អន្តរជាតិ
ហុងកុង បង្កើតច្បាប់ដាក់ទោសលើអ្នកចំអកភ្លេងជាតិចិន រូបភាព AP
× រដ្ឋាភិបាលហុងកុង នៅថ្ងៃទី២៣ ខែមករា បានដាក់សេចក្ដីព្រាងច្បាប់ភ្លេងជាតិទៅកាន់សភា ដើម្បីសុំការអនុម័ត។ តាមសេចក្ដីព្រាងច្បាប់នេះ ទង្វើមាក់ងាយភ្លេងជាតិចិន ជាទោសឧក្រិដ្ឋ ដែលត្រូវមានទោសទណ្ឌ ឬការផាកពិន័យជាប្រាក់ធ្ងន់ធ្ងរ។ សកម្មជនគាំទ្រប្រជាធិបតេយ្យ និងក្រុមមាននិន្នាការទៅរកឯករាជ្យនៅហុងកុង បានរិះគន់រដ្ឋាភិបាលយ៉ាងខ្លាំង និងចាត់ទុកសេចក្ដីព្រាងច្បាប់នេះជាការបំពានសេរីភាពបញ្ចេញមតិក្នុងទីក្រុងមួយនេះ។
ជនណាដែលមិនគោរពភ្លេងជាតិចិន អាចជាប់ពន្ធនាគារដល់ទៅ៣ឆ្នាំ ឬត្រូវផាកពិន័យទឹកប្រាក់ដល់ទៅជិត៦៥០០ដុល្លារ។ នេះបើតាមសេចក្ដីព្រាងច្បាប់ភ្លេងជាតិដែលបញ្ជូនទៅកាន់សភាដោយរដ្ឋាភិបាលតំបន់រដ្ឋបាលពិសេសហុងកុងនៅថ្ងៃទី២៣ ខែមករា។ សំណើនេះ បង្កជាកំហឹងយ៉ាងខ្លាំងក្នុងចំណោមសកម្មជនសិទ្ធិមនុស្ស និងគាំទ្រប្រជាធិបតេយ្យរបស់ហុងកុង ដ្បិតច្បាប់ថ្មីអាចត្រូវប្រើដើម្បីកំហិតសេរីភាពបញ្ចេញមតិ។
បើតាមកាសែត South China Morning Post បន្ថែមពីការដាក់ទោសទណ្ឌ និងការផាកពិន័យនេះ សំណើច្បាប់នេះ ក៏ផ្ដល់សិទ្ធិឲ្យប៉ូលិសដល់ទៅពីរឆ្នាំដើម្បីស៊ើបអង្កេតជនសង្ស័យ និងតម្រូវឲ្យសិស្សច្រៀង និងរៀនពីបទ March of Volunteer ដែលជាភ្លេងជាតិចិន។ រដ្ឋលេខាធិការកិច្ចការធម្មនុញ្ញ និងទំនាក់ទំនងជាមួយដីគោកលោក Patrick Nip Tak-kuen ជាអ្នកដាក់សេចក្ដីព្រាងច្បាប់ទៅសភាហុងកុង។
ការជជែកលើកទីមួយលើសេចក្ដីព្រាងនេះ បានធ្វើទៅដោយរលូន ប៉ុន្តែការតវ៉ា និងការប្រឆាំងបានចាប់ផ្ដើមពុះកញ្ជ្រោលក្នុងចំណោមអ្នកការពារសិទ្ធិសេរីភាព។ លោក Nip និយាយការពារសេចក្ដីព្រាងច្បាប់នេះថា ជាការរក្សាគោលបំណងរបស់ច្បាប់ភ្លេងជាតិរបស់ដីគោក និងការពារតម្លៃភ្លេងជាតិ ព្រមគ្នានឹងការគិតគូរពីប្រព័ន្ធច្បាប់ហុងកុង។ លោកបន្តថា បុគ្គលដែលគ្មានបំណងមាក់ងាយភ្លេងជាតិ នឹងមិនល្មើសច្បាប់នេះឡើយ។
មេដឹកនាំបក្សប្រឆាំងលោក Fernando Cheung Chiu-hung បានប្រតិកម្មនឹងសំណើច្បាប់នេះ និងចាត់ទុកថា នេះមិនមែនជាផ្លូវដើម្បីទទួលបានការគោរពដោយស្មោះត្រង់ឡើយ តែជាការចាប់បង្ខំឲ្យគោរពទៅវិញ។ យ៉ាណាមិញ សំឡេងប្រឆាំងទំនងមិនគ្មានបានការទេ ដ្បិតបក្សប្រឆាំងគ្មានសំឡេងគ្រប់គ្រាន់ដើម្បីបង្អាក់នីតិវិធីឡើយ។ តាមការគ្រោងទុក សភាហុងកុងនឹងអនុម័តសេចក្ដីព្រាងនេះដោយស្រួលក្នុងខែកក្កដា។
តាមពិតទៅ ករណីចំអកភ្លេងជាតិចិននៅហុងកុង ច្រើនកើតឡើងក្នុងព្រឹត្តិការណ៍កីឡាបាល់ទាត់។ ប្រជាជនហុងកុងដែលចាត់ទុកខ្លួនថា មិនមែនជនជាតិចិននោះ តែងស្រែករំខានពេលភ្លេង March of Volunteer ចាក់ម្ដងៗ។ ពួកគេចាត់ទុកទង្វើបែបនោះ ជាការបង្ហាញការមិនពេញចិត្តចំពោះសកម្មភាពជ្រៀតជ្រែករបស់ប៉េកាំងចូលកិច្ចការហុងកុង៕
© រក្សាសិទ្ធិដោយ thmeythmey.com