អន្តរជាតិ
ប្រមុខការទូតអាមេរិក ទៅមជ្ឈិមបូព៌ាដើម្បីរកផ្លូវដាក់សម្ពាធអ៊ីរ៉ង់កាន់តែខ្លាំង
× រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី៨ ខែមករា បានទៅដល់ហ្ស៊កដានីក្នុងដំណើរទស្សនកិច្ចរយៈពេលវែងនៅមជ្ឈិមបូព៌ា និងតំបន់ឈូងសមុទ្រដែលកំពុងតែរំជើបរំជួលដោយសារការប្រកាសដកទ័ពអាមេរិកពីស៊ីរី។ លោក ប៉ុមប៉េអូ ប្រាប់សម្ព័ន្ធមិត្តរបស់ខ្លួនក្នុងតំបន់កុំបារម្ភរឿងដកទ័ពនេះ និងបានស្នើឲ្យពួកគេចូលរួមដាក់សម្ពាធលើអ៊ីរ៉ង់កាន់តែខ្លាំងថែមទៀត និងបន្តយុទ្ធនាការប្រយុទ្ធប្រឆាំងក្រុមជ្រុលនិយមផង។
ទៅដល់ហ្ស៊កដានីនៅថ្ងៃទី៨ ខែមករា ប្រមុខការទូតអាមេរិក ម៉ៃ ប៉ុមប៉េអូ បានឆ្លៀតនិយាយការពារការសម្រេចចិត្តដកទ័ពពីស៊ីរីរបស់ប្រធានាធិបតី ដូណាល់ ត្រាំ ។ សម្ព័ន្ធមិត្តអាមេរិកនៅមជ្ឈិមបូព៌ា ជ្រួលច្របល់ខ្លាំងចំពោះរឿងនេះ ខណៈលោក ត្រាំ មិននិយាយឲ្យច្បាស់ពីគម្រោងនេះឡើយ ប៉ុន្តែសម្រាប់លោក ប៉ុមប៉េអូ អ្វីដែលប្រាកដប្រជានោះ គឺគោលនយោបាយរបស់អាមេរិកប្រឆាំងឥទ្ធិពលអ៊ីរ៉ង់ ទោះជាមានផែនការដកទ័ពនេះក៏ដោយចុះ។
ក្នុងសន្និសីទសារព័ត៌មានក្នុងទីក្រុងអាម៉ាន់ លោក ប៉ុមប៉េអូ ចាត់ទុកវត្តមានក្រុមជ្រុលនិយមរដ្ឋឥស្លាម និងបដិវត្តន៍អ៊ីរ៉ង់ ជាការគំរាមកំហែងដ៏ធំសម្រាប់តំបន់នេះ ហើយការចូលរួមពីសម្ព័ន្ធមិត្តអាមេរិកក្នុងការទប់ទល់អ៊ីរ៉ង់ គឺជារឿងសំខាន់។ បើតាមទីភ្នាក់ងារព័ត៌មាន AFP រដ្ឋមន្ត្រីការបរទេសអាមេរិករូបនេះអះអាងថា ការប្រឆាំងបដិវត្តន៍អ៊ីរ៉ង់ ជាការងាររួមដែលនៅតែមានប្រសិទ្ធភាពរហូតមិនអតីតកាល បច្ចុប្បន្ន ឬអនាគតឡើយ។
ចំពោះមុខសមភាគីហ្ស៊កដានី Ayman Safadi មន្ត្រីជាន់ខ្ពស់រដ្ឋបាលលោក ត្រាំ រូបនេះបញ្ជាក់ថា នៅប៉ុន្មានថ្ងៃ និងសប្ដាហ៍ខាងមុខទៀតនេះ អាមេរិកនឹងបង្កើនទ្វេដងនូវការប្រឹងប្រែងផ្នែការទូត និងសេដ្ឋកិច្ចដើម្បីសម្ពាធលើអ៊ីរ៉ង់ សំដៅសម្រេចឲ្យបានគោលដៅដែលដាក់ចេញកាលពីឆ្នាំ២០១៨ គឺការដាក់ទណ្ឌកម្មមិនធ្លាប់មានអ៊ីរ៉ង់ ដែលមិនព្រមបោះបង់កម្មវិធីមីស៊ីលបាលីស្ទិក។ តមក អាមេរិកក៏បិទការនាំចេញប្រេងរបស់អ៊ីរ៉ង់ និងហាមប្រទេសផ្សេងរកស៊ីជាមួយអ៊ីរ៉ង់។
អំឡុងដំណើរទស្សនកិច្ចពេលវែងនេះ លោក ប៉ុមប៉េអូ នឹងទៅកាន់ប្រទេសសម្ព័ន្ធមិត្តអាមេរិកផ្សេងទៀតដូចជាអេហ្ស៊ីប បារ៉ែន អេមីរ៉ាតអារ៉ាប់រួម អូម៉ង់ ហើយទំនងជាអ៊ីរ៉ាក់ផង។ លោក នឹងប្រើទស្សនកិច្ចនេះដើម្បីផ្ដល់ការធានារបស់អាមេរិកទៅកាន់ប្រទេសអារ៉ាប់ ដែលកំពុងតែជ្រួលច្រាលដោយសារការដកទ័ពពីស៊ីរី។ ព្រោះតែរឿងនេះ អាមេរិក កំពុងមើលមុខគ្នាមិនចំជាមួយតួកគី ដ្បិតអាមេរិកចង់ការពារជីវពលឃើដដែលជួយប្រយុទ្ធក្រុមរដ្ឋឥស្លាម តែតួកគីចង់កម្ទេចក្រុមនេះ។
តួកគី ចាត់ទុកក្រុមឃើដស៊ីរីជាដៃជើងបក្សពលករឃើដនៅតួកគី ហើយដែលតួកគីចាត់ទុកជាក្រុមភេរវករ ព្រោះក្រុមនេះបានអុកឡុកតាំងពីទសវត្សរ៍១៩៨០ មក។ យ៉ាងណាមិញ ក្រុងវ៉ាស៊ីនតោនចាត់ទុកក្រុមឃើដស៊ីរី ជាដៃគូដ៏សំខាន់ក្នុងយុទ្ធនាការបោសសម្អាតក្រុមរដ្ឋឥស្លាមដែលនៅសេសសល់ ដែលជំហរនេះផ្ទុយទាំងស្រុងនឹងជំហររបស់ក្រុងអង់ការ៉ា ដែលបារម្ភថា ឃើដស៊ីរីនឹងក្លាយជាការគំរាមកំហែងដល់សន្តិសុខខ្លួន៕
Tag:
អាមេរិក
អ៊ីរ៉ង់
មជ្ឈិមបូព៌ា
ម៉ៃ ប៉ុមប៉េអូ
© រក្សាសិទ្ធិដោយ thmeythmey.com