លោកគីម ប្រាប់លោកស៊ី ថា កូរ៉េខាងជើងនៅតែចង់រំសាយនុយក្លេអ៊ែរ និងត្រៀមជួបលោក ត្រាំ

អន្តរជាតិ

លោកគីម ប្រាប់លោកស៊ី ថា កូរ៉េខាងជើងនៅតែចង់រំសាយនុយក្លេអ៊ែរ និងត្រៀមជួបលោក ត្រាំ

10, Jan 2019 , 12:11 pm

រូបភាព

លោក ស៊ី ជិនភីង និងលោក គីម ជុងអ៊ុន ដើរត្រួតពលក្នុងវិមានប្រជាជនចិន។ (រូបភាព Xinhua)

ដោយ: តន ចាន់រិទ្ធារ៉ា

មេដឹកនាំកូរ៉េខាងជើង គីម ជុងអ៊ុន បានប្រកាសចំពោះមុខប្រធានាធិបតីចិន ស៊ី ជិនភីង ថា កូរ៉េខាងជើងនៅតែបន្តការប្ដេជ្ញាចិត្តក្នុងការរំសាយនុយក្លេអ៊ែរដដែល។ នាជំនួបនៅទីក្រុងប៉េកាំងថ្ងៃទី៨ ខែមករា លោក គីម ក៏ប្រាប់លោក ស៊ី ថា កូរ៉េខាងជើងនឹងប្រឹងប្រែងដើម្បីរៀបចំជំនួបមេដឹកនាំកូរ៉េខាងជើង-អាមេរិកលើកទី២ ឲ្យមានលទ្ធផលល្អសម្រាប់ពិភពលោកទាំងមូល។ ប៉ុន្តែមេដឹកនាំទាំងពីរក៏ឯកភាពដែរថា ការទាមទារកន្លងមករបស់កូរ៉េខាងជើង ត្រូវតែដោះស្រាយឲ្យបាន។

ប្រព័ន្ធផ្សព្វផ្សាយរដ្ឋចិន នៅថ្ងៃទី១០ ខែមករា បានផ្សាយពីព័ត៌មានលម្អិតទាក់ទងដំណើរទស្សនកិច្ចសម្ងាត់របស់ប្រមុខដឹកនាំកូរ៉េខាងជើង គីម ជុងអ៊ុន នៅរដ្ឋធានីប៉េកាំង ដែលទើបតែបញ្ចប់។ លោក គីម បានជួបចរចាទ្វេភាគីជាមួយប្រធានាធិបតីចិន ស៊ី ជិនភីង លើទំនាក់ទំនងទ្វេភាគី បញ្ហាតំបន់ និងពិភពលោក ខណៈការរំសាយនុយក្លេអ៊ែរក៏ត្រូវបានជជែកដែរ។ មេដឹកនាំទាំងពីរក៏ប្រាប់គ្នាទៅមកពីស្ថានការណ៍ប្រទេសរៀងៗខ្លួនដែរ។

ទីភ្នាក់ងារព័ត៌មានចិន Xinhua ផ្សាយថា លោក គីម និងលោក ស៊ី បានឯកភាពគ្នាជំរុញការអភិវឌ្ឍទំនាក់ទំនងទ្វេភាគីក្នុងសករាជថ្មី បន្តដោះស្រាយបញ្ហានៅឧបទ្វីបកូរ៉េតាមផ្លូវនយោបាយ សំដៅនាំយកប្រយោជន៍ដល់ប្រជាជនប្រទេសទាំងពីរ។ មេដឹកនាំកូរ៉េខាងជើង ដែលទៅទឹកដីចិនបួនដងក្នុងពេលមិនដល់មួយឆ្នាំ ក៏បានសរសើរវឌ្ឍនភាពរបស់ចិន និងចាត់ទុកការរីកចម្រើនរបស់ចិនជាគំរូសម្រាប់ដកស្រងបទពិសោធផង។

កូរ៉េខាងជើងនៅតែចង់រំសាយនុយក្លេអ៊ែរ, ចិនគាំទ្រជម្រើសរបស់កូរ៉េខាងជើង

បញ្ហានុយក្លេអ៊ែរកូរ៉េខាងជើង ត្រូវបានលើកឡើងក្នុងជំនួបលើកទីបួនរវាងមេដឹកនាំកូរ៉េខាងជើង និងចិន ដោយលោក គីម អះអាងចំពោះមុខលោក ស៊ី ថា កូរ៉េខាងជើងបន្តប្រកាន់ខ្ជាប់ជំហររំសាយនុយក្លេអ៊ែររបស់ខ្លួនដដែល និងដោះស្រាយបញ្ហាឧបទ្វីបកូរ៉េដោយសន្តិវិធី និងការចរចា។ ប៉ុន្តែលោក គីម ចង់ឲ្យភាគីពាក់ព័ន្ធទាំងអស់ ពិចារណាការទាមទាររបស់កូរ៉េខាងជើងដូចគ្នា និងឆ្លើយតបឲ្យបានសមរម្យដើម្បីជំរុញការដោះស្រាយបញ្ហាឲ្យគ្រប់ជ្រុងជ្រោយ។

ចំណែកលោក ស៊ី វិញ ក៏ប្រកាសគាំទ្រទិសដៅរបស់កូរ៉េខាងជើងក្នុងការលុបបំបាត់នុយក្លេអ៊ែរ ទំនាក់ទំនងអន្តរកូរ៉េ ក៏ដូចជាជំនួបមេដឹកនាំអាមេរិក-កូរ៉េខាងជើងផងដែរ។ បើតាមលោកប្រធានាធិបតីចិន ចិនក៏គាំទ្រដែរការដោះស្រាយបញ្ហារបស់ភាគីពាក់ព័ន្ធទាំងអស់តាមរយៈការចរចា ហើយត្រៀមខ្លួនជាស្រេចដើម្បីធ្វើការជាមួយភាគីផ្សេងទៀត ក្នុងការដើរតួនាទីវិជ្ជមានរបស់ខ្លួន សំដៅរក្សាសន្តិភាព ស្ថិរភាព និងធ្វើយ៉ាងឲ្យការរំសាយនុយក្លេអ៊ែរក្លាយជាការពិត។

ក្នុងដំណើរការចរចាដើម្បីលុបបំបាត់នុយក្លេអ៊ែរវិញ មេដឹកនាំចិនក៏សង្ឃឹមថា កូរ៉េខាងជើង និងអាមេរិក អាចធ្វើសម្បទានឲ្យគ្នាទៅវិញទៅមកដែរ ហើយតម្រូវការរបស់កូរ៉េខាងជើង នឹងត្រូវដោះស្រាយដែរ។ លោក ស៊ី ទំនងចង់ឲ្យអាមេរិកផ្ដល់ការលើកទឹកចិត្តចំពោះកូរ៉េខាងជើង ដែលមកទល់ពេលនេះបានធ្វើសកម្មភាពមួយចំនួនហើយដូចជាការបិទទីតាំងសាកល្បងនុយក្លេអ៊ែរ បិទមជ្ឈមណ្ឌលបាញ់មីស៊ីល ដោះលែងជនជាតិអាមេរិក និងមិនធ្វើសកម្មភាពយោធាធំដុំណាមួយនោះ។

ជួបលោក ត្រាំ ដើម្បីសម្រេចឲ្យបានលទ្ធផលពិភពលោកចង់បាន

អំឡុងពេលស្នាក់នៅទីក្រុងប៉េកាំងពីរថ្ងៃ មេដឹកនាំវ័យក្មេងកូរ៉េខាងជើងក៏ប្រាប់ប្រធានាធិបតីចិនដែរថា កូរ៉េខាងជើង ប្រឹងប្រែងដើម្បីឲ្យជំនួបជាមួយមេដឹកនាំអាមេរិកលើកទីពីរ ទទួលបានផ្លែផ្កាដែលសហគមន៍អន្តរជាតិស្វាគមន៍។ លោក គីម អះអាងទៀតថា មកទល់ពេលនេះ គ្មានអ្វីប្រែប្រួលឡើយនៅកូរ៉េខាងជើងក្នុងការអនុវត្តតាមកិច្ចព្រមព្រៀងដែលសម្រេចបានក្នុងជំនួបលើកទីមួយ ខែមិថុនា ឆ្នាំ២០១៨ នៅសិង្ហបុរី។

គម្រោងនៃជំនួបលើកទីពីរនេះ កំពុងស្ថិតក្នុងដំណាក់កាលស្វែងរកទីតាំងនៅឡើយ ដោយមន្ត្រីអាមេរិកកំពុងពិចារណាទីតាំងចំនួនមាន រាជធានីបាងកក រដ្ឋធានីហាណូយ និងកោះហាវ៉ៃ ប៉ុន្តែមិនទាន់យកជម្រើសនេះទៅជជែកជាមួយកូរ៉េខាងជើងនៅឡើយទេ។ ការសម្រេចចិត្តទាំងឡាយទាក់ទងទីតាំង កាលបរិច្ឆេទជំនួប និងបញ្ហាផ្សេងៗ អាចត្រូវជជែកក្នុងកម្រិតមន្ត្រីក្រុមការងារ។ យ៉ាងណាក្ដី ភាគីទាំងពីរមិនទាន់បានជួបគ្នាទេ។