អន្តរជាតិ
កាសែតជប៉ុន៖ លោកត្រាំ ចង់ជួបលោក គីម ក្នុងពាក់កណ្ដាលខែកុម្ភៈនៅវៀតណាម
× កាសែតជប៉ុន Yomiuri Shimbun នៅថ្ងៃទី១៣ ខែកុម្ភៈ ផ្សាយថា ប្រធានាធិបតីអាមេរិក ដូណាល់ ត្រាំ ស្នើរៀបចំជំនួបលើកទី២ ជាមួយមេដឹកនាំកូរ៉េខាងជើង គីម ជុងអ៊ុន នៅពាក់កណ្ដាលខែកុម្ភៈខាងមុខ។ លោក ត្រាំ ចង់ឲ្យវៀតណាមធ្វើជាម្ចាស់ផ្ទះជំនួបនេះផង។ កាសែតដដែលបន្តថា ការសម្រេចចិត្តលើទីតាំង និងពេលវេលានេះ កំពុងស្ថិតក្នុងការពិនិត្យរបស់កូរ៉េខាងជើងនៅឡើយ។
លើកទី១ ជួបនៅសិង្ហបុរី។ លើកទី២ នៅវៀតណាម? ប្រទេសតំបន់អាស៊ីអាគ្នេយ៍វៀតណាម កំពុងនាំមុខគេក្នុងចំណោមប្រទេសនានាដែលអាចធ្វើម្ចាស់ផ្ទះជំនួបលើកទី២ រវាងប្រធានាធិបតីអាមេរិក ដូណាល់ ត្រាំ និងប្រមុខដឹកនាំកូរ៉េខាងជើង គីម ជុងអ៊ុន ។ នេះក៏ព្រោះតែកាសែតជប៉ុន Yomiuri Shimbun បានស្រង់ប្រភពពីមន្ត្រីដែលពាក់ព័ន្ធការងារនេះ ថា លោក ត្រាំ ចង់ជួបលោក គីម នៅវៀតណាម។
យ៉ាងណាមិញ បើតាមកាសែត Yomiuri Shimbun កូរ៉េខាងជើងមិនទាន់ឆ្លើយតបសំណើរបស់អាមេរិកនៅឡើយទេ។ សន្តិសុខ ទីតាំងជំនួប និងការធ្វើដំណើរជាដើម សុទ្ធតែជាកត្តាបូកផ្សំដើម្បីពិចារណាក្នុងការរៀបចំជំនួបដ៏ធំនេះ។ មិនតែប្រតិភូអាមេរិក និងកូរ៉េខាងជើង ប្រទេសម្ចាស់ផ្ទះក៏ត្រូវទទួលអ្នកសារព័ត៌មានរាប់ពាន់នាក់ ដែលតាមប្រមាញ់ព្រឹត្តិការណ៍ដ៏ធំនេះផងដែរ។ ដូចនេះវាមិនមែនជារឿងងាយស្រួលឡើយសម្រាប់រដ្ឋដែលចេញរៀបចំនោះ។
ការផ្សាយរបស់ប្រព័ន្ធផ្សព្វផ្សាយជប៉ុននេះ ធ្វើឡើងក្រោយការលេចឮថា មេដឹកនាំទាំងពីរ នឹងជួបគ្នាឆាប់ៗនេះ ដើម្បីចាប់ផ្ដើមដំណើរការរំសាយនុយក្លេអ៊ែរឡើងវិញ។ កាលពីជំនួបលើកទី១ នៅសិង្ហបុរី លោក ត្រាំ និងលោក គីម បានឯកភាពគ្នាលុបបំបាត់នុយក្លេអ៊ែរទាំងស្រុង ប៉ុន្តែមិននិយាយឲ្យច្បាស់ពីមធ្យោបាយ និងរយៈពេលនៃដំណើការឡើយ។ បញ្ហាក៏កើតឡើងតមក ដ្បិតភាគីទាំងប្រកាន់ជំហរខុសគ្នាលើបញ្ហានេះ។
ខុសគ្នាត្រង់ថា ត្រូវធ្វើដូចម្ដេចក្នុងការរំសាយនុយក្លេអ៊ែរតាមការឯកភាពកាលពីជំនួបនៅសិង្ហបុរី ដែលោក គីម សន្យាបោះបង់នុយក្លេអ៊ែរ ជាថ្នូរការធានាសន្តិសុខកូរ៉េខាងជើងនោះ។ ដំណើរការនេះកាន់តែយឺតយ៉ាវខ្លាំងនៅពេលក្រុងព្យុងយ៉ាងចង់បានការលើកលែងទណ្ឌកម្មចំពោះអ្វីដែលខ្លួនបានធ្វើកន្លងមក ប៉ុន្តែក្រុងវ៉ាស៊ីតោនហាក់មានជំហរតឹងរ៉ឹងលើបញ្ហានេះ និងចង់ឲ្យកូរ៉េខាងជើងលុបបំបាត់នុយក្លេអ៊ែរទាំងមូលសិន។
គេរំពឹងថា ជំនួបលើកទី២ នេះ អាចមានលទ្ធផលល្អជាងជំនួបលើកទី១ ហើយភាគីទាំងពីរអាចនិយាយគ្នាឲ្យបានច្បាស់ពីវិធីសាស្ត្ររំសាយនុយក្លេអ៊ែរ និងចំណាត់ការពាក់ព័ន្ធផ្សេងទៀត សំដៅពន្លឿនដំណើរលុបបំបាត់អាវុធគ្រោះថ្នាក់នេះ និងការបង្កើតសន្តិភាពអចិន្ត្រៃយ៍ផង៕
Tag:
អាមេរិក
ដូណាល់ ត្រាំ
គីម ជុងអ៊ុន
វៀតណាម
© រក្សាសិទ្ធិដោយ thmeythmey.com