លោក គីម ត្រឡប់ទៅកូរ៉េខាងជើងវិញ ក្រោយបញ្ចប់ទស្សនកិច្ចនៅប៉េកាំង

អន្តរជាតិ

លោក គីម ត្រឡប់ទៅកូរ៉េខាងជើងវិញ ក្រោយបញ្ចប់ទស្សនកិច្ចនៅប៉េកាំង

09, Jan 2019 , 5:15 pm

រូបភាព

រថភ្លើងពិសេសរបស់លោក គីម ជុងអ៊ុន ចាកចេញពីស្ថានីយ៍រថភ្លើងក្រុងប៉េកាំង (រូបភាព AFP)

ដោយ: តន ចាន់រិទ្ធារ៉ា

មេដឹកនាំកូរ៉េខាងជើង គីម ជុងអ៊ុន នៅថ្ងៃទី៩ ខែមករា បានធ្វើដំណើរតាមរយៈរថភ្លើងចាកចេញពីរដ្ឋធានីប៉េកាំង ឆ្ពោះទៅកាន់ព្យុងយ៉ាងវិញ បន្ទាប់ពីបញ្ចប់ទស្សនកិច្ចនៅទឹកដីតាមការអញ្ជើញរបស់ប្រធានាធិបតីចិន ស៊ី ជិនភីង ។ គ្មានឡើយព័ត៌មានលម្អិតជុំវិញដំណើរទស្សនកិច្ចសម្ងាត់មួយនេះ និងជំនួបរវាងលោក ស៊ី និងលោក គីម ។ ប៉ុន្តែអ្វីដែលច្បាស់ គឺវាជំនួបយុទ្ធសាស្ត្រមួយមុនគម្រោងនៃការជួបគ្នារវាងលោក គីម និងប្រធានាធិបតីអាមេរិក ដូណាល់ ត្រាំ ។

រថភ្លើងពិសេសដឹកប្រមុខដឹកនាំកូរ៉េខាងជើង គីម ជុងអ៊ុន និងប្រតិភូកូរ៉េខាងជើង បានចាកចេញពីស្ថានីយ៍រថភ្លើងប៉េកាំងនៅរសៀលថ្ងៃទី៩ ខែមករា ។ លោក គីម ដែលអមដំណើរដោយភរិយា រី សុលជូ និងមន្ត្រីជាន់ខ្ពស់ជាច្រើទៀត បានទៅដល់ប៉េកាំងនៅថ្ងៃទី៨ ខែមករា ក្រោយធ្វើដំណើរស្ទើរមួយថ្ងៃក្នុងដំណើរទស្សកិច្ចលើកទី៤ ទៅកាន់ចិន ហើយបានជួបចរចាជាមួយលោកប្រធានាធិបតី ស៊ី ជិនភីង ដែលជាអ្នកអញ្ជើញលោក។

ដូចទស្សនកិច្ចបីលើកមុនដែរ ទស្សនកិច្ចនៅទឹកដីចិនរបស់លោក គីម ធ្វើឡើងដោយមិនប្រកាសមុនឡើយ។ សម្រាប់លើកទី៤ នេះ ក្រៅពីព័ត៌មានផ្សាយដោយសារព័ត៌មានរដ្ឋចិន និងកូរ៉េខាងជើងស្ដីពីវត្តមានលោក គីម នៅប៉េកាំង ព័ត៌មានដទៃទៀតនៃដំណើរទស្សនកិច្ចនេះ មិនត្រូវបានបញ្ចេញឡើយ។ ប៉ុន្តែជាធម្មតានោះ ព័ត៌មានពិស្ដារ នឹងត្រូវផ្សាយដោយប្រព័ន្ធផ្សព្វផ្សាយប្រទេសទាំងពីរក្រោយដំណើរទស្សនកិច្ចត្រូវបានបញ្ចប់។

បើតាមទីភ្នាក់ងារព័ត៌មាន Yonhap ជំនួបលោក ស៊ី និងលោក គីម ចំណាយពេលមួយម៉ោង ហើយមេដឹកនាំទាំងពីរ និងភរិយារៀងៗខ្លួនក៏ចូលរួមក្នុងពិធីលាងសាយភោជន៍នៅឯវិមានប្រជាជនផង។ ចំណែកឯប្រធានបទនៃជំនួបវិញ ត្រូវបានប្រព័ន្ធផ្សព្វផ្សាយកូរ៉េខាងត្បូងដដែលផ្សាយថា ផ្ដោតលើគម្រោងជួបគ្នារវាងលោក គីម និងប្រធានាធិបតីអាមេរិក ដូណាល់ ត្រាំ ។

ដោយឡែកមុនចាកចេញទៅកាន់មាតុភូមិវិញ មេដឹកនាំកូរ៉េខាងជើង ក៏ឆ្លៀតទៅទស្សនារោងចក្រឱសថមួយកន្លែងក្នុងរដ្ឋធានីប៉េកាំងដែលមានប្រវត្តិជិត៣០០ឆ្នាំមកហើយ។ ក្រុមមន្ត្រីចិនទំនងជាចង់បង្ហាញពីសក្ដានុពលរបស់ខ្លួនទៅកាន់លោក គីម ដែលកំពុងអនុវត្តនយោបាយជំរុញសេដ្ឋកិច្ចដែរ។ ប្រព័ន្ធសេដ្ឋកិច្ចរបស់ចិនដែលបើកចំហតែប្រកាន់ខ្ជាប់ប្រព័ន្ធនយោបាយកុម្មុយនីស្ត អាចជាគំរូមួយសម្រាប់កូរ៉េខាងជើង។

ក្រោយសម្រេចគោលដៅអភិវឌ្ឍនុយក្លេអ៊ែរហើយនោះ មេដឹកនាំជំនាន់ទីបីកូរ៉េខាងជើង បានយកការអភិវឌ្ឍសេដ្ឋកិច្ចជាគោលដៅបន្ទាប់។ កាលពីឆ្នាំមុន លោកមិនបានចុះត្រួតពិនិត្យទីតាំងយោធាណាមួយឡើយ តែបានទៅពិនិត្យកសិដ្ឋាន ចម្ការដំណាំ និងការដ្ឋានសាងសង់ធំដុំក្នុងន័យជំរុញការវិនិយោគ។ ការចរចាជាមួយអាមេរិក មានផ្នែកក៏ជាលទ្ធផលនៃការបង្វែរទិសដៅទៅរកសេដ្ឋកិច្ចដែរ ប៉ុន្តែទណ្ឌកម្មរាប់សិនជាន់របស់អន្តរជាតិ ជារបាំងដ៏ធំសម្រាប់កូរ៉េខាងជើង៕