ច្បាប់បង្កើនអាសនៈក្រុមប្រឹក្សា ត្រូវបានរដ្ឋសភា អនុម័ត

ជាតិ

នយោបាយជាតិ

ច្បាប់បង្កើនអាសនៈក្រុមប្រឹក្សា ត្រូវបានរដ្ឋសភា អនុម័ត

03, Jan 2019 , 2:12 pm

រូបភាព

រូបពីរដ្ឋសភា

ដោយ: ថ្មីៗ

ក្នុងកិច្ចប្រជុំពេញអង្គនាព្រឹកថ្ងៃទី៣ ខែមករា ឆ្នាំ២០១៩នេះ រដ្ឋសភា បានអនុម័តសេចក្តីស្នើសុំធ្វើវិសោធនកម្មច្បាប់ ដើម្បីបន្ថែមអាសនៈសម្រាប់ក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលហៅជាទូទៅថា ក្រុមប្រឹក្សា។

ក្រោយបញ្ចប់កិច្ចប្រជុំ លោក ឡេង ប៉េងឡុង អ្នននាំពាក្យរដ្ឋសភា ប្រាប់សារព័ត៌មានថ្មីៗ តាមទូរសព្ទ យ៉ាងដូច្នេះថា៖«[ការបង្កើនអាសនៈនេះ] ដើម្បីជំរុញការអនុវត្តវិមជ្ឈការ គឺការផ្ទេរអំណាចទៅថ្នាក់ក្រោមជាតិ ឲ្យកាន់តែមានប្រសិទ្ធភាព។ គោលបំណង គឺដើម្បីពង្រឹងលទ្ធិប្រជាធិបតេយ្យ»។

យ៉ាងណាក៏ដោយ អ្នកនាំពាក្យរដ្ឋសភារូបនេះ ពុំអាចបញ្ជាក់បានឡើយថា អាសនៈថ្មី នឹងត្រូវបន្ថែមប៉ុន្មាននៅក្រុមប្រឹក្សា។

ការកំណត់អាសនៈនេះ គឺជាដែនសមត្ថកិច្ចរបស់ប្រមុខរដ្ឋាភិបាល។ អាសនៈក្រុមប្រឹក្សាអាណត្តិទី២ មាន៤៣០។

រដ្ឋសភា បានប្រជុំនិងឈានដល់ការអនុម័តការកែប្រែច្បាប់ខាងលើ គឺបន្ទាប់ពីការប្រកាសរបស់ប្រមុខរដ្ឋាភិបាល ដែលថា អាសនៈរបស់ក្រុមប្រឹក្សា នឹងត្រូវបន្ថែម សម្រាប់ការបោះឆ្នោតអាណត្តិទី៣ ដែលនឹងប្រព្រឹត្តទៅ នៅថ្ងៃទី២៦ ខែឧសភា ឆ្នាំ២០១៩។ សំណើសុំធ្វើវិសោធនកម្មនេះ នឹងត្រូវបញ្ជូនទៅព្រឹទ្ធសភា ដើម្បីពិនិត្យបន្ត។

គេ សង្កេតឃើញថា អាសនៈគ្រប់លំដាប់ថ្នាក់ ត្រូវបានបន្ថែមចំនួនជាហូរហែ។ អាសនៈព្រឹទ្ធសភា ដែលមាន៦១ ក្នុងនីតិកាលទី៣ បានកើនដល់៦២ ក្នុងនីតិកាលទី៤។

ចំណែក អាសនៈរដ្ឋសភា ដែលមាន១២៣ ក្នុងនីតិកាលទី៥ ត្រូវបន្ថែមដល់១២៥ ក្នុង នីតិកាលទី៦។ រីឯ អាសនៈក្រុមប្រឹក្សាឃុំ-សង្កាត់ ក្នុងអាណត្តិទី៣ មាន១១,៤៥៩ ហើយក្នុងអាណត្តិទី៤ មាន១១,៥៧២ ដោយកើនឡើង១១៣បន្ថែមទៀត៕

អត្ថបទទាក់ទង

បោះឆ្នោត៖ អាសនៈគ្រប់ជាន់ថ្នាក់ កើនចំនួនជាបន្តបន្ទាប់