អន្តរជាតិ
នាយករដ្ឋមន្រ្តីម៉ាឡេស៊ី មហាធៀ មហាម៉ាត់ ចាប់ដៃអធិការបតីអូទ្រីស សេបាស្ទៀន ឃើស (រូបភាព Bernama)
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី២១ ខែមករា បានជួបជាមួយអធិការបតីអូទ្រីស សេបាស្ទៀន ឃើស (Sebastian Kurz) ។ ការចាប់ដៃគ្នានេះ បានបង្កើតជាប្រវត្តិសាស្ត្រមួយ គឺមេដឹកនាំចាស់ជាងគេលើពិភពលោក ជួបជាមួយមេដឹកនាំក្មេងជាងគេលើពិភពលោក។ លោក មហាធៀ បានប្រកាសស្វាគមន៍ទុនវិនិយោគអូទ្រីសនៅម៉ាឡេស៊ី។ 
ក្នុងវ័យ៩៣ឆ្នាំ លោកនាយករដ្ឋមន្ត្រី មហាធៀ មហាម៉ាត់ គឺជាប្រមុខរដ្ឋាភិបាលចាស់ជាងគេលើពិភពលោក ឯលោក សេបាស្ទៀន ឃើស ក៏ជាប្រមុខរដ្ឋាភិបាលក្មេងជាងគេរបស់ពិភពលោកក្នុងវ័យ៣២ឆ្នាំ។ លោក មហាធៀ ជួបលោក ឃើស នៅឯទីក្រុងវីយែននៅថ្ងៃទី២១ ខែមករា អំឡុងពេលទស្សនកិច្ចការងារបីថ្ងៃនៅអូទ្រីស។ នេះក៏ជាទស្សនកិច្ចលើកដំបូងរបស់មេដឹកនាំម៉ាឡេស៊ីរូបនេះនៅអូទ្រីសតាំងពីឆ្នាំ១៩៨៥ មក។
លោក មហាធៀ ធ្លាប់កាន់តំណែងនាយករដ្ឋមន្ត្រី២២ឆ្នាំម្ដងហើយចន្លោះឆ្នាំ១៩៨១ ដល់ឆ្នាំ២០០៣ និងទើបកាន់តំណែងនេះម្ដងទៀតនៅឆ្នាំ២០១៨ មក។ ឯលោក ឃើស វិញ ធ្លាប់ជារដ្ឋមន្ត្រីការបរទេសវ័យក្មេងចាប់ពីឆ្នាំ២០១៣ ដល់ឆ្នាំ២០១៧ មុននឹងក្លាយជាអធិការបតីអូទ្រីសចាប់ពីឆ្នាំ២០១៧ ។
បើតាមសារព័ត៌មានម៉ាឡេស៊ី Bernama មេដឹកនាំទាំងពីរបានជជែកគ្នាលើការពង្រឹងទំនាក់ទំនងទ្វេភាគី ការជំរុញពាណិជ្ជកម្មនិងការវិនិយោគ ការអប់រំ វិទ្យាសាស្ត្រនិងបច្ចេកវិទ្យា ទេសចរណ៍ និងបញ្ហាតំបន់ និងអន្តរជាតិជាច្រើនទៀត។ នាជំនួបនេះ លោក មហាធៀ ចង់ឃើញការវិនិយោគកាន់តែច្រើនពីអូទ្រីសទៅម៉ាឡេស៊ី ដើម្បីបង្កើនទំហំពាណិជ្ជកម្មទ្វេភាគី។
ចំណែកលោក ឃើស វិញ បានអរគុណលោក មហាធៀ ដែលចំណាយពេលជួបលោក។ ក្រោយការជួបចរចា៤០នាទី អធិការបតីអូទ្រីសវ័យក្មេងរូបនេះនិយាយថា៖ លោកដឹងគុណដែលបានជួបជាមួយមេដឹកនាំសម្បូរបទពិសោធ និងចាស់ជាងគេរបស់ពិភពលោក។ ជាមេដឹកនាំក្មេងជាងគេបំផុត ខ្ញុំមានរឿងច្រើនដែលត្រូវរៀនពីគាត់។»
លើវិស័យពាណិជ្ជកម្មវិញ លោក ឃើស អះអាងថា មានសក្ដានុពលជាច្រើនសម្រាប់ការធ្វើជំនួញទៀតពិសេសវិស័យថាមពល និងហេដ្ឋារចនាសម្ព័ន្ធ។ មេដឹកនាំអូទ្រីសចង់ឃើញប្រទេសទាំងពីរធ្វើការឲ្យកាន់តែជិតស្និទ្ធដើម្បីជំរុញទំនាក់ទំនងទ្វេភាគីផងដែរ៕
Tag:
ម៉ាឡេស៊ី
អូទ្រីស
មហាធៀ មហាម៉ាត់
Sebastian Kurz
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
