករ ដែលជាភាពចន្លោះប្រហោងរបស់ខ្លួន ក្នុងមហាសន្និបាតរបស់សហព័ន្ធនៅដើមឆ្នាំ២០១៩។ ព្រោះក្លិបនេះយល់ថា ច្បាប់នេះនឹងជួយការពារកុំឲ្យមានរឿងវិវាទដូចពួកគេបានជួបនៅពេលនេះ។

ក្នុងសេចក្តីសម្រេចខាងលើបានបន្ថែមថា៖«យន្តការគតិយុត្តិនេះ នឹងធានានូវដំណើរអភិវឌ្ឍន៍នៃវិស័យបាល់ទាត់កម្ពុជា ពិសេសលើកទឹកចិត្តដល់បណ្តាក្លិបបាល់ទាត់នានាឲ្យចូលរួមយ៉ាងផុសផុលក្នុងការបណ្តុះបណ្តាលធនធានកីឡាករជំនាន់ក្រោយឱ្យបានកាន់តែច្រើនថែមទៀត ព្រមទាំងដើម្បីបញ្ចៀសនូវបញ្ហាណាមួយជាយថាហេតុនាពេលអនាគតពាក់ព័ន្ធនឹងការផ្ទេរកីឡាករក្នុងស្រុកដែលអាចនឹងត្រូវធ្វើឡើងដោយគ្មានតម្លាភាព ឬតាមរយៈរូបភាពអវិជ្ជមានណាមួយនោះ»។

ជាមួយគ្នានេះ ក្លិបបាល់ទាត់ភ្នំពេញក្រោនអរគុណដល់មហាជន អ្នកគាំទ្រ និងអ្នកសារព័ត៌មានចំពោះការយកចិត្តទុកដាក់លើករណីនេះ ដែលបង្ហាញឲ្យឃើញពីការគាំទ្រដ៏ខ្លាំងក្លាចំពោះវិស័យកីឡាបាល់ទាត់កម្ពុជា។ ជាការតមស្នងក្លិបនេះប្តេជ្ញាថា នឹងខិតខំប្រឹងប្រែងទ្វេដងក្នុងការអភិវឌ្ឍវិស័យកីឡាបាល់ទាត់ ពិសេសពង្រឹងសមត្ថភាពធនធានថ្នាល៕