អាជ្ញាធរជាតិអប្សរានឹងចាត់វិធានការម៉ឺងម៉ាត់ បើAmazon គ្មានការឆ្លើយតបណាមួយ

ជាតិ

អាជ្ញាធរជាតិអប្សរានឹងចាត់វិធានការម៉ឺងម៉ាត់ បើAmazon គ្មានការឆ្លើយតបណាមួយ

23, Jan 2019 , 4:31 pm

រូបភាព

រូបពីហ្វេសប៊ុករបស់លោក ឡុង កុសល

ដោយ: ប៉ូ សាគុន

ភ្នំពេញ៖ រហូតមកដល់ពេលនេះ ក្រុមហ៊ុនAmazon នៅមិនទាន់ឆ្លើយតបថាយ៉ាងណានៅឡើយ មកក្រសួងវប្បធម៌ ក៏ដូចជាអាជ្ញាធរជាតិអប្សរា។ អាជ្ញាធរជាតិអប្សរា ព្រមានចាត់វិធានការម៉ឺងម៉ាត់ ក្រុមហ៊ុនAmazon នៅតែព្រងើយកន្តើយចំពោះទង្វើរខ្លួន។

អ្នកនាំពាក្យអាជ្ញាធរជាតិអប្សរា លោក ឡុង កុសល បានបញ្ជាក់ថា កម្ពុជានៅរង់ចាំចម្លើយពីក្រុមហ៊ុន Amazon ដែលកម្ពុជា ស្នើឲ្យបញ្ឈប់សកម្មភាពលក់ និងផ្សព្វផ្សាយផលិតផលតែងលម្អរ និងសម្ភារបន្ទប់ទឹក ដែលមានរូបប្រាសាទ និងទង់ជាតិខ្មែរ។ បើសិនជាក្រុមហ៊ុនដ៏ធំ ដែលមានទីតាំងនៅអាមេរិកមួយនេះ នៅតែព្រងើយកន្ដើយចំពោះការលើកឡើងរបស់កម្ពុជាទៀតនោះ អាជ្ញាធរជាតិអប្សរា នឹងចាត់វិធានការម៉ឺងម៉ាត់ទៅAmazon តែម្ដង។ ប៉ុន្តែវិធានការយ៉ាងណានោះ លោក កុសល មិនទាន់អាចបញ្ជាក់ឱ្យបានច្បាស់នៅឡើយ។

ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះ បានបញ្ជាក់ដូច្នេះថា ៖« បើឱ្យខ្ញុំប្រាកដថាគេនៅបន្តលក់ ឬក៏ឈប់លក់ ផលិតផលនោះ យើងមិនអាចប្រាកដបានទេ។ ប៉ុន្តែគ្រាន់តែខ្ញុំជម្រាបថា ការងារនេះយើងធ្វើម៉ឺងម៉ាត់ យើងបានទាក់ទងទៅក្រសួងការបរទេស ទៅស្ថានទូត ដើម្បីដោះស្រាយរឿងនេះ។ នៅពេលនេះយើងមិនទាន់អាចប្រាប់ពីវិធានការថាធ្វើយ៉ាងណាបានឡើយ»។

អត្ថបទទាក់ទង

ទូតខ្មែរប្រចាំអាមេរិក ប្រាប់ Amazon ថាការលក់សម្ភារបន្ទប់ទឹកដែលមានរូបអង្គរវត្ត ជារឿងគួរឲ្យស្អប់ខ្ពើម ហើយត្រូវបញ្ឈប់ជាបន្ទាន់

អាជ្ញាធរអប្សរាប្រាប់ទៅ Amazon ឲ្យឈប់លក់សម្ភារបន្ទប់ទឹកដែលមានរូបអង្គរវត្ត

ដើម្បីបង្ការកុំឱ្យកើតមានរឿងហេតុដូចករណីក្រុមហ៊ុន Amazon ទៅថ្ងៃខាងមុខ អាជ្ញាធរជាតិអប្សរាកំពុងរៀបចំច្បាប់ស្ដីពី ការប្រើប្រាស់រូបភាព និងពាក្យពេចន៍ទាក់ទងនឹងពាក្យថា«អង្គរ»។ «តាមពិតកិច្ចការនេះយើងបានរៀបចំយូរហើយ តែដោយមានបញ្ហាបច្ចេកទេសមួយចំនួន ទើបយើងអាក់ខានទៅវិញ។ ឥឡូវយើងកំពុងតែធ្វើច្បាប់ តាំងពីការប្រើប្រាស់ពាក្យពេចន៍(ប្រាសាទអង្គរ) ទាំងការប្រើប្រាស់រូបភាព។ ព្រោះថាពាក្យថាអង្គរនេះ មិនមែនគ្រាន់តែសំដៅទៅតែប្រាសាទទេ គឺសំដៅទៅដល់វប្បធម៌ អរិយធម៌ ទំនៀមទម្លាប់ អីទាំងអស់ហ្នឹង។ ចឹងយើងត្រូវធ្វើច្បាប់ការពារ»។ នេះបើតាមលោក ឡុង កុសល។

រូបភាពនៃប្រាសាទអង្គរវត្ត ដោយរួមមាន អង្គរវត្ត តាព្រហ្ម បាយ័ន ឬបឹងមាលា ដែលបានចុះបញ្ជីជាបេតិកភណ្ឌពិភពលោក តាំងពីឆ្នាំ១៩៩២ និងទទួលបានអត្ថប្រយោជន៍ពីអង្គការអភិរក្សអន្តរជាតិ (UNESCO) ចាប់តាំងពីឆ្នាំ២០០៧ ត្រូវបានក្រុមហ៊ុន Amazon ប្រើប្រាស់ផលិតទំនិញមួយចំនួន ដូចជាគម្របបង្គន់ កម្រាលបន្ទប់ទឹក កម្រាលជើងមុខបង្គន់ វាំងននងូតទឹក និងកម្រាលផ្ទះបាយជាដើម៕